16
Paolluv khi Siqlav nee mail Tilmolseiq ail-a nail ganl
1 A bhai nee ngal-aq, Paolluv Deiqbheiq meenq khi Luldaqlal meenq bhai ail-a nail ngaol. Luldaqlal meenq bhai Tilmolseiq dai, khul nail Khali yaq teevq gaq jaol nail ngaol. Aivq nail aqma neq, Yuldav nail jeq-e Khali yaq pevq nail ngaol. Thailhai ngaol-aoq, aivq nail aqbhu neq, Heiqlaqsal jeq-e pevq nail ngaol.
2 Luldaqlal meenq khi Ilgaolnil meenq bhai jaol nail Khali yaq juq nail lavqkhoel, Tilmolseiq neq, aqmil meeq nail teevq gaq ngaol.
3 Paolluv neq, Tilmolseiq bhai hevq khi tsao movq nail ngel-i mail, bavkov uqjaq oev bhiq-a nail ngaol. A bhai jaol nail Yuldav nail tsaol-aq iqsanl mail, Tilmolseiq nail aqbhu neq, Heiqlaqsal nail jeq-e pevq nail ganl bhai heeq nia gil nail ngel-i mail, alhai bavkov uqjaq oev bhiq-a nail phaq pevq nail ngaol.
4 Aqyu juq teevq meenq khi-aq teevq meenq bhai ail khi, neema thaqtsaol nail tsaol-aq juq bhai, Yeiqlulsaqlaiq meenq bha jaol nail gaqkhoel juq khi aqivq aqtsu juq-i mail ge ceiv-a nail daoq al juq bivq khi, daoq al juq bhai tsaothe dai, cavq bhiq cov bhiq-a nail ngaol.
5 Alheel ngel-i mail, Khali yaq munl juq neema thaqtsaol nail phao gaq kav jaiq lal khi, teevq n nee teevq n tsaol-aq mao lal thailthaiq nail ngaol.
Aqhaqlal nail lavqkhoel Maqgeiqdaolnil tsaol-aq bhai moel-a nail ganl
6 Aqsil-aq milkhaoq bha geeqlaoq daoq maq ya cavq-ail dai, Meeqnail Haolnail Aqhaqlal aqyu juq bhai lav tsoiq nail ngel-i mail, Phulgil milkhaoq khi Gaqlaqtil milkhaoq bha aqyu juq lai-a nail ngaol.
7 Mulsil milkhaoq nail milkhaiq bhai lai kev-u phao, Bheiqthulnil milkhaoq bha aol lai nail dai, noeq khi ngaol-aoq, Yeiqsul nail Aqhaqlal aqyu juq bhai maq bhi aol lai-al.
8 Alheel ngel-i mail, Mulsil milkhaoq nail iljail nee ail pav gai-aivq khi, Daqlol meenq bha ail kev-a nail ngaol.
9 Aq-u nqkiv, Aqhaqlal lavqkhoel nee Paolluv niailhai ya moel-a nail ngaol. Maqgeiqdaolnil tsaol-aq teevq gaq thulphaol lee khi, “Maqgeiqdaolnil milkhaoq bha lal khi, nvjuq bhai teevq pov tsaojao-ai lal lavq yaoq” dai, hal leevq-a nail bhai, aivq ya moel-a nail ngaol.
10 Aqhaqlal lavqkhoel nee Paolluv alhai ya moel gaq-al ngal-aq neq, Maqgeiqdaolnil milkhaoq bhai lai nail haqbhoil nvjuq teevq pov taivq-ail lainq-a nail ngaol. Khul khi mail dai ngal-aq neq, a bhai jaol nail tsaol-aq juq bhai lavqkhiq tsail nail geeqlaoq daoq bhi cavq lai nail haqbhoil, Miqyail nvjuq bhai khul lee thaq nail ngaol dai, nvjuq noeqceiv-a nail ngaol.
Pillilpiv meenq bhai jaol nail Luldil ulcuvq saol-a nail ganl
11 Nvjuq Daqlol meenq nee Saqmoqdaqlail eeljaol laol-n bhai daolcoev dai, laovq jeeq khi, niaohao n-gaol Naqbhaollil meenq bhai ail kev-a nail ngaol.
12 A bhai nee ngal-aq, nvjuq Pillilpiv meenq bhai lai-a nail ngaol. Meenq al meenq neq, Lolmav tsaol-aq uvthaiq nail Maqgeiqdaolnil milkhaoq lavqkhoel bhai yu nee maqtsil eeq nail meenq pevq nail ngaol. A bhai nvjuq mee nia n jaol-a nail ngaol.
13 Jaol n kev lal-u phao, nvjuq meenq lavqniil phao dov ail khi, Yuldav nail tsaol-aq juq jil lai khi geeqlaoq hal nail jaol duq teevq dao ganav moel lee-ail jaol-aq dai noeq khi, laoljaol daolbhaq bhai ail-a nail ngaol. Nvjuq jaoldeel khi, a bhai jil lai khi jaol nail yaqmai-aq juq bhai cavq bhiq cov bhiq-a nail ngaol.
14 Thilyathilla meenq bhai jaol khi aqphoiq phoiq deedee nail nel nav nav nail haqphal gaoq nail Luldil dai mil-ai thaq nail yaqmai-aq teevq gaq iqsanl, nvjuq cavq bhiq cov bhiq nail bhai naldaiq nail ngaol. Aivq neq, Miqyail bhai uqhuq thaoq nail yaqmai-aq teevq gaq pevq khi, Paolluv-i mail cavq bhiq cov bhiq nail bhai aqmeeq-ai naldaiq dai, Miqyail-i mail aivq nail neema lolgov phao bhiq-a nail ngaol.
15 Aivq khi aivq nail miqsaol yaq iqsanl mail ulcuvq saol gaq-u phao, “Ngal neq, Yeiqsul bhai maldil neema thaqtsaol nail tsaol-aq pevq-ail nial dai, nuljuq noeqceiv gaq haq neq, ngaq nail ilkhaol bha yavq lal yaoq” dai ge khi, nvjuq bhai aivq nail ilkhaol bha maq gavq maq nav-ail hevq dal laivq lavq-a nail ngaol.
Paolluv khi Siqlav Pillilpiv nail thaonq bhai ya aol-a nail ganl
16 Teevq n neq, nvjuq uqhuq thaoq nail jaol duq bhai ail thailthaiq-u phao, maivmaol maol nia nail neivq aol nail yaqmiq yaqkav teevq gaq thaoqphuq-a nail ngaol. Yaqmiq al gaq maivmaol maol nail phul maodai ya nail ngel-i mail, aivq nail ilheel juq hulmeeq meeq lal-a nail ngaol.
17 Yaqmiq al gaq nvjuq nail haoqnao tsaothel leevq khi, “Tsaol-aq niil juq neq, eeq dee heel deedee nail Miqyail nail yaqkav pevq khi, nuljuq hevqkovq nail phaq ya nia nail gailkhaol cavq gaiq lee-a nail ngaol” dai, gul gul-ail khi tsaothe jaol nail ngaol.
18 Aivq alhai gul gul-ail tsaothe jaol nail mee nia n bhee lal-aoq nail ngel-i mail, Paolluv maq oltsaol lal bhiq khi, haoqnaol tsiq phaol khi, neivq al maol bhai, “Aivq nail lavqkhoel nee dov ail yaoq dai, Yeiqsul Khali nail aqmil kov-uvq nee, ngal naoq bhai daoq bivq nail ngaol” dai, ge bhiq-u phao, neivq al maol yaqmiq al gaq nail lavqkhoel nee teevq pov taivq-ail dov ail-a nail ngaol.
19 Yaqmiq al gaq nail ilheel juq neq, aqyu juq phul maq ya kivq yaoq-aol dai, heeq nia khi, Paolluv khi Siqlav aqyu nvq gaq bhai nieivq khi, milkhaoq yaq juq jil lai duq bhai aqivq aqtsu juq nail sivtavq bhai he khi ail-a nail ngaol.
20 Meenq bhai heldaiq nail Lolmav nail yovkav juq nail sivtavq bhai aqyu nvq gaq nail ganl, niailhai ge bhiq-a nail ngaol: “Tsaol-aq niil nvq gaq neq, Yuldav nail tsaol-aq pevq khi, ngadao nail meenq bhai lav suqsaq lee-a nail ngaol.
21 Ngadao nail aolsaolkovq bhai bheeq nail aol juq bhai tsaothe dai, aqyu nvq gaq cavq nail cov nail ngaol. Ngadao Lolmav milkhaoq yaq juq, aol niil juq bhai maq hav bhoel kivq-ail” dai, ge bhiq-a nail ngaol.
22 Tsaol-aq munl munl ma iqsanl, Paolluv khi Siqlav nail kovtavq bhai oeqbal thaq deedee nail ngaol. Lolmav nail yovkav al juq neq, “Aqyu nvq gaq nail aqgaq aqdoi he loev khi, neeqtsaq-i mail deeq yaoq” dai, daoq bivq-a nail ngaol.
23 Mailma-ail deeq nal deeq goel bhiq gaq-u phao, thaonq bhai nieivq bhoel bhiq khi, aqyu nvq gaq bhai aqmeeq-ai lovq nail haqbhoil, thaonq bhai heldaiq nail gaq bhai, daoq bivq-a nail ngaol.
24 Lolmav Yovkav juq-i mail daoq bivq-ai thaq nail khe-ai, thaonq bhai heldaiq nail al gaq, aqyu nvq gaq bhai lavqkhoel khe jiav nail gaoltsi khe thaonq bhai laol-ai thaq nail ngaol. Aqkhil dailpav bhai taovq thaiq khi bhi jaol-a nail ngaol.
25 Hul-iq tsil lee-u phao, Paolluv khi Siqlav geeqlaoq hal khi, Miqyail bhai gul gul-ail tsiqeeq-a nail ngaol. Thaonq bhai aol nail juq, aqyu nvq gaq nail daoq bhai naldaiq thailthaiq nail ngaol.
26 Thaiqphuq dai, milluv luv deedee lal khi, thaonq nail daoqthaoq daoqphul bha kev dai luv lal khi, lolgov iqsanl phao gil-ail khi, thaonq bhai aol nail tsaol-aq juq bhai pheethaiq-ai thaq nail hailcav iqsanl mail, ga loev gil-a nail ngaol.
27 Thaonq bhai heldaiq nail gaq tsaoqnoeq lal-u phao, thaonq lolgov phao ha-ai thaq khi jiav nail bhai ya moel-u phao, thaonq bhai nieivq bhoel-ai thaq nail tsaol-aq juq tsaoq dov gil-aoq thaq nial dai dul khi, thaoma gaol dov khi yovqgavq bhai yovqgavq heivq nail dai khi ngaol.
28 Aq-u phao, Paolluv mailma-ail gul khi ge bhiq-a nail: “Naoq nail aqmaol bhai khul teevq phaq iqsanl thaq khi. Nvjuq iqsanl mail niai jaol gil-ai haq naol” dai, ge bhiq-a nail ngaol.
29 Aq-u phao, thaonq bhai heldaiq nail gaq, “Miqjaq khel leevq yaoq” dai, gul khi, thaonq lavqkhoel bhai tsaoq bhoel-aivq khi, geesil nail aqjuq juq-ai bhiq nail lavqkhoel nee, Paolluv khi Siqlav aqyu nvq gaq nail aqkhil daoqthaoq bhai peevqceevq kovdoiq doiq khi gaolbeiv-a nail ngaol.
30 A bhai nee ngal-aq, aqyu nvq gaq bhai lavqniil phao hevq dol leevq khi ge bhiq-a nail: “Saqlaq-ol, hevqkovq nail phaq yaq kivq dai, ngal khalhai ya nl nail-aiq” dai, naldaiq bhiq-a nail ngaol.
31 Aqyu nvq gaq ge bhiq-a nail: “Heeqphaq Yeiqsul bhai neema thaqtsaol yaoq. Thaqtsaol haq neq, naol khi naoq nail miqsaol yovyaq iqsanl, hevqkovq nail phaq ya nail ngaol” dai, ge bhiq-a nail ngaol.
32 A bhai nee ngal-aq, aivq khi aivq nail ilkhaol lavqkhoel bhai khal jaol nail tsaol-aq iqsanl bhai, aqyu nvq gaq Miqyail nail daoq cavq bhiq cov bhiq-a nail ngaol.
33 Aq-u nqkiv, thaonq bhai heldaiq nail al gaq, aqyu nvq gaq bhai hel-aivq khi, malyal malkhoeq tsiqhaol bhiq-a nail ngaol. A bhai nee ngal-aq, aivq khi aivq nail miqsaol yovyaq iqsanl mail, teevq pov taivq-ail ulcuvq saol-a nail ngaol.
34 Paolluv khi Siqlav aqyu nvq gaq bhai aivq nail ilkhaol bha hevq bhoel-aivq khi, bhi jaq bhi daol-a nail ngaol. Aivq khi aivq nail miqsaol yovyaq juq lavqkhiq tsail deedee nail ngaol. Khul khi mail dai ngal-aq neq, aqyu juq iqsanl, Miqyail bhai neema thaqtsaol lal-a nail ngel-i mail ngaol.
35 Nqbhaq bhaq lal-u phao, Lolmav nail yovkav juq-i mail aivq nail yaqkav juq bhai daoq bivq khi, “Tsaol-aq al nvq gaq bhai phaiq bhiq yaoq” dai, bhi cavq gaiq ail-a nail ngaol.
36 Alheel ngel-i mail, thaonq bhai heldaiq nail al gaq, Paolluv bhai ge bhiq-a nail: “Siqlav nul-nq nvq gaq bhai phaiq nail haqbhoil Lolmav nail yovkav juq nail daoq ge-ai leevq-ao nail ngaol. Alheel ngel-i mail, dov lal khi neesal-ovq nail lavqkhoel, kovq lai yaoq” dai, ge bhiq-a nail ngaol.
37 Thailhai ngaol-aoq, Paolluv aqyu juq bhai ge bhiq-a nail: “Nv-nvq gaq Lolmav milkhaoq yaq pevq khi, nv-nvq gaq nail laiq nail tsa nail teevq phaq iqsanl maq halpov moel-a nail bhai, milkhaoq yaq nail sivtavq-ai nv-nvq gaq bhai deeq khi thaonq bhai laol lavq-a nail ngaol. Thailhai ngaol-aoq, niil thal khe pov neq, yu bhai maq bhi heeq nia mail, nv-nvq gaq bhai aqtsi tsu dai phaiq khi bhi kovq lai nail khi laiq. Thailhai maq khi kivq-ail. Lolmav nail Yovkav juq lee khi, yu bhai iqsanl bhi moel khi, nv-nvq gaq bhai bhi phaiq dov lee nail maq ngel nail neq, maq ya ail” dai, ge bhiq-a nail ngaol.
38 Lolmav nail yaqkav al juq, aqyu juq nail yovkav juq bhai Paolluv-i mail ge nail daoq al juq ge bhiq lai-a nail ngaol. Paolluv khi Siqlav aqyu nvq gaq Lolmav milkhaoq yaq pevq nail ganl bhai heeq nia-u phao, geesil lal bhiq-a nail ngaol.
39 Alheel ngel-i mail, aqyu juq ail khi, aqyu juq-i mail laiq ail-a nail ganl ge khi aqyu nvq gaq bhai thaoq hal nail ngaol. A bhai nee ngal-aq, aqyu nvq gaq bhai phaiq bhiq khi, thaonq nee hevq dol-aivq bhiq khi mail, “Meenq niil meenq nee dov ail lavq yaoq” dai, hal-a nail ngaol.
40 Paolluv khi Siqlav thaonq nee dov ail khi, Luldil nail ilkhaol bha lai-a nail ngaol. Neema thaqtsaol nail tsaol-aq al juq bhai thaoqphuq khi gaq bivq-a nail ngaol. A bhai nee ngal-aq, meenq al meenq nee mail aqyu nvq gaq dov ail-a nail ngaol.