17
Paolluv khi Siqlav Theilsaqlolni meenq bhai jaol-u phao khe ganl
1 Paolluv khi Siqlav neq, Aqphilbhaollil meenq khi Aqphaollaolnil meenq nee ail gai-aivq khi, Theilsaqlolni meenq bha ail kev-a nail ngaol. Meenq al meenq nail lavqkhoel bhai, Yuldav nail tsaol-aq nail uqhuq thaoq nail ilkhaol teevq il jiav nail ngaol.
2 Paolluv neq, yaoq pov yaoq-ao khe-ai, uqhuq thaoq nail ilkhaol bha lai-a nail ngaol. Jaol n hail jao kev dai, aqyu juq nee mail Jalliq nail ganl ge tsaoq pheeljaq-a nail ngaol.
3 Jalliq lavqkhoel bhai gevq-ai thaq nail ganl aqyu juq bhai ge bhiq khi, Khali sil khi gaoq doevq kovq lal-a nail neq, maq pevq lal-ail maq khi kivq nail ganl teevq phaq ngaol dai, aqduq aqtsil tsil dai, cavq bhiq-a nail ngaol. “Ngaq-i mail nuljuq bhai ge bhiq thailthaiq nail Yeiqsul neq, Khali ngaol” dai, Paolluv ge bhiq-a nail ngaol.
4 A bhai jaol nail Yuldav nail tsaol-aq teevq pav ganav juq neema thaqtsaol lal khi, Paolluv khi Siqlav nee mail jil lai-a nail ngaol. Miqyail bhai uqhuq thaoq nail Heiqlaqsal tsaol-aq maodai khi, maivphaoq nal moel jiav nail yaqmai-aq maodai gaq iqsanl, neema thaqtsaol lal-a nail ngaol.
5 Thailhai ngaol-aoq, Yuldav tsaol-aq nail aqivq aqtsu juq neekhaol maq sil nail ngel-i mail, yaqjaoq khaqlal miqthoi juq bhai deeq jil khi munl teevq munl munl dov khi, meenq meenq lao-ail suqsaq lal dai, nl-a nail ngaol. Paolluv khi Siqlav aqyu nvq gaq milkhaoq yaq nail sivtavq bhai hevq dol leevq nail haqbhoil, Yaqsoq nail ilkhaol bhai aqyu juq lovq jaoq ail-a nail ngaol.
6 Thailhai ngaol-aoq, aqyu nvq gaq bhai maq halpov moel nia nail ngel-i mail, Yaqsoq khi neema thaqtsaol nail tsaol-aq teevq pav ganav juq bhai, meenq bhai uvthaiq nail yovkav juq jaol nail bha hel-aivq khi, niailhai ge bhiq lai-a nail ngaol: “Miltsaq thaoqkhaol bhai pov lav phal lal heeq phaq-ail lav suqsaq nail tsaol-aq juq, meenq niil meenq bhai kev lee-aoq thaq nail ngaol.
7 Yaqsoq-i mail aqyu juq bhai aivq nail ilkhaol bhai tsu-ai thaq nail ngaol. Yeiqsul dai khul nail heeqphaq teevq gaq jaol nail ngaol dai, aqyu juq ge nail ngel-i mail, heeqphaq Gailsaq-i mail bivq-ai thaq nail daoq juq bhai lav luq lav seil nail phaq pevq nail ngaol” dai, ge bhiq-a nail ngaol.
8 Aqyu juq alhai ge ge-ail khi, tsaol-aq munl munl ma khi meenq bhai uvthaiq nail yovkav juq bhai lav suqsaq nail ngaol.
9 Yovkav al juq Yaqsoq khi aivq nail aqtsaoq juq bhai phul bhi dov khi phaiq kovq bhiq-a nail ngaol.
Bheiqlil meenq bhai Miqyail nail daoq cavq bhiq-a nail ganl
10 Nqkivq kivq ail-al ngal-aq neq, aqivq jaqbheq Khali yaq juq Paolluv khi Siqlav bhai Bheiqlil meenq bhai teevq pov taivq-ail bhi ail-a nail ngaol. Aqyu nvq gaq a bhai ail kev-u phao, uqhuq thaoq nail ilkhaol bha lai-a nail ngaol.
11 A bhai jaol nail Yuldav nail tsaol-aq al juq neq, Theilsaqlolni meenq bhai jaol nail tsaol-aq nee maq tsil neema meeq khi, Miqyail nail daoq bhai neema kev nail lavqkhoel nee hav bhoel nail ngaol. Ganl al tsaq-ail laiq, maq tsaq-ail laiq dai, ya heeq kivq dai, aqyu juq yaoq n yaoq n nee Jalliq aqmeeq-ai ge nail ngaol.
12 Alheel ngel-i mail, aqyu juq nail lavqkhoel khe tsaol-aq maodai gaq Yeiqsul bhai neema thaqtsaol lal-a nail ngaol. Maivphaoq nal moel jiav nail jeq-e jaq-a Heiqlaqsal yaqmai-aq juq khi yaqyov-aq maodai gaq iqsanl, neema thaqtsaol lal-a nail ngaol.
13 Paolluv Bheiqlil meenq bhai Miqyail nail daoq cavq bhiq nail geiq dai, Theilsaqlolni meenq bhai jaol nail Yuldav nail tsaol-aq juq heeq nia-a nail ngaol. Aq-u phao, aqyu juq a bhai ail khi, tsaol-aq munl munl ma bhai neema lav phail khi mail bhi suqsaq lal-a nail ngaol.
14 Aq-u phao aqivq jaqbheq Khali yaq juq, teevq pov taivq-ail Paolluv bhai iqyaq iqma jiav nail phao bhi ail-a nail ngaol. Thailhai ngaol-aoq, Siqlav khi Tilmolseiq neq, a bhai jaol-ail ceevq-a nail ngaol.
15 Paolluv bhai hevq ha ail-a nail juq, Aqtheiq meenq bha kev dai, hevq ha ail khi kovq lai-a nail ngaol. “Siqlav khi Tilmolseiq bhai, ngal jaol nail bha lavqtsail mail lee-oq dai, cavq bhiq lai dei-eiq” dai, Paolluv aqyu juq bhai ge bhiq-a nail ngaol.
Paolluv Aqtheiq meenq bhai Miqyail nail daoq cavq bhiq-a nail ganl
16 Aqtheiq meenq bhai Siqlav khi Tilmolseiq aqyu nvq gaq bhai Paolluv daonq thailthaiq-u phao, meenq al meenq nail lavqkhoel thaoqphaoq aqma nail maolkhoel teevq bhee jiav nail bhai ya moel khi, neema maq sal-ail.
17 Alheel ngel-i mail, aivq uqhuq thaoq nail ilkhaol lavqkhoel bhai Yuldav nail tsaol-aq khi Miqyail bhai uqhuq thaoq nail yu nail jeq-e bhai maqkhaiq, yaoq n yaoq n nee leiv bhai khal thaoqphuq lee nail tsaol-aq bhai maqkhaiq, ge tsaoq pheeljaq-a nail ngaol.
18 Aq-u phao, Ilphilgaolluv aol thaoq nail juq khi Saqdaol-il aol thaoq nail, neenoeq neekha mao-ail aol nail juq, Paolluv nee mail ge tsaoq pheeljaq nail ngaol. Aqyu juq teevq pav ganav juq ge nail: “Yu nail daoq gaq gov khi ge ge-ail tsao nail tsaol-aq niil gaq, khul dai ge movq nail ngel-ail” dai, ge nail ngaol. Paolluv neq, Yeiqsul nail ganl khi doevq kovq lal nail ganl cavq bhiq cov bhiq nail ngel-i mail, teevq pav ganav juq ge nail: “Aivq neq, yaoq khaoq yaoq mil yaoq khe miqyail juq nail ganl cavq cavq-ail tsao nail tsaol-aq niil” dai, ge nail ngaol.
19 Aq-u phao, aqyu juq Paolluv bhai khul khi, Aqleiq gaoqjaoq bha hevq dal lai khi ge nail: “Naol cavq bhiq cov bhiq thailthaiq nail ganl aqsivq thoil, nvjuq bhai iqsanl micil cavq lavq cov lavq yaoq.
20 Khul khi mail dai ngal-aq neq, nvjuq-i mail maq gaiq maq moel daiq-a nail phaq naol cavq lavq cov lavq-a nail ngaol. Al juq khul bhai ge movq nail ngel-ail dai, nvjuq heeq kivq movq-ail nial” dai, aqyu juq ge bhiq-a nail ngaol.
21 Aqtheiq meenq bhai jaol nail tsaol-aq iqsanl mail maqkhaiq, yu nail milkhaoq nee lal khi a bhai jaol nail juq maqkhaiq, niil aq-il bhai sivq thail phaoq dai, kev lee thel lee thailthaiq nail ganl juq ge pheeljaq khi, naldaiq pheeljaq nail bhai taivq-ail aqyanq bhi gil nail ngaol.
22 Aq-u phao, Aqleiq gaoqjaoq bhai maoqbhaoq nl nail munl nail gaoltsi bhai Paolluv thulphaol khi, niailhai ge nail: “Aqtheiq meenq bhai jaol nail tsaol-aq juq-ol, yaoq phaq yaoq-ao nail lavqkhoel nee uqhuq thaoq nail aolsaolkovq bhai thaqeeq deedee nail bhai, ngal ya moel-a nail ngaol.
23 Khul khi mail dai ngal-aq neq, meenq niil meenq bhai doi doi dai, ngal tsao daiq-u phao, nuljuq uqhuq thaoq nail jaol duq bhai iqsanl heldaiq-u phao, ‘Nvjuq maq heeq kivq nail Miqyail teevq gaq nail haqbhoil’ dai, gevq-ai thaq nail laol duq teevq dao moel-a nail ngaol. Nuljuq maq heeq nia khi ngaol-aoq, uqhuq thaoq thailthaiq nail al neq, niil aq-il ngal nuljuq bhai cavq bhiq lee-a nail niil ngaol.
24 Miltsaq khi miltsaq kovtavq bhai khal jaol khal jiav nail yaoq phaq yaoq-ao nee bhai teivq-a nail Miqyail neq, nqtavq kovtavq khi miltsaq kovtavq bhai uvthaiq nail Heeqphaq ngaol. Aivq neq, tsaol-aq-i mail cov-a nail uqhuq thaoq nail ilkhaol bhai jaol nail maq ngel-ail.
25 Ngadao tsaol-aq yaq-i mail heldaiq lav sav bhiq khi nl tsu bhiq nail phaq bhai iqsanl, aivq maq loq-ail. Khul khi mail dai ngal-aq neq, tsaol-aq yaq iqsanl bhai, doevq nail phaq, aqhaq gaol nia nail phaq khi, yaoq phaq yaoq-ao nee bivq nail gaq neq, Miqyail ngaol.
26 Miltsaq kovtavq bhai doidoi-ai jaol dai, aivq tsaol jeq-e yaoq jeq-e yaoq-ao nee bhai, tsaol-aq teevq gaq nail lavqkhoel nee teivq-ai thaq nail ngaol. Aqyu juq nail haqbhoil tselpav bhoilpav nia nail yanq yaqlao maqkhaiq, aqyu juq ya jaol nail milkhaiq bhai maqkhaiq, aivq bhoilpav-ai thaq nail ngaol.
27 Miqyail bhai lavqheiv heiv heiv-ail halpov haq neq, heiv yaq khi halpov moel nia dai, alhai teivq-ai bhiq thaq nail phaq pevq nail ngaol. Alhai ge khi ngaol-aoq, Miqyail neq, ngadao nee eqyal bha jaol nail maq ngel-ail.
28 Khul khi mail dai ngal-aq neq, Miqyail bhaqda nee, ngadao aqdoevq ya doevq nail nee ovqtavq, luv kivq lav kivq khi jaol kivq nail ngaol. Nuljuq nail tsiqeeq nail daoqkhaoq tsiqeeq nail tsaol-aq-i mail tsiqeeq nail khe-ai,
‘Ngadao neq, Miqyail nail yaq ngaol.’
29 Ngadao neq, Miqyail nail yaq pevq nail ngel-i mail, Miqyail neq, tsaol-aq nail neenoeq neekha-i mail noeq dov khi nl nia nail phaq-i mail lav sav-ai thaq nail heel nail maolkhoel, phul nail maolkhoel, lovmav nail maolkhoel niil juq khe-ai dul nail ngaol dai, ngadao noeq nail maq tsaq-ail.
30 Jel lal-u phao, tsaol-aq-i mail maq heeq nia-ail nl jel lavq-a nail juq bhai, Miqyail maq noeq thaq-ail. Thailhai ngaol-aoq, niil aq-il yaoq dao yaoq-ao nee jaol nail tsaol-aq iqsanl mail, ‘Oeqbal noeq pov yaoq’ dai, Miqyail daoq bivq-ai thaq nail ngaol.
31 Khul khi mail dai ngal-aq neq, aivq-i mail tsel dov-ai thaq nail gaq bhai juq khi, miltsaq yaq bhai tsaq nail daol nail lavqkhoel nee yalkhaq dal nail dai, ge ceiv-ai thaq nail aqn jiav nail ngaol. Miqyail-i mail al gaq bhai tsel dov-ai thaq nail ngaol dai, tsaol-aq iqsanl mail maldil heeq nia dai, Miqyail aivq bhai bhi doevq kovq lal-a nail ngaol” dai, Paolluv ge bhiq-a nail ngaol.
32 Doevq kovq lal nail ganl aqyu juq ya gaiq-u phao, tsaol-aq teevq pav ganav juq aivq bhai khal ge movq-ail ge nail ngaol. Thailhai ngaol-aoq, teevq pav ganav juq ge nail: “Naoq-i mail ge nail ganl thoil, yaqhao teevq pov gaoq naldaiq movq-ai haq nail ngaol” dai, ge nail ngaol.
33 A bhai nee ngal-aq, Paolluv aqyu juq nail lavqkhoel nee dov ail-a nail ngaol.
34 Tsaol-aq teevq pav ganav juq, Paolluv nail haoqnao tsaothel-aivq khi, Yeiqsul bhai neema thaqtsaol lal-a nail ngaol. Tsaol-aq al juq nail lavqkhoel khe, Daqyaolnaqsil dai mil-ai thaq nail Aqleiq gaoqjaoq bhai maoqbhaoq nl nail munl lavqkhoel bhai jaol nail teevq gaq aol nail ngaol. Daqmaqlil dai mil-ai thaq nail yaqmai-aq teevq gaq khi yaoq juq yaoq iqsanl, aol nail ngaol.