8
Khali yaq nail haqbhoil phul danq nail ganl
1 Aqivq jaqbheq juq-ol, Maqgeiqdaolnil milkhaoq bhai jaol nail Khali yaq munl juq bhai Miqyail geeqlaoq eeljaol bivq nail ganl, nvjuq nuljuq bhai bhi heeq kivq movq-ail nial.
2 Aqyu juq neq, khoeq nail jiovq nail phaq-i mail laonqdaiq nail phaq bhai ya daq khi ngaol-aoq, aqyu juq haq nail aoq nail bhai maq saol-nvq dai, lavqkhiq tsail nail ngel-i mail, maodai danq-a nail ngaol.
3 Aqyu juq khal khi kivq nail khe-ai, danq nail nee ovqtavq, a dai nee maqtsil iqsanl lavqkhiq teevq tsail gaoq danq-a nail ngaol dai, ngal salkhil khanq nail ngaol.
4 “Miqyail nail tsaol-aq bhai tsaojao-ai nia nail geeqlaoq al nvjuq bhai bhi nl lavq yaoq” dai, aqyu juq nvjuq bhai hal deedee nail ngaol.
5 Nvjuq-i mail noeqthunq nail nee maqtsil, aqyu juq nl nail ngaol. Miqyail neema tsaq nail khe-ai, aqyu juq iqmoeq-u nee mail yovqgavq nail aqmaol yovqgavq Yeiqsul bhai av bhiq-a nail nee ovqtavq, nvjuq bhai iqsanl av lavq-a nail ngaol.
6 Alheel ngel-i mail, “Naoq-i mail aqyu juq nail lavqkhoel bhai iqmoeq ilmoeq nl-ai thaq nail khe-ai, geeqlaoq eeq nail ganl al nl gil yaoq” dai, nvjuq Tiltuv bhai hal-a nail ngaol.
7 Nuljuq neq, neema thaqtsaol nail phaq maqkhaiq, ge nail thail nail phaq maqkhaiq, neenoeq neekha maqkhaiq, laijai deedee nail phaq maqkhaiq, nvjuq bhai gaiq-a nail phaq maqkhaiq, mee nia phaq nl bhee thailthaiq nail khe-ai, geeqlaoq eeq nail ganl niilniai iqsanl nl bhee yaoq.
8 Ngal niailhai ge nail neq, daoq bivq nail maq ngel. Ngal yu laijai nail ganl ge-u phao, nuljuq goil nail gaiq-a nail phaq maldil aol nail ngaol dai, dov lal dai, ge nail ngaol.
9 Nuljuq ngadao nail Heeqphaq Yeiqsul Khali nail geeqlaoq eeljaol bhai heeq nia nail ngaol. Aivq hulmeeq meeq khi ngaol-aoq, nuljuq nail haqbhoil haq nail phaq bhai daq-a nail ngaol. Aivq haq nail al bhai daq-a nail ngel-i mail, nuljuq hulmeeq meeq lal-a nail ngaol.
10-11 Ganl niil ngal noeq nail khe-ai, nuljuq bhai ge bhiq nail ngaol dei-eiq. Nuljuq milnee kovq nee nl-ai thaq nail al niil aq-il nl gaq yaoq. Niil neq, nuljuq nail haqbhoil meeq deedee nail ngaol. Aq-u phao neq, nuljuq yu nail iqmoeq-u nee, nl movq nail neema aol nail ngaol. Alhai dul dai, nuljuq khal khi kivq nail khe-ai, haoqnao naosaq bhai kev dai, nl yaoq.
12 Danq movq nail neema aol khi danq haq neq, Miqyail hav bhoel nail ngaol. Maq jiav nail bhai bivq lavq yaoq dai, Miqyail maq ge-ail.
13 Ganl niil nl-u phao, yu nail haqbhoil maq haq khi ngaol-aoq, nuljuq nail haqbhoil haq dai, ngal nl movq nail maq ngel. Teevq gaq khe-ai di dai, nl movq-ail nial.
14 Niil aq-il nuljuq al jaiq jiav nail lavqkhoel aqyu juq maq jiav lovq nail phaq bhai nuljuq tsaojao-ai bhiq nail ngaol. Yaqhao nuljuq maq jiav lovq nail phaq bhai, aqyu juq al jaiq jiav nail lavqkhoel nee nuljuq bhai tsaojao-ai lavq khi, teevq gaq khe-ai di lal nail ngaol.
15 Jalliq lavqkhoel bhai gevq-ai thaq nail khe-ai,
“Maodai gov bhoel-a nail tsaol-aq, al jaiq maq jiav-ail. Micil taivq-ail gov bhoel-a nail tsaol-aq, lovq nail ngaol” dai, gevq-ai thaq nail ngaol.
Tiltuv khi aivq nail ganl nl tsaoq juq nail ganl
16 Ngal nuljuq nail haqbhoil neema kev nail khe-ai, Tiltuv iqsanl neema kev lal dai, Miqyail nl bhiq-a nail ngel-i mail, ngal Miqyail bhai tsiqeeq nail ngaol.
17 Tiltuv neq, nvjuq-i mail gaq bivq nail daoq bhai naldaiq nail nee ovqtavq, aivq neema kev deedee nail ngel-i mail, aivq bhai aivq noeq dov lal bhiq khi nuljuq jaol nail bha lee nail ngaol.
18 Lavqkhiq tsail nail geeqlaoq daoq cavq nia deedee nail ngel-i mail, Khali yaq munl iqsanl mail tsiqeeq nail aqivq jaqbheq teevq gaq iqsanl nvjuq Tiltuv nee mail bhi lee nail ngaol.
19 Aqivq jaqbheq niil gaq neq, “Paolluv nee mail tsaothe jaol nail juq nail haoqnao tsaothe tsaothe-ail geeqlaoq eeq nail phul danq nail ganl niil nl ail yaoq” dai, Khali yaq munl juq-i mail tsel dov khi khoel-ai thaq nail gaq ngaol. Miqyail nail seiqleiq khaoqsail dov lal khi, yu bhai tsaojao-ai bhiq movq nail neema bhaqlaoq kheq dai bhi dov lal nail dai khi, nvjuq ganl niil nl thailthaiq nail ngaol.
20 Khali yaq juq-i mail danq-ai thaq nail, mao-ail mao nail phul al nvjuq oil khi bhoil bhiq ail-u phao, yu nvjuq nail kovtavq bhai oeqbal maq ya thaq dai, yaolphaol nail ngaol.
21 Khul khi mail dai ngal-aq neq, Miqyail nail sivtavq bhai taivq-ail maq ngel nail. Tsaol-aq yaq nail sivtavq bhai iqsanl aqsee aqdaol daol-ai nl kivq dai, nvjuq noeqceiv khi nl thailthaiq nail ngaol.
22 Aqyu nvq gaq nee mail aqivq jaqbheq yaoq gaq yaoq iqsanl nuljuq jaol nail bha bhi lee nail ngaol. Aqivq jaqbheq al gaq bhai mee nia phaq nail lavqkhoel nee, mee nia pov laonqdaiq-a nail ngaol. Aivq neq, neema kev deedee nail teevq gaq ngaol dai, nvjuq ya heeq kivq-a nail ngaol. Aivq nuljuq bhai neema thaqtsaol deedee nail ngel-i mail, niil aq-il neema kev jaiq lal-a nail ngaol.
23 Tiltuv khi mail aqivq jaqbheq niil nvq gaq nail ganl neq, niailhai ngaol. Tiltuv ngaq nail aqtsaoq pevq khi, nuljuq nail haqbhoil ngaq-ai nee mail ganl nl nail tsaol-aq ngaol. Khali yaq munl juq-i mail aqivq jaqbheq niil nvq gaq bhai khoel-ai leevq-a nail ngaol. Aqyu nvq gaq neq, Khali nail seiqleiq khaoqsail bhi dov lal nail tsaol-aq ngaol.
24 Alheel ngel-i mail, nuljuq goil nail gaiq-a nail neema aol-ail nial dai, aqyu juq heeq nia dai, nl bhiq yaoq. Nvjuq-i mail nuljuq nail ganl tsaol-aq niil juq nail sivtavq bhai tsiqeeq-a nail daoq al daoq tsaq lao thaq nial dai, aqyu juq heeq nia dai iqsanl, Khali yaq munl nail sivtavq bhai nl yaoq.