5
Yov-ai thaq nail haoqgavq khi mail Yaolyaq nail ganl
1 Joiqjaq doiqbev bev ma bhai jaoldeel-nvq thaq nail gaq nail lavqmal lavq phao pavqyov yov-ai thaq nail haoqgavq teevq yov aol nail bhai, ngal ya moel-a nail ngaol. Haoqgavq al yov nail kovtavq phao maqkhaiq, lavqkhoel phao maqkhaiq, haoqgavq gevq-ai thaq nail ngaol. Haoqgavq al yov nail kovtavq bhai junq sivq dao deeq khi pheethaiq-ai thaq nail ngaol.
2 Aq-u phao, gaq mao-ail kav nail nqtavq gaqkhoel teevq gaq aqthel aqkav kav dai gul nail: “Haoqgavq niil yov bhai phao khi, junq deeq-ai thaq nail juq bhai oil ha nail, khaq sil gaq geel-nvq nail-aiq” dai, gul nail bhai, ngal ya gaiq ya moel-a nail ngaol.
3 Haoqgavq al yov bhai neq, nqtavq kovtavq bhai jaol nail juq maqkhaiq, miltsaq kovtavq bhai jaol nail juq maqkhaiq, miltsaq nail kov-uvq bhai jaol nail juq maqkhaiq, teevq gaq-ail maq phao nia-ail, maq heldaiq nia-ail.
4 Haoqgavq al yov bhai phao nail maqkhaiq, ge nail maqkhaiq, geel-nvq nail tsaol-aq teevq gaq bhai iqsanl maq halpov moel-a nail ngel-i mail, ngal nioil deedee-a nail ngaol.
5 Aq-u phao, joiqmaoq mavmaoq nail lavqkhoel khe teevq gaq ngaq bhai niailhai ge lavq-a nail ngaol: “Thaq nioil. Yuldav nail tsaol-aq nail jeq-e jaq-a lavqkhoel nee dov lal-a nail, allaqjaqsil dai khul nail, Daqbhil nail daoqtsail pevq nail gaq, gaq lai-aoq nail ngaol. Alheel ngel-i mail, haoqgavq al yov bhai iqsanl, junq deeq-ai thaq nail sivq laiq bhai iqsanl, aivq phao nia nail ngaol” dai, ge lavq-a nail ngaol.
6 A bhai nee ngal-aq, doiqbev bev ma khi mail aqdoevq phaq al liq maol nail gaoltsi bhai maqkhaiq, joiqmaoq mavmaoq al juq nail gaoltsi bhai maqkhaiq, thulphaol-nvq thaq nail yaol yaq bhai ngal ya moel-a nail ngaol. Yaol yaq al maol neq, deeq heivq nail bhai ya daq daiq-a nail khe-ai dul nail ngaol. Aivq neq, uqkheel sivq kheel covq khi, maivneev sivq neev covq nail ngaol. Maivneev al sivq neev neq, miltsaq kovtavq bhai doi dai, Miqyail-i mail khoel-ai leevq-a nail, aqhaqlal sivq gaq bhai ge nail ngaol.
7 Aq-u phao, Yaolyaq al gaq lai khi, doiqbev bev ma bhai jaoldeel-nvq thaq nail gaq nail lavqmal lavq bhai aol nail yov-ai thaq nail haoqgavq al yov oil lai-a nail ngaol.
8 Aivq laiqyov-ai thaq nail haoqgavq al yov oil-u phao, aqdoevq phaq al liq maol khi mail joiqmaoq mavmaoq al nvq tsel liq gaq Yaolyaq nail sivtavq bhai peevqceevq kovdoiq doiq nail lavqkhoel nee gaolbeiv-a nail ngaol. Aqyu juq yaoq gaq yaoq-ao nee mail dil-nvq aol khi, tovq khi danq nail huqbhiq nil nail phaq teevq bhee aol nail heel maiqgaoq iqsanl, tsinq-ai thaq nail ngaol. Huqbhiq nil nail al phaq neq, Miqyail nail tsaol-aq juq nail geeqlaoq hal daoq ngaol.
9 Aqyu juq tsiqeeq nail daoqsel aqsivq niailhai gul nail ngaol:
“Haoqgavq pavqyov
al yov oil khi
junq deeq-ai thaq nail
juq bhai phao nail neq,
naol geel-nvq nail ngaol.
Khul khi mail dai
ngal-aq neq,
naol deeq heivq nail bhai
ya daq-a nail ngaol.
Khul phaq nail
jeq-e bhai maqkhaiq,
khul phaq nail daoq ge nail
tsaol-aq bhai maqkhaiq,
jeq-e jaq-a
iqsanl bhai maqkhaiq,
milkhaoq yaoq khaoq
yaoq-ao nee maqkhaiq,
naol naoq nail aqsivq-i mail
Miqyail nail haqbhoil
tsaol-aq yaq bhai
ul kovq-a nail ngaol.
10 Naol aqyu juq bhai
Miqyail Milkhaoq
lavqkhoel bhai
heeqphaq
pevq lal dai maqkhaiq,
aivq nail Philma
pevq lal dai maqkhaiq,
nl bhiq-a nail ngaol.
Aqyu juq
miltsaq kovtavq bhai
ya uvthaiq nail ngaol” dai,
gul nail ngaol.
11 Ngal gaoq heldaiq gai-aivq-u phao, mao deedee nail nqtavq gaqkhoel nail aqthel ya gaiq-a nail ngaol. Aqyu juq neq, aqdoevq phaq liq maol khi mail joiqmaoq mavmaoq al nvq tsel liq gaq bhai maqkhaiq, doiqbev bev ma al bhai maqkhaiq, teevq jaoq jaoljaoq-ai thaq nail ngaol. Aqyu juq neq, aqsainv aqlanv gaq bhee nail ngaol.
12 Aqyu juq aqthel aqkav kav dai, niailhai gul nail ngaol:
“Deeq heivq nail bhai
ya daq-a nail Yaolyaq neq,
bhaqaoq maqkhaiq,
phul heel ildaoq
maoqgaiq maqkhaiq,
neenoeq neekha maqkhaiq,
gaq kav nail phaq maqkhaiq,
ev nail phaq maqkhaiq,
seiqleiq khaoqsail maqkhaiq,
tsiqeeq nail phaq maqkhaiq,
ya nail geel-nvq nail ngaol” dai,
gul nail ngaol.
13 A bhai nee ngal-aq, nqtavq kovtavq bhai jaol nail juq maqkhaiq, miltsaq kovtavq bhai jaol nail juq maqkhaiq, miltsaq kov-uvq bhai jaol nail juq maqkhaiq, iqyaq iqma bhai jaol nail juq maqkhaiq, al juq iqsanl mail niailhai ge nail bhai ngal ya gaiq-a nail ngaol:
“Joiqjaq doiqbev bev ma bhai
jaoldeel-nvq thaq nail
gaq bhai maqkhaiq,
Yaolyaq bhai maqkhaiq,
nqmaq maqluv halyeel
tsiqeeq nail phaq,
ev nail phaq,
seiqleiq khaoqsail
khi mail uvthaiq nail
bhaqaoq jiav dei-eiq” dai,
aqyu juq gul nail ngaol.
14 Aq-u phao, aqdoevq phaq al liq maol, “Aqmiq” dai, ge-a nail ngaol. Joiqmaoq mavmaoq al juq neq, peevqceevq kovdoiq doiq nail lavqkhoel nee gaolbeiv khi uqhuq thaoq-a nail ngaol.