2
Eilpheilsu Khali yaq munl bhai bivq-a nail daoq
1 Yeiqsul gaoq ge nail: “Eilpheilsu meenq bhai jaol nail Khali yaq munl nail gaqkhoel bhai niailhai gevq bhiq yaoq:
Lavqmal lavq bhai aqgil sivq heeq nieivq thaiq-ai thaq khi, heel phalmanq sivq heeq nail gaoltsi bhai tsao thailthaiq nail gaq, niailhai ge nail ngaol:
2 ‘Naol nl thail hal thailthaiq nail juq bhai maqkhaiq, nl doil hal doil-a nail juq bhai maqkhaiq, oltsaol nail phaq bhai maqkhaiq, ngal heeq kivq naol. Naol haqeiv nail tsaol-aq juq bhai maq khanq tsaol nail bhai iqsanl, ngal heeq kivq naol. Gaqkhoel ngaol dai, ge khi ngaol-aoq, maldil maq ngel nail juq bhai, naol laonqdaiq khi, aqyu juq goiqbhaoq bhaoq nail tsaol-aq ngel lao thaq-il dai, naol ya heeq kivq-a nail ngaol.
3 Naol oltsaol khi ngaq bhai juq nail bhaqda nee khoeq nail jiovq nail bhai ya daq-u phao, naol neema maq cov nail bhai iqsanl, ngal heeq kivq nail ngaol.
4 Thailhai ngaol-aoq, ngal naoq bhai oeqbal thaq duq niailhai jiav nail ngaol. Naol iqmoeq-u goil nail gaiq-a nail neema aol khi ngaol-aoq, niil aq-il maq aol-aoq thaq nail ngaol.
5 Alheel ngel-i nail, naol khadai ga kha lee-a nail bhai saol-nvq khi, oeqbal noeq pov noeq pov-ail, iqmoeq-u nl-a nail khe-ai, nl yaoq. Naol naoq nail oeqbal maq noeq pov haq neq, ngal naoq nail phalmanq bhai tsiq dov lee naol.
6 Thailhai ngaol-aoq, naol aqmeeq niil phaq nl thailthaiq-ai haq nail ngaol: Naol Nilgaolla tsaol-aq nl nail hal nail bhai neejiav jiav nail ngaol. Ngal iqsanl al juq bhai neejiav jiav nail ngaol.
7 Naqkhaol khal covq nail tsaol-aq, Aqhaqlal Miqyail Khali yaq munl juq bhai ge bhiq nail daoq aqmeeq-ail naldaiq yaoq. Gaq lai nail tsaol-aq bhai neq, aqdoevq bhi doevq nail aqbhaol nail aqheeq, ngal aqyu juq bhai bhi jaq naol. Aqbhaol al bhaol neq, Miqyail nail Bhaqlaqdilsuv dai khul nail gaoqkhail lavqkhoel bhai doevq nail ngaol’ ” dai, ge bhiq-a nail ngaol.
Saqmullaqnav Khali yaq munl bhai bivq-a nail daoq
8 Yeiqsul gaoq ge nail: “Saqmullaqnav meenq bhai jaol nail Khali yaq munl nail gaqkhoel bhai niailhai gevq bhiq yaoq:
Iqmoeq ilmoeq khe gaq pevq khi, haoqnao naosaq khe gaq pevq nail nee ovqtavq, sil khi ngaol-aoq, gaoq doevq kovq lal-a nail gaq, niailhai ge nail ngaol:
9 ‘Naol ya daq thailthaiq nail khoeq nail jiovq nail phaq khi haq nail aoq nail bhai, ngal heeq kivq naol. (Maldil dai, ge haq neq, naol neq hulmeeq hulbhao ngaol.) Tsaol-aq teevq pav ganav juq naoq bhai khal ge movq-ail ge doil nail bhai iqsanl, ngal heeq kivq naol. Aqyu juq neq, Yuldav nail tsaol-aq ngaol dai, ge khi ngaol-aoq, maldil Yuldav nail tsaol-aq maq ngel-ail. Neivq Saqdaq nail munl lavqkhoel bhai aol nail tsaol-aq ngaol.
10 Maq maoq lal mail, naol ya daq nail khoeq nail jiovq nail phaq bhai thaq geesil. Naoq bhai laonqdaiq nail dai khi, neivq heeqphaq nuljuq teevq pav ganav juq bhai thaonq bhai laol khi, tsel n bhee dai khoeq nail jiovq nail bhai, nuljuq ya daq nail ngaol. Sil-u kev dai, neema ivq yaoq. Ivq haq neq, aqdoevq bhi doevq nail heel uqtsaoq kovpavq, ngal nuljuq bhai bivq naol.
11 Naqkhaol khal covq nail tsaol-aq, Aqhaqlal Miqyail Khali yaq munl juq bhai ge bhiq-a nail daoq aqmeeq-ai naldaiq yaoq. Nvq pov teevq pov sil nail phaq neq, gaq lai-a nail tsaol-aq bhai, khul teevq phaq-ail maq khi nia-ail’ ” dai, ge bhiq-a nail ngaol.
Bheiqlaqgaq Khali yaq munl bhai bivq-a nail daoq
12 Yeiqsul gaoq ge nail: “Bheiqlaqgaq meenq bhai jaol nail Khali yaq munl nail gaqkhoel bhai niailhai gevq bhiq yaoq:
Nvq phao nvq phao-ail tav deedee nail thaoma jiav nail niil gaq niailhai ge nail ngaol:
13 ‘Naol khaq bhai jaol nail dai, ngal heeq kivq naol. Neivq Saqdaq nail joiqjaq doiqbev jiav nail bhai naol jaol nail ngaol. Thailhai ngaol-aoq, naol ngaq bhai saljial ivq nail ngaol. Saljial ivq nail ngaq nail ganl salkhil khanq nail gaq pevq nail Aqdilpav bhai, neivq Saqdaq jaol nail naoq nail meenq nee heivq khi ngaol-aoq, ngaq bhai neema thaqtsaol nail phaq bhai naol maq khaonq ha-al.
14 Thailhai ngaol-aoq, ngal naoq bhai oeqbal thaq duq niailhai jiav nail ngaol. Naoq nail jaol duq bhai jaol nail tsaol-aq teevq pav ganav juq neq, Bhaqlaq dai mil-ai thaq nail gaq-i mail cavq nail cov nail haoqnao tsaothe thailthaiq nail ngaol. Ilsaqleiqlal nail tsaol-aq laiq-ail tsa-ail dai, Bhaqlaq neq, Bhaqlail bhai cavq bhiq cov bhiq-a nail ngaol. Cavq bhiq cov bhiq-a nail al neq, thaoqphaoq aqma maolkhoel bhai laol bhiq-a nail jaqjaq daoldaol jaq yaoq dai, cavq bhiq cov bhiq-a nail nee ovqtavq, khaqmiq iqsanl sev yaoq dai, cavq bhiq cov bhiq-a nail ngaol.
15 Alhai dul dai, naoq nail lavqkhoel khe tsaol-aq teevq pav ganav juq neq, Nilgaolla tsaol-aq juq-i mail cavq bhiq cov bhiq nail haoqnao tsaothe thailthaiq nail ngaol.
16 Alheel ngel-i mail, oeqbal noeq pov yaoq. Maq noeq pov haq neq, ngal naol jaol nail bha lavqtsail mail yavq kha lee khi, ngaq nail moeqthaoq lavqkhoel nee dov lee nail thaoma-i mail tsaol-aq al juq bhai genl dev naol.
17 Naqkhaol khal covq nail tsaol-aq, Aqhaqlal Miqyail Khali munl juq bhai ge bhiq-a nail daoq bhai aqmeeq-ai naldaiq yaoq. Gaq lai-a nail tsaol-aq bhai neq, oil-uvq-ai thaq nail maqnav khaqmul khi mail lovmav aqphul teevq heeq ngal bivq naol. Lovmav aqphul al heeq bhai aqmil aqsivq gevq-ai thaq nail ngaol, lovmav al heeq bhai ya-a nail gaq maq ngel haq neq, aqmil al mil bhai teevq gaq-ail maq heeq nia-ail’ ” dai, ge bhiq-a nail ngaol.
Thilyathilla Khali yaq munl bhai bivq-a nail daoq
18 Yeiqsul gaoq ge nail: “Thilyathilla meenq bhai jaol nail Khali yaq munl nail gaqkhoel bhai niailhai gevq bhiq yaoq:
‘Miqyail nail Yaqyov nail maivneev neq, miqjaq miqlail khe-ai dul khi, aivq nail aqkhil neq, poiv haol-ai thaq nail giqheel khe-ai dul nail ngaol. Aivq niailhai ge nail ngaol:
19 Naol nl thail hal thailthaiq nail juq bhai maqkhaiq, goil nail gaiq-a nail phaq aol nail bhai maqkhaiq, neema thaqtsaol nail phaq aol nail bhai maqkhaiq, yu bhai tsaojao-ai nia nail bhai maqkhaiq, oltsaol nail bhai maqkhaiq, ngal heeq kivq naol. Al ovqtavq, niil aq-il naol nl thail hal thailthaiq nail phaq neq, aq-u nl-a hal-a nail nee maqtsil mao jaiq nail bhai iqsanl, ngal heeq kivq naol.
20 Thailhai ngaol-aoq, ngal naoq bhai niailhai oeqbal thaq duq jiav nail ngaol: Yovqgavq bhai yovqgavq Miqyail nail haqbhoil gedan nail tsaol-aq ngaol dai, ge nail Yeiqsaqbheiqlal dai khul nail yaqmai-aq al gaq bhai naol khul teevq phaq iqsanl maq nl bhiq dai, alhai phaiq ha-ai thaq nail ngaol. Aivq cavq nail cov nail al neq, ngaq nail yaqkav juq maq tsaq maq daol nail lavqkhoel khaqmiq sev khi, thaoqphaoq aqma maolkhoel bhai laol bhiq-a nail jaqjaq daoldaol jaq yaoq daol yaoq dai iqsanl, hevq bheeq-a nail ngaol.
21 Naol oeqbal noeq pov yaoq dai, ngal aivq bhai yanq bivq khi ngaol-aoq, aivq khaqmiq sev thailthaiq nail al bhai maq noeq pov-ail.
22 Heldaiq dei-eiq, ngal aivq bhai nal nail goel nail jaol duq bhai bavq bhoel naol. Yeiqsaqbheiqlal nee mail khaqmiq sev thailthaiq nail tsaol-aq, aivq nl nail khe-ai nl nail phaq bhai maq noeq pov haq neq, ngal aqyu juq bhai iqsanl, kav deedee nail khoeq nail jiovq nail lavqkhoel bhai bavq bhoel naol.
23 Ngal yaqmai-aq al gaq nail yaq juq bhai lav heivq naol. Ngal neq, neema khi mail neenoeq needul bhai tseldaiq nail gaq ngel lao thaq nial dai, Khali yaq munl iqsanl mail ya heeq nia naol. Nuljuq-i mail nl-a hal-a nail juq bhai geel-nvq dai, ngal nuljuq bhai teevq gaq khai-aq teevq gaq bhai bivq naol.
24 Thailhai ngaol-aoq, neivq Saqdaq-i mail oil-uvq-ai thaq nail daoqceevq navq deedee nail dai, yu ge nail juq bhai maq heeq nia dai, cavq bhiq cov bhiq-a nail al phaq bhai maq naldaiq dai, Thilyathilla meenq bhai jaol nail yaoq juq yaoq bhai ngal niailhai ge bhiq naol: Ngal nuljuq bhai yalkav yaoq kav yaoq, maq tsiq phi.
25 Ngal yavq kha lee-u kev dai, nuljuq jiav nail phaq bhai, ivqdao dai nieivq thaiq-ai thaq yaoq.
26 Daoq loi loi lai-u kev dai, ngaq nail ganl nl khi gaq lai-a nail tsaol-aq juq bhai, jeq-e jaq-a iqsanl nail kovtavq bhai uvthaiq nail bhaqaoq, ngal bivq naol.
27 Ngaq nail Aqbhu ngaq bhai bhaqaoq bivq lavq-a nail khe-ai, jeq-e jaq-a iqsanl bhai hail nail joiqniovq-i mail aqyu juq uvthaiq khi meldel bhai deeq pav nail khe-ai, deeq pav bhiq nail ngaol.
28 Ngal tsaol-aq al juq bhai, nqhao khe aqbhaq bhaq deedee nail aqgil teevq heeq bivq naol.
29 Naqkhaol khal covq nail tsaol-aq, Aqhaqlal Miqyail Khali yaq munl juq bhai ge bhiq-a nail daoq bhai aqmeeq-ai naldaiq yaoq’ ” dai, ge bhiq-a nail ngaol.