23
David: Wina Apurka winaka waitui timiauri
1 Wina Apurka uwija wainua nunisang winaka waitui.
Tura asamtai wisha yuumakchatatjai.
2 Uwijan wainin ni uwijarin chirichrin yuwarat tusa weka wekaaka ayamsarti tusa,
nunia mikinnum juwawa nunisang wina Apursha winasha ayamtikrurtinuitai.
Tura yumin umurarat tusa,
uwija wainin ni uwijarin entsa miaakunam juwawa nunisang wina Apurka yuumamurnasha surustinuitai.
3 Tura nintirnasha
kakamtikrurtinuitai.
Tura ni naarin pachisar:
Yuska nekas juuntaitai tiarat tusa,
nekas pengker jintanam wekaasat tusa winaka nintimtikrurtinuitai.
4 Apuru wijai tuke puju asam,
uwijan wainin ni uwijarin ayamruktas numichin tura shukrutin takus naka wajawa nunismek winasha ayamrutkatasam waitkatnuitme.
Tura asakmin jakatin ayatnak,
tura wait wajaktin ayatnak shamkashtinuitjai.
5 Wina nemasur ainau jimia wajainai wainiatmek,
ame pengker aa nu surusuitme.
Tura apun inaikiartas olivo macharijai muuken ukatinawa nunismek winaka pengker awajtusuitme.
Tura aints piningnum umutai yaraamun wainak waraawa nunismek nukap waramtikrustinuitme.
6 Ame wina pengker awajtusu asakmin,
tura wait anengkratin asakmin,
wikia iwiaaku pujaknaka nunaka tuke nintimsan pujustinuitjai.
Tura wina Apur asakmin, jakancha tuke ami jeemin iwiaaku pujustinuitjai.