9
1 Nqtavq gaqkhoel ngaq gaq teevq gaq nqbho jiiv-u phao, nqtavq nee mail miltsaq kovtavq bhai ga lee thaq nail aqgil teevq heeq bhai ngal ya moel-a nail ngaol. Aqgil al heeq bhai mao-ail navq nail khaqduq nail taovq taovqphoil bivq-a nail ngaol.
2 Aq-u phao, aqgil al heeq mao-ail navq nail khaqduq al duq bhai phao-a nail ngaol. Miqjaq jaibhoil bhoil ma nail miqkhoiq khe-ai, khaqduq al duq nee miqkhoiq dov lal-a nail ngaol. Miqkhoiq al bhaqda nee, nlma navtsee dai pevq-ail khi, lilmoel lavqkhoel bhai iqsanl navtsee dai, pevq ail-a nail ngaol.
3 Miqkhoiq al nail lavqkhoel nee, noelbhoel maodai dov lal khi, miltsaq kovtavq bhai ga lee-a nail ngaol. Noelbhoel al juq bhai miltsaq kovtavq khe bhoiqkeiv lavqmav nail bhaqaoq khe-ai dul nail bhaqaoq bivq-a nail ngaol.
4 “Miltsaq kovtavq bhai doevq nail moeqgaq bhai maqkhaiq, aqpavq aqniul khal niul nail yaoq phaq yaoq-ao nee bhai maqkhaiq, aqbhaol iqsanl bhai maqkhaiq, thaq lav cov dei-eiq, neeqthel bhai Miqyail nail junq maq deeq-ai thaq nail tsaol-aq bhai taivq-ail lav cov yaoq” dai, noelbhoel al juq bhai ge bhiq-a ngaol.
5 Thailhai ngaol-aoq, noelbhoel al juq, tsaol-aq bhai lav heivq nail aqkhaoqanq maq ya-al. Bhala ngaq heeq bhee dai, khoeq bhiq jiovq bhiq nail aqkhaoqanq taivq-ail ya-a nail ngaol. Noelbhoel-i mail keivq nail bhai ya daq nail gaq neq, bhoiqkeiv lavqmav-i mail keivq-a nail khe-ai, nal nail ngaol.
6 Aqyanq al yanq nail lavqkhoel neq, tsaol-aq yaq juq sil nail phaq bhai halpov khi ngaol-aoq, maq halpov moel nia-ail. Aqyu juq sil movq deedee khi ngaol-aoq, sil nail phaq aqyu juq nee mail tsaoq dol-aivq nail ngaol.
7 Noelbhoel al juq neq, genl dev nail dai khi, lainq-ai thaq nail moeqphaq khe-ai dul nail ngaol. Heel uqtsaoq khe-ai dul nail phaq noelbhoel al juq nail uqhuq bhai tsaoq-nq thaq nail ngaol. Aqyu juq nail maivphaoq neq, tsaol-aq nail maivphaoq khe-ai dul nail ngaol.
8 Aqyu juq nail tsailkheel neq, yaqmai-aq nail tsailkheel khe-ai dul khi, aqyu juq nail aqhaoq neq, allaqjaqsil nail aqhaoq khe-ai dul nail ngaol.
9 Aqyu juq nail neema bhai doeqdaq nail phaq neq, hail-i mail lav sav-ai thaq nail khe-ai dul nail ngaol. Aqyu juq nail aqdaol daol deedee nail aqthel neq, genl dev nail bhai tsaol-aivq nail moeqphaq lalaoq maodai nail aqthel khe-ai dul nail ngaol.
10 Aqyu juq nail daoqmiq neq, bhoiqkeiv lavqmav nail daoqmiq khe-ai dul khi, daoqmiq bhai bhaiqnieivq covq khi dovq aol nail ngaol. Aqyu juq nail daoqmiq lavqkhoel bhai, bhala ngaq heeq bhee dai, tsaol-aq yaq bhai khoeq bhiq jiovq bhiq nail bhaqaoq aol nail ngaol.
11 Aqyu juq nail heeqphaq neq, mao-ail navq nail khaqduq nail gaqkhoel ngaol. Aivq nail aqmil neq, Heiqbhail daoq Aqbhaqdoq dai, khul khi, Heiqlaqsal daoq neq, Aqphaollil-oq dai, mil-ai thaq nail ngaol. Daoqceevq neq, lav luq lav seil nail gaq dai, ge nail ngaol.
12 Geeqlaoq aqdoil iqmoeq khe phaq gil-aoq nail ngaol. Geeqlaoq aqdoil nvq phaq gaoq kev lee-ai haq nail ngaol.
13 Nqtavq gaqkhoel kovq gaq teevq gaq nqbho jiiv-u phao, Miqyail nail sivtavq bhai jiav nail heel-i mail lav sav-ai thaq nail laol duq nail uqkheel liq kheel nee mail aqthel meel dol leevq-a nail bhai, ngal ya gaiq-a nail ngaol.
14 Aqthel al neq “Ulbhaqlal laoljaol jaol ma nail jail-nq bhai pheethaiq-ai thaq nail nqtavq gaqkhoel liq gaq bhai phaiq bhiq yaoq” dai, nqbho oil-nq thaq nail nqtavq gaqkhoel kovq gaq teevq gaq bhai ge bhiq-a nail ngaol.
15 Alheel ngel-i mail, miltsaq tsaol-aq yaq juq bhai hail bhoil teevq bhoil heivq nail dai khi, lainq-ai thaq nail nqtavq gaqkhoel al liq gaq bhai Miqyail-i mail phaiq bhiq khi, aqyanq al yanq nail haqbhoil, aqkovq al kovq nail haqbhoil, bhala al heeq nail haqbhoil, aqn al n nail haqbhoil, bhi jaol-ai thaq nail ngaol.
16 Moeqphaq jeeq-nq thaq nail genl dev nail juq khadai gaq bhee nail dai, ngal ya gaiq-a ngaol. Aqyu juq neq, nvq yal lanv gaq bhee nail ngaol.
17 Aqhaqlal lavqkhoel nee ngaq-i mail ya moel-a nail moeqphaq khi mail, moeqphaq jeeq-nq thaq nail juq neq, niailhai ngaol. Moeqphaq jeeq-nq thaq nail al juq neq, neema bhai doeqdaq duq doi-nq thaq nail ngaol. Doeqdaq duq al neq, miqjaq khe-ai neltsaiq dai nel khi, lenl lenl nav khi mail miqjal jalheel khe-ai heel tsaiq deel ngaol. Moeqphaq al juq nail uqhuq neq, allaqjaqsil nail uqhuq khe-ai dul nail ngaol. Al ovqtavq, moeqthaoq lavqkhoel bhai miqjaq miqlail, miqjaq nail miqkhoiq khi mail miqjal jalheel dov lal thailthaiq nail ngaol.
18 Moeqthaoq lavqkhoel nee dov lal thailthaiq nail miqjaq miqlail, miqjaq miqkhoiq khi mail, miqjal jalheel kheq nail, khoeq nail jiovq nail niil hail phaq bhaqda nee, miltsaq tsaol-aq hail bhoil teevq bhoil sil-a nail ngaol.
19 Moeqphaq al juq nail bhaqaoq neq, aqyu juq nail moeqthaoq khi mail daoqmiq nail lavqkhoel bhai aol nail ngaol. Aqyu juq nail daoqmiq neq, eellel khe-ai dul khi, uqhuq iqsanl covq nail ngaol. Uqhuq al nee mail yu bhai khoeq bhiq jiovq bhiq-a nail ngaol.
20 Thailhai ngaol-aoq, khoeq nail jiovq nail al hail phaq nail kov-uvq bhai maq sil dai jel ail-a nail tsaol-aq, yovqgavq nail aqlavq-i mail nl-ai thaq nail juq bhai maq noeq pov-ail, aqyu juq neq, neivq bhai uqhuq thaoq nail maqkhaiq, phul, heel, giqheel, lovmav khi mail aqbhaol-i mail lav sav-ai thaq nail maq moel nia, maq gaiq nia, gailkhaol iqsanl maq tsao nia nail thaoqphaoq aqma maolkhoel bhai uqhuq thaoq nail maqkhaiq, aqyu juq maq khaonq ha-al.
21 Tsaol-aq al juq neq, yu bhai heivq nail phaq bhai maqkhaiq, neivq bhai laol nail sail nail phaq maqkhaiq, khaqmiq sev nail phaq maqkhaiq, yu nail nlmaoq bhai khoiq nail phaq bhai maqkhaiq, maq noeq pov-ail.