Phaodaiq
Gevq-a nail gaq
Haoqgavq niil keiv nail lavqkhoel bhai liq pov bhee dai, “Yaolhaq ngaol” dai, gevq-ai thaq nail ngaol. Milnee uqnee khe Khali yaq juq iqsanl, Gaqkhoel Yaolhaq-i mail gevq-a nail dai, noeq nail ngaol.
Gevq-a nail aqyanq khi mail aqduq
Gevq-a nail aqyanq neq, A.D. 95-96 kovq nail gaiqlaq bhai ngaol. Gevq-a nail aqduq neq, Bhaqmol dai khul nail eeljaollaol-n bhai gevq-a nail ngaol. Lolmav heeqphaq Doqmiltil heeqphaq jiovq khi uvthaiq thailthaiq nail kov-uvq bhai Khali yaq juq khoeq nail jiovq nail bhai ya daq deedee-a nail ngaol. Heeqphaq Doqmiltil-i mail Yaolhaq bhai, Bhaqmol eeljaollaol-n bhai bhi the ha khi jaol-u phao, Yeiqsul-i mail phaodaiq bhiq-a nail phaq ya moel-a nail khe-ai, gevq-a nail ngaol.
Khaq sil gaq bhai gevq bhiq-a nail
Haoqgavq niil keiv neq, Aqsil-aq milkhaoq bhai jaol nail Khali yaq munl sivq munl bhai taivq-ail maq ngel nail, milkhaoq doi dai jaol khi khoeq nail jiovq nail phaq bhai ya daq nail Khali yaq juq bhai iqsanl, gevq bhiq-a nail ngaol.
Khul bhai noeqthunq khi gevq-a nail
Haoqgavq niil keiv, Khali yaq juq nail haqbhoil khanq sil khi gaoq doevq kovq lal-a nail Heeqphaq Yeiqsul neq, bhaqaoq khi seiqleiq khaoqsail eeq nail lavqkhoel teevq pov gaoq yavq kha lee khi miltsaq bhai uvthaiq lee nail ngaol. Alheel ngel-i mail, Miqyail nail yaq juq Khali bhai genl del nail gaq bhai uqhuq maq thaoq mail, neema ivq khi, aqmeeq aqhaol haol dai doevq yaoq dai, gaq mailma-ail bivq-a nail ngaol. Al ovqtavq, Miqyail Khali yaq munl nail haqbhoil khul lainq-ai thaq nail dai, yaqhao kev lee nail phaq Miqyail-i mail phaodaiq bhiq-a nail phaq gevq-ai thaq nail ngaol.
Neivq heeqphaq neq, Miqyail nail ganl bhai lav tsoiq khi, Khali yaq juq bhai khoeq bhiq jiovq bhiq khi ngaol-aoq, Miqyail Khali yaq juq bhai hevqkovq khi, neivq heeqphaq khi mail aivq nail munl juq bhai neq, yalkhaq dal nail aqn kev lee thailthaiq nail ngaol dai, bhi heeq nia dai iqsanl, gevq-a nail ngaol.
1
Iqmoeq ilmoeq khe daoq
1 Miqyail-i mail Yeiqsul Khali bhai phaodaiq bhiq-a nail, Yeiqsul aivq nail ganl juq haoqgavq niil keiv nail lavqkhoel bhai gevq-ai thaq nail ngaol. Mao-ail maq mao lal mail, pevq lal nail ganl juq aivq nail yaqkav juq bhai bhi heeq bhi moel nail dai khi, Yeiqsul Yaolhaq bhai alhai phaodaiq bhiq-a nail ngaol. Ngal neq, Miqyail nail yaqkav Yaolhaq ngaol. Yeiqsul aivq nail nqtavq gaqkhoel bhai khoel-ai leevq khi, ngaq bhai ganl niil juq bhi heeq bhi moel lavq-a nail ngaol.
2 Miqyail nail daoq khi Yeiqsul Khali-i mail salkhil khanq-ai thaq nail ganl juq bhai, ngal ya moel-a nail khe-ai, salkhil khanq khi gevq-ai thaq nail ngaol.
3 Miqyail nail daoq niil ge daiq bhiq nail juq maqkhaiq, gevq-ai thaq nail daoq juq bhai ya gaiq khi naldaiq nail juq maqkhaiq, geeqlaoq eeq nail ngaol. Khul mail dai ngal-aq neq, khal gevq-ai thaq nail ganl iqsanl, pevq lal nail yanq kev lee-aiq nail ngaol.
Khali yaq munl sivq munl bhai gevq bhiq-a nail ganl
4 Ngaq neq, Yaolhaq ngaol. Aqsil-aq milkhaoq bhai jaol nail Khali yaq munl sivq munl bhai haoqgavq niil gevq bhoel-ai lavq-a nail ngaol. Milnee uqnee iqsanl, niil aq-il iqsanl, doevq khi yaqhao iqsanl, yavq kha lee nail geeqlaoq eeljaol khi neesal-ovq nail phaq maqkhaiq, aivq nail doiqbev bev ma nail sivtavq bhai jaol nail aqhaqlal sivq gaq nail geeqlaoq eeljaol khi neesal-ovq nail phaq, nuljuq nail kovtavq bhai jiav dei-eiq.
5 Saljial ivq nail lavqkhoel nee salkhil khanq nail Yeiqsul Khali nail geeqlaoq eeljaol khi neesal-ovq nail phaq maqkhaiq, nuljuq nail kovtavq bhai jiav dei-eiq. Yeiqsul Khali neq, sil-a nail tsaol-aq nail lavqkhoel bhai iqmoeq ilmoeq doevq kovq lal-a nail gaq pevq nail ngaol. Miltsaq juq khe heeqphaq bhai uvthaiq nail gaq iqsanl pevq nail ngaol. Aivq ngadao bhai gaiq-a nail ngel-i mail, aivq nail aqsivq-i mail, ngadao nail oeqbal phaiq lavq-a nail ngaol.
6 Ngadao aivq nail milkhaoq lavqkhoel bhai heeqphaq pevq lal dai maqkhaiq, aivq nail Aqbhu Miqyail nail Philma jiovq dai maqkhaiq, aivq nl lavq-a nail ngaol. Nqmaq maqluv halyeel aivq nail kovtavq bhai seiqleiq khaoqsail khi uvthaiq nail bhaqaoq jiav dei-eiq. Aqmiq.
7 Heldaiq dei-eiq,
aivq nqdil lavqkhoel nee
yavq kha lee nail ngaol.
Maivneev yaoq neev
yaoq-ao nee khi
aivq bhai geeqkhaoq-i mail
coev-a nail juq,
aivq bhai ya moel nail ngaol.
Miltsaq kovtavq bhai
jaol nail jeq-e jaq-a
iqsanl mail,
aivq bhaqda nee
nioilkhaoq ya khaoq nail ngaol.
Niailhai pevq lal nail ngaol.
Aqmiq.
8 “Ngal neq, Aqlaqphal khi Aolmeiqgal ngaol. Iqmoeq khi haoqnao naosaq gaq ngaol” dai, iqsanl nail kovtavq bhai uvthaiq nail bhaqaoq eeq nail Heeqphaq Miqyail ge nail ngaol. Aivq neq, milnee uqnee, niil aq-il iqsanl doevq khi yaqhao iqsanl, yavq kha lee nail gaq ngaol.
Aqhaqlal lavqkhoel nee Yeiqsul bhai ya moel-a nail ganl
9 Ngal neq, nuljuq nail aqivq jaqbheq Yaolhaq ngaol. Khoeq nail phaq bhai maqkhaiq, Miqyail Milkhaoq bhai maqkhaiq, ol nail phaq bhai maqkhaiq, Yeiqsul nail lavqkhoel ngal nuljuq nee mail daq thailthaiq nail ngaol. Ngal Miqyail nail daoq cavq cavq-ail, Yeiqsul nail ganl salkhil khanq nail bhaqda nee, Bhaqmol dai khul nail eeljaollaol-n bhai bhi nieil-aivq-a nail ngaol.
10 Heeqphaq Miqyail nail aqn n-gaol, ngal Aqhaqlal Miqyail lavqkhoel bhai jaol-u phao, nqbho nail aqthel meel dov-ai leevq nail khe-ai, ngaq nail haoqnao phao kav deedee nail aqthel bhai ngal ya gaiq-a nail ngaol.
11 “Naoq-i mail ya moel-a nail juq, haoqgavq lavqkhoel bhai gevq bhoel khi, Eilpheilsu meenq, Saqmullaqnav meenq, Bheiqlaqgaq meenq, Thilyathilla meenq, Saqdil meenq, Phillaqdeiqphil meenq, Laoqdiqciv meenq, meenq juq bhai jaol nail Khali yaq munl sivq munl bhai oil bhoel gai-aivq bhiq yaoq” dai, aqthel al ge lavq-a nail ngaol.
12 Ngaq bhai daoq ge tsaoq lavq-a nail gaq bhai ya moel dai, ngal haoqnaol naolkovq kovq daiq-u phao, heel nail phalmanq sivq heeq bhai ya moel-a nail ngaol.
13 Phalmanq al juq nail gaoltsi bhai, Tsaol-aq nail Yaqyov khe-ai dul nail tsaol-aq teevq gaq bhai ngal ya moel-a nail ngaol. Tsaol-aq al gaq, cilmeiv phuqlul bhai kev dai phailkhaoq heelma doi khi, aivq nail neema bhai heel nail jiovqpavq pavq-ai thaq nail ngaol.
14 Aivq nail uqhuq khi aivq nail tsailkheel neq, phulleq deel yaol nail aqmevq khi niail khe-ai phul deedee nail ngaol. Aivq nail maivneev neq, miqjaq miqlail khe-ai dul nail ngaol.
15 Aivq nail aqkhil neq, poiv haol-ai thaq nail giqheel khe-ai dul nail ngaol. Aivq daoq ge nail neq, aqthel mao-ail meel nail laoljaol nail aqthel khe-ai dul nail ngaol.
16 Aivq nail lavqmal lavq bhai aqgil sivq heeq nieivq thaiq-ai thaq nail ngaol. Aivq nail moeqthaoq lavqkhoel nee, nvq phao nvq phao-ail, tav deedee nail thaoma teevq keiv dov lee-a nail ngaol. Aivq nail maivphaoq neq, nlma khe-ai nl jeel coev nail ngaol.
17 Ngal aivq bhai ya moel-u phao, sil thaq nail tsaol-aq khe-ai aivq nail aqkhil daoqthaoq bhai ga tsuq ail-a nail ngaol. Aq-u phao, aivq nail lavqmal lavq ngaq nail kovtavq bhai bavq dav khi ge lavq-a nail: “Thaq geesil. Ngal neq, iqmoeq khi, haoqnao naosaq khe gaq ngaol.
18 Doevq thailthaiq nail gaq iqsanl ngel nail ngaol. Ngal sil khi ngaol-aoq, niil aq-il nqmaq maqluv halyeel doevq thailthaiq nail ngaol. Sil nail phaq nail taovq taovqphoil khi sil nail milkhaoq nail taovq taovqphoil ngaq nail aqlavq lavqkhoel bhai aol nail ngaol.
19 Alheel ngel-i mail, moel-a nail juq maqkhaiq, niil aq-il pevq thailthaiq nail juq maqkhaiq, yaqhao pevq lal nail juq maqkhaiq, gevq thaq-ai yaoq.
20 Ngaq nail lavqmal lavq bhai naoq-i mail ya moel-a nail aqgil sivq heeq nail daoqceevq khi, heel phalmanq sivq manq nail daoqceevq neq, niailhai ngaol. Aqgil sivq heeq neq, Khali yaq munl sivq munl nail nqtavq gaqkhoel ngaol. Phalmanq sivq heeq neq, Khali yaq munl sivq munl ngaol” dai, ge lavq-a nail ngaol.