8
Junq deeq-ai thaq nail sivq laiq teevq laiq nail ganl
1 Yaolyaq junq deeq-ai thaq nail sivq laiq teevq laiq bhai phao-u phao, naqli teevq khaoqaiq niidai, nqtavq kovtavq bhai aqtsi tsu dai pevq ail-a nail ngaol.
2 Aq-u phao, Miqyail nail sivtavq bhai thulphaol-nvq thaq nail nqtavq gaqkhoel sivq gaq bhai, ngal ya moel-a nail ngaol. Nqtavq gaqkhoel al sivq gaq bhai, teevq gaq bhai nqbho teevq bhao bivq-a nail ngaol.
3 A bhai nee ngal-aq, heel iqlaoq tsiq-nq thaq nail nqtavq gaqkhoel yaoq gaq yaoq dov lee khi, laol duq aqjail bhai thulphaol-nvq thaq nail ngaol. Doiqbev bev ma nail sivtavq bhai jiav nail heel-i mail lav sav-ai thaq nail laol duq nail kovtavq bhai, Miqyail nail tsaol-aq iqsanl nail geeqlaoq nee mail laol bhai nail dai khi, tovq khi danq nail huqbhiq nil nail phaq maodai, aivq bhai bivq-a nail ngaol.
4 Aq-u phao, nqtavq gaqkhoel nail aqlavq lavqkhoel bhai aol nail tovq khi danq nail huqbhiq nil nail phaq nail miqkhoiq neq, aivq nail tsaol-aq nail geeqlaoq hal daoq nee mail teevq gaq khe-ai, Miqyail nail sivtavq bhai dav lai-a nail ngaol.
5 Nqtavq gaqkhoel al gaq, iqlaoq al heeq bhai tsiq khi, laol duq bhai tovq thailthaiq nail miqjaq teevq bhoi tsiq bhoel khi, miltsaq kovtavq bhai liv kha gai-aivq-a nail ngaol. Aq-u phao, nqjaiq jaiq nail mee nia phaq nail aqthel meel dol leevq-a nail ngaol. Nqmeivq iqsanl meivq, milluv iqsanl luv lal-a nail ngaol.
Nqbho jiiv nail ganl
6 Nqbho sivq laiq oil-nq thaq nail nqtavq gaqkhoel al sivq gaq, nqbho jiiv nail dai khi, lainq-ai thaq nail ngaol.
7 Nqtavq gaqkhoel iqmoeq khe gaq nqbho jiiv-u phao, aqsivq kheq nail ollov khi miqjaq, miltsaq kovtavq bhai ga lee-a nail ngaol. Miqjaq al-i mail miltsaq hail bhoil teevq bhoil bhai maqkhaiq, aqbhaol hail bhoil teevq bhoil bhai maqkhaiq, niul jiaovq deel moeqgaq iqsanl maqkhaiq, poiv jaq gil-a nail ngaol.
8 Nqtavq gaqkhoel nvq gaq teevq gaq nqbho jiiv-u phao, miqjaq tovq nail gaoqjaoq jaoq ma khe-ai dul nail teevq phaq, iqyaq iqma bhai liv puvq-a nail ngaol. Iqyaq iqma hail bhoil teevq bhoil aqsivq pevq ail-a nail ngaol.
9 Iqyaq iqma lavqkhoel khe aqdoevq juq, hail bhoil teevq bhoil sil-a nail ngaol. Laovq hail bhoil teevq bhoil iqsanl, cov ail-a nail ngaol.
10 Nqtavq gaqkhoel hail gaq teevq gaq nqbho jiiv-u phao, miqjaq jaibhoil khe-ai tovq nail aqgil gil ma teevq heeq nqtavq nee ga lee khi, ulcuvq laol jaol hail bhoil teevq bhoil nail kovtavq bhai maqkhaiq, ulcuvq eelbev juq nail kovtavq bhai maqkhaiq, ga dav-a nail ngaol.
11 Aqgil al heeq bhai, aqkhaq khaq deedee nail aqbhaol dai khul nail ngaol. Ulcuvq hail bhoil teevq bhoil bhai neq, aqkhaq pevq-ail khi dov lal-a nail ngel-i mail, tsaol-aq maodai gaq sil-a nail ngaol.
12 Nqtavq gaqkhoel liq gaq teevq gaq nqbho jiiv-u phao, nlma hail bhoil teevq bhoil, bhala hail bhoil teevq bhoil khi aqgil hail bhoil teevq bhoil cov ail-a nail ngel-i mail, al juq nail aqbhaq hail bhoil teevq bhoil navtsee dai, pevq ail-a nail ngaol. N-gaol hail bhoil teevq bhoil aqbhaq maq bhaq mail, nqkiv hail bhoil teevq bhoil iqsanl alhai dul dai, aqbhaq maq bhaq-ail.
13 Ngal heldaiq gai-aivq-u phao, nqtavq nail gaoltsi bhai joelma maol ma teevq maol bhail nail ngaol. Joelma al maol mailma-ail kav nail aqthel nee ge nail: “Allol-oq, nqbho maq ya jiiv-a nail nqtavq gaqkhoel al hail gaq, nqbho jiiv lal-a nail aqthel bhaqda nee, miltsaq kovtavq bhai jaol nail tsaol-aq yaq geeqlaoq aqdoil, geeqlaoq aqdoil, geeqlaoq aqdoil ya nail ngaol” dai, gul nail bhai ngal ya gaiq-a nail ngaol.