14
Teevq sainv liq meel-nvq liq hinl gaq tsiqeeq nail daoqsel gul nail ganl
1 Ngal heldaiq gai-aivq-u phao, Yaolyaq Yeel-ovq gaoqjaoq bhai thulphaol-nvq thaq nail bhai, ya moel-a nail ngaol. Yaolyaq nee mail tsaol-aq teevq sainv liq meel-nvq liq hinl gaq thulphaol-nvq thaq nail ngaol. Aqyu juq nail neeqthel bhai Yaolyaq nail aqmil khi aivq nail Aqbhu nail aqmil gevq-ai thaq nail ngaol.
2 Aqthel mao-ail meel nail laoljaol khe-ai meel nail aqthel khi, kav deedee nail nqjaiq jaiq nail aqthel khe-ai, nqtavq kovtavq nee aqthel meel dol leevq nail bhai, ngal ya gaiq-a nail ngaol. Aqthel al neq, dil-nvq deeq nail tsaol-aq dil-nvq deeq nail aqthel khe-ai dul nail ngaol.
3 Aqyu neq, doiqbev bev ma nail sivtavq bhai maqkhaiq, aqdoevq phaq liq maol khi joiqmaoq mavmaoq al juq nail sivtavq bhai maqkhaiq, daoq aqsivq phaq nee daoqsel gul thailthaiq nail ngaol. Miltsaq kovtavq nail lavqkhoel khe ul kovq-ai thaq nail tsaol-aq al teevq sainv liq meel-nvq liq hinl gaq maq ngel nail neq, daoq aqsivq phaq nee daoqsel gul nail al, teevq gaq-ail maq gul nia-ail.
4 Tsaol-aq al juq neq, yaqmai-aq juq nee mail maq bheeq maq leel daiq-al. Aqyu juq neq, aqhaol haol dai doevq nail yaqyov-aq juq ngaol. Aqyu juq neq, Yaolyaq khal tsao nail bhai tsaothe jaol nail ngaol. Miqyail khi Yaolyaq nail haqbhoil iqmoeq heeq lee-a nail aqheeq pevq lal dai, aqyu juq bhai tsaol-aq yaq nail lavqkhoel nee ul kovq-ai thaq nail ngaol.
5 Aqyu juq nail moeqthaoq lavqkhoel-ai goiqbhaoq bhaoq nail phaq teevq peivq-ail maq aol-ail, oeqbal thaq duq iqsanl maq jiav-ail.
Nqtavq gaqkhoel hail gaq nail ganl
6 Aq-u phao, nqtavq nail gaoltsi bhai nqtavq gaqkhoel teevq gaq bhail nail bhai, ngal ya moel-a nail ngaol. Aivq neq, milkhaoq yaoq khaoq yaoq-ao nee bhai maqkhaiq, jeq-e jaq-a iqsanl bhai maqkhaiq, khul phaq nail daoq ge nail tsaol-aq bhai maqkhaiq, miltsaq kovtavq bhai jaol nail tsaol-aq iqsanl bhai cavq bhiq nail dai khi, nqmaq maqluv halyeel ivq nail lavqkhiq tsail nail geeqlaoq daoq phi-nq thaq nail ngaol.
7 Aivq mailma-ail aqthel gul kav khi ge nail: “Miqyail bhai geesil khi, aivq bhai ev yaoq. Aivq yalkhaq dal nail aqyanq kev lee-aoq nail ngaol. Nqtavq kovtavq khi miltsaq bhai maqkhaiq, iqyaq iqma khi ulcuvq eelbev dov duq bhai maqkhaiq, al juq bhai teivq-a nail gaq bhai uqhuq thaoq yaoq” dai, gul-a nail ngaol.
8 Nqtavq gaqkhoel nvq gaq teevq gaq, iqmoeq khe gaq nail haoqnao tsaothe tsaothe-ail khi ge nail: “Aqmil dov nail Bhaqbhulloq meenq ga peiv gil-ail nail ngaol. Ga peiv gil-ail nail ngaol. Khul khi mail dai ngal-aq neq, meenq al meenq khaqmiq sev dai, jeq-e jaq-a iqsanl bhai jilpheeq bhi daol-a nail ngaol” dai, gul-a nail ngaol.
9 Nqtavq gaqkhoel hail gaq teevq gaq, al nvq gaq nail haoqnao tsaothe tsaothe-ail, aqthel gul kav khi ge nail: “Haqeiv nail jaiqyaq al maol khi aivq nail maol khoel bhai uqhuq thaoq khi, yovqgavq nail neeqthel bhai maqkhaiq, yovqgavq nail aqlavq bhai maqkhaiq, jaiqyaq al maol nail junq deeq-ai thaq nail khul gaq bhai maqkhaiq,
10 khaoqanq bhai hoel bhoel-ai thaq nail Miqyail nail neema phail nail aqheeq tsilju nail ullul ya daol nail ngaol. Meeq nail haol nail nqtavq gaqkhoel nail sivtavq bhai maqkhaiq, Yaolyaq nail sivtavq bhai maqkhaiq, miqjaq khi miqjal jalheel-i mail, tsaol-aq al juq bhai khoeq dee jiovq deedee bhiq nail ngaol.
11 Aqyu juq bhai khoeq bhiq jiovq bhiq-u phao, dov lal-a nail miqkhoiq al neq, nqmaq maqluv halyeel dav lai nail ngaol. Haqeiv nail jaiqyaq al maol khi aivq nail maolkhoel bhai uqhuq thaoq khi, aivq nail aqmil-i mail, junq deeq-ai thaq nail tsaol-aq, nqkiv n-gaol maqkhaiq, gaqnaq maq ya naq-ail.
12 Alheel ngel-i mail, Miqyail-i mail bivq-a nail daoq naldaiq khi Yeiqsul bhai neema thaqtsaol nail Miqyail nail tsaol-aq juq, oltsaol nail phaq loq nail ngaol” dai, ge nail ngaol.
13 Aq-u phao, nqtavq nee mail aqthel meel dov-ai leevq nail bhai, ngal niailhai ya gaiq-a nail ngaol: “Niailhai gevq yaoq. Niai nee pultavq, Yeiqsul nail lavqkhoel bhai sil-a tsaol-aq geeqlaoq eeq nail ngaol.” Aqhaqlal Miqyail iqsanl ge nail: “Ngel naol. Aqyu juq ganl nl doil hal doil khi gaqnaq ya naq nail ngaol. Khul khi mail dai ngal-aq neq, aqyu juq-i mail nl-a hal-a nail phaq bhai, Miqyail maq nioilpeivq-ail” dai, ge nail ngaol.
Miltsaq kovtavq-ai gov gaiq nail ganl
14 Ngal heldaiq gai-aivq-u phao, phulleq deel nqdil bhai ya moel-a nail ngaol. Tsaol-aq nail Yaqyov khe-ai dul nail teevq gaq, nqdil al bhai jaoldeel-nvq thaq nail ngaol. Aivq neq, heel uqtsaoq tsaoq khi, gaiqaoq aqtav teevq keiv nieivq thaiq-ai thaq nail ngaol.
15 Nqtavq gaqkhoel yaoq gaq yaoq, uqhuq thaoq nail ilkhaol il ma nee dov lee khi, nqdil bhai jaoldeel-nvq thaq nail al gaq bhai gul gul-ail khi ge bhiq nail: “Miltsaq kovtavq-ai gov mi lal-aoq thaq nial. Gov gaiq mao lal-aoq thaq nail ngel-i mail, gaiqaoq oil khi gaiq ail yaoq” dai, ge bhiq-a nail ngaol.
16 Aq-u phao, nqdil bhai jaoldeel-nvq thaq nail al gaq, aivq nail gaiqaoq-i mail miltsaq kovtavq khe gov iqsanl bhai, lav leel khi gaiq gil-a nail ngaol.
17 Nqtavq gaqkhoel yaoq gaq yaoq, nqtavq kovtavq khe uqhuq thaoq nail ilkhaol il ma nee dov lee-a nail ngaol. Aivq iqsanl, gaiqaoq aqtav teevq keiv aol nail ngaol.
18 Aq-u phao, miqjaq nail kovtavq-ai bhaqaoq jiav nail nqtavq gaqkhoel teevq gaq laol duq nee dov lee khi, gaiqaoq aqtav aol nail al gaq bhai gul gul-ail khi ge bhiq nail: “Gaiqaoq aqtav oil khi, miltsaq kovtavq khe aqheeq tsil juq nail dailphul bhai gaiq yaoq. Khul khi mail dai ngal-aq neq, aqheeq tsil juq aqheeq mi lal-aoq thaq nial” dai, ge bhiq-a nail ngaol.
19 Nqtavq gaqkhoel al gaq, aivq nail gaiqaoq-i mail miltsaq kovtavq khe aqheeq tsilju aqheeq iqsanl bhai, gaiq gil gaq-al ngal-aq neq, aqheeq tsilju nail ullul naoq dov duq bhai hoel bhoel-a nail ngaol. Aqheeq tsilju nail ullul naoq dov duq al neq, Miqyail neema phail nail phaq pevq nail ngaol.
20 Aqheeq tsilju nail ullul naoq dov duq al bhai, meenq meenq jail bhai naoq naoq-ail naoq dol-aivq-u phao, aqsivq dov lee-a nail ngaol. Aqsivq al neq, nvq yal lal kev dai deq khi, moeqphaq nail moeqkeivq bhai kev dai, navq nail ngaol.