4
Nqtavq kovtavq bhai Miqyail bhai uqhuq thaoq nail ganl
1 A bhai nee ngal-aq, ngal heldaiq gai-aivq-u phao, nqtavq kovtavq nail lolgov phao-ai thaq nail bhai ya moel-a nail ngaol. Iqmoeq-u phao, ngaq bhai daoq ge lavq khi ngal ya gaiq-a nail nqbho aqthel khe-ai kav nail aqthel al, niailhai ge nail ngaol: “Niilniai dav lal yaoq. Yaqhao pevq lal nail juq nail ganl naoq bhai ge bhiq naol” dai, ngaq bhai teevq pov gaoq ge lavq-a nail ngaol.
2 Aq-u phao, teevq pov taivq-ail, Aqhaqlal Miqyail ngaq bhai uvthaiq lee-a nail ngaol. Heldaiq dei-eiq. Nqtavq kovtavq bhai doiqbev bev ma jiav nail bhai maqkhaiq, doiqbev bev ma al bhai teevq gaq jaoldeel-nvq thaq nail bhai maqkhaiq, ngal ya moel-a nail ngaol.
3 A bhai jaoldeel-nvq thaq nail al gaq, sainl aqnel nail lovmav khi mail aqbhaq mee nia phaq aol nail neltsaiq deel sainl lovmav khe-ai, dul nail ngaol. Aqniul niul nav nav nail sainl lovmav khe-ai dul nail haildallalkov, doiqbev bev ma al nail teevq jaoq jiav nail ngaol.
4 Doiqbev bev ma al nail teevq jaoq, doiqbev nvq tsel liq bev jiav nail ngaol. Doiqbev al nvq tsel liq bev bhai joiqmaoq mavmaoq nvq tsel liq gaq jaoldeel-nvq thaq nail ngaol. Aqyu juq neq, aqgaq aqdoi aqphul doi-nq khi, heel uqtsaoq tsaoq-nq thaq nail ngaol.
5 Doiqbev bev ma a bhai nee mail, nqmeivq meivq khi nqjaiq jaiq nail aqthel mee nia phaq meel dol leevq-a nail ngaol. Doiqbev bev ma al nail sivtavq bhai, phalmanq sivq heeq tovq-ai thaq nail ngaol. Phalmanq al sivq heeq neq, Miqyail nail aqhaqlal sivq gaq ngaol.
6 Doiqbev bev ma al nail sivtavq bhai sainl khe-ai dul nail phaoqdaiq ngaqkha teevq kha jiav nail ngaol. Doiqbev bev ma al nail gaoltsi bhai maqkhaiq, jaoq jaoq dai maqkhaiq, aqdoevq phaq liq maol jaol nail ngaol. Al juq neq, sivtavq phao maqkhaiq, haoqnaol phao maqkhaiq, maivneev teevq bhee covq nail ngaol.
7 Iqmoeq khe maol neq, allaqjaqsil khe-ai dul nail ngaol. Nvq maol teevq maol neq, niaoqnel niaoqkhal khe-ai dul nail ngaol. Hail maol teevq maol neq, tsaol-aq nail maivphaoq covq nail ngaol. Liq maol teevq maol neq, bhail nail joelma maol ma khe-ai dul mail ngaol.
8 Aqdoevq phaq al liq maol neq, yaoq maol yaoq-ao nee aqdaol kovq daol covq nail ngaol. Lavqkhoel phao maqkhaiq, lavqniil phao maqkhaiq, maivneev teevq bhee covq nail ngaol. Aqyu juq nqkiv n-gaol maqkhaiq, gaqnaq maq naq dai, niailhai gul nail ngaol:
“Iqsanl nail kovtavq bhai
uvthaiq nail bhaqaoq eeq nail
Heeqphaq Miqyail neq,
meeq dee haol deedee nail ngaol.
Meeq dee haol deedee nail ngaol.
Meeq dee haol deedee nail ngaol.
Aivq neq, milnee uqnee iqsanl,
niil aq-il iqsanl doevq khi,
yaqhao iqsanl yavq kha lee nail
nqmaq maqluv halyeel
doevq nail Miqyail ngaol” dai,
khaq mao iqsanl gul nail ngaol.
9 Aqdoevq phaq al liq maol neq, doiqbev bev ma bhai jaoldeel-nvq thaq nail, nqmaq maqluv halyeel doevq nail gaq bhai tsiqeeq tsiqheel nail nee ovqtavq, aivq bhai ev ev-ail, “Seiqleiq khaoqsail jiav dei-eiq” dai, gul-u phao,
10 joiqmaoq mavmaoq al nvq tsel liq gaq iqsanl, doiqbev bev ma bhai jaoldeel-nvq thaq nail al gaq nail sivtavq bhai peevqceevq kovdoiq doiq nail lavqkhoel nee gaolbeiv khi, nqmaq maqluv halyeel doevq nail al gaq bhai uqhuq thaoq-a nail ngaol. Doiqbev bev ma al nail sivtavq bhai aqyu juq nail heel uqtsaoq loev thaq khi ge nail:
11 “Nvjuq nail
Heeqphaq Miqyail-ol,
yu naoq bhai tsiqeeq
tsiqheel nail maqkhaiq,
ev nail maqkhaiq,
naol bhaqaoq
ya dai maqkhaiq,
geel-nvq nail ngaol.
Khul khi mail dai
ngal-aq neq,
yaoq phaq yaoq-ao nee,
naoq-i mail
teivq-ai thaq nail ngaol.
Naoq nail neenoeq
needul bhaqda nee,
naol al juq bhai
teivq-ai thaq khi,
al juq pevq lal-a nail ngaol” dai,
ge bhiq-a nail ngaol.