7
1 Ngal mao-ail gaiq-a nail aqtsaoq juq-ol, ngadao saljial al juq bhai ya-ai thaq nail ngel-i mail, ngadao nail aqmaol khi aqhaqlal bhai bhi jiivq bhiq cavq-ail nia nail yaoq phaq yaoq-ao nee bhai tsiqhaol khi, Miqyail bhai ev khi geesil nail lavqkhoel aqmeeq aqhaol haol nail phaq teevq bhee aol dai doevq bhel.
Aqyu juq oeqbal noeq pov-a nail ngel-i mail, Paolluv lavqkhiq tsail nail ganl
2 Neema lavqkhoel nee nvjuq bhai hav lavq yaoq. Nvjuq tsaol-aq teevq gaq bhai iqsanl maq nl laiq-al. Teevq gaq bhai iqsanl maq gaq jaq-al. Teevq gaq bhai iqsanl goiqbhaoq maq bhaoq daiq-al.
3 Ngal nuljuq nail kovtavq bhai oeqbal thaq thaq-ail niailhai ge nail maq ngel-ail. Sil khi ngaol-aoq, teevq gaq khe-ai ya sil dai, doevq khi ngaol-aoq, teevq gaq khe-ai ya doevq dai, nvjuq nail neema lavqkhoel bhai nuljuq bhai gaiq-a-ail nial dai, aq-u phao iqsanl, ngal nuljuq bhai ge bhiq-a nail ngaol.
4 Ngal nuljuq bhai aqmeeq-ai neema thaqtsaol nail ngaol. Nuljuq bhaqda nee ngal neekhaol sil duq jiav nail ngaol. Nuljuq bhaqda nee gaq eeq duq iqsanl jiav nail ngaol. Nvjuq ya daq deedee-u phao iqsanl, maq ge gil tsaol dai ngal lavqkhiq tsail-ail nial.
5 Nvjuq Maqgeiqdaolnil milkhaoq bhai lal kev-u phao, teevq thal-iq gaqnaq naq nail maq dan-ail. Nvjuq yaoq phaq yaoq-ao nee nail lavqkhoel, mao-ail suqsaq nail phaq ya daq nail ngaol. Jaoq jaoq-ai iqdaiq iqtsai dov lal thailthaiq khi, neema lavqkhoel bhai geesil nail phaq iqsanl aol-ail ceevq-a nail ngaol.
6 Thailhai ngaol-aoq, neema cov nail tsaol-aq bhai bhi noeqsal lal nail Miqyail neq, Tiltuv lal kev-u phao, nvjuq bhai bhi noeqsal lal-a nail ngaol.
7 Tiltuv lal kev-a nail ngel-i mail taivq-ail, noeqsal lal-a nail maq ngel-ail. Aivq nuljuq nee mail jaol-u phao, noeqsal-a nail ngel-i mail, nvjuq iqsanl noeqsal-a nail ngaol. Nuljuq ngaq bhai moel movq deedee nail bhai maqkhaiq, pevq jel-ail ceevq-a nail ganl bhai nuljuq khadai noeqhaq nail bhai maqkhaiq, nuljuq ngal jaol nail phao aol movq nail neema kev deedee nail bhai maqkhaiq, aivq ge daiq lavq-a nail ngel-i mail, ngal lavqkhiq tsail jaiq lal-a nail ngaol.
8 Ngaq-i mail nuljuq bhai gevq bhiq-a nail haoqgavq al keiv nuljuq bhai bhi noeqhaq-a nail ngel-i mail, iqmoeq-u phao ngal noeqhaq khi ngaol-aoq, niil aq-il neq, maq noeq haq yaoq-aol. Khul khi mail dai ngal-aq neq, haoqgavq al keiv nuljuq bhai teevq yanq taivq-ail bhi noeqhaq-a nail bhai, ngal ya moel-a nail ngaol.
9 Ngal nuljuq bhai bhi noeqhaq-a nail ngel-i mail, lavqkhiq tsail nail maq ngel-ail. Nuljuq oeqbal noeq pov-u phao kev dai, noeqhaq nail ngel-i mail, lavqkhiq tsail-ail nial. Nvjuq bhaqda nee nuljuq geeqlaoq teevq peivq-ail maq ya sunq-ail dai, nuljuq Miqyail nee mail dov lee-a nail noeqhaq nail phaq bhai ya daq nail ngaol.
10 Miqyail nee mail dov lee-a nail noeqhaq nail phaq neq, hevqkovq nail phaq ya-u phao kev dai, oeqbal noeq pov nail phaq bhi dov lal-a nail ngaol. Alhai bhi dov lal haq neq, noeqhaq noeqaoq nail phaq maq jiav yaoq-aol. Thailhai ngaol-aoq, miltsaq nee mail dov lal-a nail noeqhaq nail phaq neq, sil nail phaq pevq nail ngaol.
11 Miqyail nee mail dov lee-a nail noeqhaq nail phaq neq, neema lavqkhoel bhai khul phaq bhi dov lal nail ngel-ail dai, saol-nvq daiq yaoq. Nuljuq laijai movq deedee nail neema aol lal-aoq nail ngaol laq. “Nvjuq daolcoev dai, nl nail hal nail ngaol” dai, nuljuq ge kovq lavq nail ngaol. Nuljuq neema phail nail phaq maqkhaiq, geesil nail phaq maqkhaiq, ngaq bhai moel movq deedee lal-a nail maqkhaiq, neema kev nail phaq aol lal-a nail maqkhaiq, dal lavq nail phaq maqkhaiq, niil juq nuljuq nail lavqkhoel bhai khadai kev dai, nl dol lavq nail-aiq. Ganl niilniai tavq nail yaoq phaq yaoq-ao nee nail lavqkhoel nuljuq oeqbal maq aol-ail dai, bhaqlaoq kheq dai bhi dov lal-a nail ngaol.
12 Alheel ngel-i mail, ngal nuljuq bhai haoqgavq gevq bhiq-a nail neq, nl laiq-a nail tsaol-aq nail haqbhoil maq ngel-ail. Yu-i mail nl laiq nail bhai ya daq nail tsaol-aq nail haqbhoil iqsanl maq ngel-ail. Miqyail nail sivtavq bhai nuljuq nvjuq nail haqbhoil khadai laijai nail ngel-ail dai, nuljuq heeq nia dai, gevq bhoel-ai leevq-a nail ngaol.
13 Alheel ngel-i mail, nvjuq bhai noeqsal lal-a nail ngaol. Nvjuq noeqsal lal-a nail nee ovqtavq, Tiltuv lavqkhiq tsail nail ngel-i mail, nvjuq a dai nee maqtsil lavqkhiq tsail lal-a nail ngaol. Nuljuq iqsanl mail, aivq bhai bhi noeqsal lal-a nail ngaol.
14 Nuljuq bhai tsiqeeq-a nail daoq ngal Tiltuv bhai ge bhiq-ai thaq nail al, niil aq-il ngal maq ya haqsil-ail. Nvjuq nuljuq bhai yaoq daoq yaoq-ao nee daolcoev dai, ge bhiq-a nail khe-ai, Tiltuv nail sivtavq bhai ngal nuljuq bhai tsiqeeq-a nail al neq, tsaq deedee nail ngaol.
15 Nuljuq iqsanl mail aivq nail daoq naldaiq nail nee ovqtavq, geesil khi aqjuq juq nail lavqkhoel nee aivq bhai hav bhiq-a nail bhai, aivq noeq dov lal-u phao, aivq nuljuq bhai gaiq-a jaiq lal thailthaiq nail ngaol.
16 Yaoq phaq yaoq-ao nee nail lavqkhoel-ai ngal nuljuq bhai neema thaqtsaol kivq nail ngel-i mail, lavqkhiq tsail-ail nial.