13
Iqyaq iqma khe haqeiv nail jaiqyaq teevq maol nail ganl
1 Aq-u phao, iqyaq iqma lavqkhoel nee mail haqeiv nail jaiqyaq teevq maol dov lal nail bhai, ngal ya moel-a nail ngaol. Jaiqyaq al maol neq, uqkheel tsel kheel covq khi, uqhuq sivq huq covq nail ngaol. Uqkheel al juq bhai heel uqtsaoq tsel tsaoq tsaoq-nq thaq nail ngaol. Al ovqtavq, Miqyail bhai khal ge movq-ail ge nail aqmil juq aivq nail uqhuq juq bhai, gevq thaq-ai thaq nail ngaol.
2 Ngaq-i mail ya moel-a nail jaiqyaq al maol neq, jaqlaq aqgevq khe-ai dul nail ngaol. Aivq nail aqkhil neq, aqoel nail aqkhil khe-ai dul khi, aivq nail moeqthaoq neq, allaqjaqsil nail moeqthaoq khe-ai dul nail ngaol. Baivyaovq al maol, jaiqyaq al maol bhai bhaqaoq bivq khi, aivq nail doiqbev bev ma bhai jaoldeel nail aqkhaoqanq iqsanl bivq-a nail ngaol.
3 Haqeiv nail jaiqyaq al maol nail uqhuq bhai neq, sil heeq phaq-ail deeq pav-ai thaq nail bhai, ngal ya moel-a nail ngaol. Thailhai ngaol-aoq, malbavq al meeq lai-a nail ngaol. Miltsaq yaq iqsanl mail jaiqyaq al maol bhai, noeq-u maq dov dai pevq-ail khi, aivq nail haoqnao tsaothe-a nail ngaol.
4 Haqeiv nail jaiqyaq al maol bhai bhaqaoq bivq-a nail baivyaovq bhai, aqyu juq uqhuq thaoq-a nail ngaol. Al ovqtavq, aqyu juq haqeiv nail jaiqyaq al maol bhai iqsanl uqhuq thaoq thaoq-ail khi ge nail: “Jaiqyaq niil maol khe-ai khaq sil gaq dul nail-aiq. Khaq sil gaq aivq bhai genl dev tseq nail-aiq” dai, ge nail ngaol.
5 Haqeiv nail jaiqyaq al maol neq, neema eeq nail heel nail daoq ge khi, Miqyail bhai khal ge movq-ail ge-a nail ngaol. Aivq bhai bhala liq tsel-nvq heeq bhee dai, bhi uvthaiq-a nail ngaol.
6 Haqeiv nail jaiqyaq al maol Miqyail bhai maqkhaiq, Miqyail nail aqmil bhai maqkhaiq, Miqyail nail jaol duq bhai maqkhaiq, nqtavq kovtavq bhai jaol nail juq iqsanl bhai maqkhaiq, khal ge movq-ail ge-a nail ngaol.
7 Al ovqtavq, Miqyail nail tsaol-aq juq bhai genl dev gaq nia dai, aivq aqkhaoqanq ya-a nail ngaol. Khul phaq nail jeq-e bhai maqkhaiq, jeq-e jaq-a iqsanl bhai maqkhaiq, khul phaq nail daoq ge nail tsaol-aq juq bhai maqkhaiq, milkhaoq yaoq khaoq yaoq-ao nee bhai maqkhaiq, uvthaiq nail aqkhaoqanq iqsanl, ya-a nail ngaol.
8 Nqtavq khi mail miltsaq maq teivq-u nee mail, aqdoevq bhi doevq nail haoqgavq phaldoiq lavqkhoel bhai aqmil maq gevq bhoel-ai thaq nail tsaol-aq iqsanl mail, haqeiv nail jaiqyaq al maol bhai uqhuq thaoq nail ngaol. Haoqgavq phaldoiq al doiq neq, deeq heivq nail bhai ya daq-a nail Yaolyaq nail haoqgavq phaldoiq ngaol.
9 Naqkhaol khal covq nail tsaol-aq, aqmeeq-ail naldaiq yaoq.
10 Yu bhai bhi
pheel-aivq nail dai khi,
doevq lee-a nail gaq neq,
ya bhi pheel-aivq nail ngaol.
Yu bhai thaoma-i mail
bhi heivq nail dai khi,
doevq lee-a nail gaq neq,
thaoma-i mail heivq nail
bhai ya daq nail ngaol.
Ganl niil bhaqda nee,
Miqyail nail tsaol-aq juq
oltsaol khi
neema thaqtsaol lal nail
loq nail ngaol.
Miltsaq khe haqeiv nail jaiqyaq teevq maol nail ganl
11 A bhai nee ngal-aq, miltsaq nee mail haqeiv nail jaiqyaq yaoq maol yaoq dov lal nail bhai, ngal ya moel-a nail ngaol. Jaiqyaq al maol neq, yaol yaq nail uqkheel khe-ai dul nail uqkheel covq nail ngaol. Thailhai ngaol-aoq, baivyaovq khe-ai daoq ge nail ngaol.
12 Haqeiv nail jaiqyaq niil maol neq, iqmoeq-u khe pov dov lal-a nail jaiqyaq al maol nail bhaqaoq aqsanl oil khi, aivq nail sivtavq bhai yuq-a nail ngaol. Jaiqyaq niil maol neq, sil nail bhai kev dai bhi deeq khi meeq lai-a nail jaiqyaq iqmoeq khe maol bhai, miltsaq yaq iqsanl mail uqhuq thaoq dai, nl-a nail ngaol.
13 Haqeiv nail jaiqyaq nvq maol teevq maol neq, bhi heeq bhi moel nail eeq nail phaq nl daiq bhiq-a nail ngaol. Tsaol-aq nail sivtavq bhai iqsanl nqtavq nee nail miltsaq bhai kev dai, miqjaq bhi ga lee-a nail ngaol.
14 Jaiqyaq iqmoeq khe maol nail sivtavq bhai bhi heeq bhi moel nail mee nia phaq nl daiq bhiq nail bhaqaoq ya-ai thaq nail bhai juq khi, miltsaq kovtavq bhai khal jaol nail tsaol-aq iqsanl bhai hevq bheel-aivq a nail ngaol. “Thaoma-i mail bhi heivq khi ngaol-aoq, maq sil dai doevq nail jaiqyaq iqmoeq khe al maol bhai, thaqeeq thaqheel nail lavqkhoel, jaiqyaq al maol nail maolkhoel lav sav yaoq” dai, miltsaq yaq bhai jaiqyaq nvq maol teevq maol daoq bivq-a nail ngaol.
15 Haqeiv nail jaiqyaq iqmoeq khe maol nail maolkhoel al daoq ge nia lal dai, bhi doevq lal nail bhaqaoq, jaiqyaq nvq maol teevq maol aivq ya-a nail ngaol. Maolkhoel al khoel bhai uqhuq maq thaoq nail tsaol-aq bhai, aivq heivq nail bhaqaoq iqsanl ya-a nail ngaol.
16 Eeq yaq nil yaq juq maqkhaiq, hulmeeq hulbhao juq maqkhaiq, haq nail aoq nail juq maqkhaiq, yaqkav juq maqkhaiq, yaqkav maq ngel nail juq maqkhaiq, lavqmal lavq bhai maq ngel haq neq, neeqthel bhai haqeiv nail jaiqyaq niil maol-i mail junq ya deeq naol dai, ge nail khe-ai, maq deeq dai, teevq gaq-ail maq jel-ail nia-ail.
17 Junq maq deeq-ai thaq nail tsaol-aq teevq gaq iqsanl, yalkav maq ya gaoq maq ya ul dai, haqeiv nail jaiqyaq niil maol lav sav-ai thaq nail ngaol. Junq deeq-ai thaq nail al neq, haqeiv nail jaiqyaq niil maol nail aqmil maq ngel haq neq, aivq nail nanqpav ngaol.
18 Ganl niil heeq kivq dai, neenoeq neekha ya aol nail ngaol. Noeq heeq noeq dov nia nail tsaol-aq neq, haqeiv nail jaiqyaq niil maol nail nanqpav bhai saol-nvq nia nail ngaol. Aivq nail nanqpav neq, tsaol-aq nail nanqpav ngaol. Nanqpav al neq, kovq yal kovq tsel kovq ngaol.