22
David: Yusru Yusru ¿waruka ajapruamsha ukurme? timiauri
1 Yusru Yusru ¿waruka ajapruamsha ukurme? ¿Waruka uwemtikrurtasam winatsme? ¿Waruka wi juutmaursha pachiatsme?
2 Yusru tsawaisha tura kashisha amin untsuamsha
airu weatsme.
Tura asakmin ayamsatatkaman tujintajai.
3 Antsu ameka pengkeraitme.
Ameka Israel ainau inawaitme.
Tura asakmin Israel ainau amincha:
Ameketme juuntam turaminawai.
4 Ii juuntri ainauka amincha:
Nekasampitme tusar nintimturmin armiayi.
Tura asaramtai ameka ni angkanmamtiknuyame.
5 Amincha yainkata tusar seatminamtai angkan pujusarti tusam yaingmiame.
Amin nekasampita tusar nintimraru asaramtai,
ameka ni ajapamka ukuchuyame.
6 Antsu wikia aintsua tumauchuitjai,
antsu maachia tumau asan kakaichuitjai.
Tura asamtai aints ainau wina wishikrinawai.
7 Tura wina waitkar muuken pearar etserar wishikrinawai.
8 Tura chichainak:
“Yusnaka nekas nintimtinuyayi.
Watska Yus niin angkanmamtikiati.
Yus niin aneakka nekas uwemtikrati” tinawai.
9 Antsu wina pachitsam:
Ni nukuri ampujenia akiinati,
tura ni nukuri muntsuri muntsati tusam,
nuni nangkamsamek winaka waitnuyame.
10 Wi akiintsaing ameka winaka waitnuyame.
Tura wina nukuru ampujen pujaisha tuke wina Yusruyame.
11 Wina waitkarawartin ainauka arakchichu wajainawai.
Tura wina yainkatnuka atsawai.
Tura asamtai wait aneasam winaka ajapruamka ukurkiip.
12 Basan nungkanmaya waaka aishmangkri nekas kajeu ainia nunisarang wina nemasur ainau tentatkar pujuinawai.
13 Juun yawaa kajeu kuntinun yuwatas winawa nunisarang wina nemasur ainausha winitrinawai.
14 Wikia yumi nungkanam ukarmawa nunisketjai.
Tura wina ukunchruka kuitkamua nunisarang ainawai.
Tura macha tseeram yumia tumau wajawa nunisang wina nintirka kakarchamin nekapeawai.
15 Wina suwerka nungka tsetseria nunisang mujuawai.
Tura inairusha muchikchamin mayatairun nepeturkayi.
Tura nungka tsetserin engketamua nunisnak wikia jakamin nekapeajai.
16 Pasé aints iruntrar yawaaya nunisarang wina jiinkichmin tententawaru asaramtai,
wina uwejruncha tura nawernasha chingkiarawarua nunisnak nekapmamjai.
17 Wina ukunchur ainauncha nekapmarminuitjai.
Tura asamtai wina kajertin ainauka tuke jiiru pujuinawai.
18 Tura yáki entsatiri jukit tusar suerte nakurusar,
wina entsatirun jurutkiarmiayi.
19 Antsu ametme wina kakamtikrurtin.
¡Yusru ukurkiip! ¡Wina yainkatin asam wári tarata!
20 Wina kajertin ainauka ni nangkirijai maawarai tusam uwemtikrurta.
Tura yawaaya nunisarang maawarai tusam surimrukta.
21 Nuka juun yawaaya nunisarang asaramtai,
nu aints ainamunmaya uwemtikrurta.
Tura waaka aishmangkri kajeu ni pupuntrijai aintsun maamnawa nunisarang asaramtai,
nu aints ainamunmaya ayamrutkata.
22 Ame turakminkia wina yatsur ainaun amin pachisan ujaktinuitjai.
Tura amin umirtamkaru ainaujai iruntran kantan kantamruatnuitjame.
23-24 Aints mianchau ainau wait wajainau asaramtai,
Yuska ukutsuk wait anentawai.
Tura ni yainkata tusar untsumaurincha anturui.
Tura asamtai Jacobo weari ainautiram,
Yus nintimtau asaram:
Ameketme juuntam titaram.
Tura ameketme Apum titaram.
Tura Israela weari asaram:
Ameketme ii Yusrim titaram.
25 Yusru aints untsuri amin umirtaminak pujuinamunam wikia amin pachisan:
Ami chichammin nekasam umikume titatjai.
Amin ameketme juuntam turamin ainamunam wi turatatjai timiaja nunaka umiktatjai.
26 Wait wajau ainautiram,
nukap yuwaram atumsha tutuartaram.
Tura Yus eautiram Yus:
Ameketme juuntam titaram.
Turaram nukap musach pujustaram.
27 Mash nungkanmaya ainautiram,
tura niish niish chichau ainautiram,
Yus kajinmatsuk nintimraram ni seatasrum tikishmatrataram.
28 Ii Yusri mash nungkanmaya ainau Apuri asa,
mash aints ainaun inawai.
29 Yamaikia yuumatsuk pujuinautirmincha tajarme:
Atumkeka iwiaakuka pujuschamnawaitrume.
Antsu jakaram nungka tsetseri najanartinuitrume.
Tura asaram atumsha tsuntsumaram:
Yus ningki mash aints ainau Apurintai titaram.
30 Wi wear ainau Yusen ameketme juuntam tiartin ainawai.
Tura iwiaaku pujuinauka tuke niin pachisar chichasartin ainawai.
31 Tura ukunam akiinatin ainausha Yusen pachisar:
Nekas pengker asa,
ni aintsri ainaun uwemtiknuyayi tiartin ainawai.