14
Absalom Kinungle Kitna Dinga Joab Tohgon
1 Chuin lengpan Absalom hi angaicha lheh jeng tai ti Zeruiah chapa Joab hin ahin hetdoh tan ahi.
2 Joab hin mi asolin Tekoa khosunga mi numei chingtah khat aga holdoh sah in, amanu kom'a chun aseitai, “Nangma tun lunghem a puldou-dou jeng tobangin kisem in, pul douna ponsil kisil’inlang, thao jeng jong kinu dan, ajeh chu phat sottah sunga thi-op a um numei puldou jing bangin um'in.
3 Chutengleh lengpa kom'a ga chelut inlang, ajah a hitin gaseijin, atin Joab chun asei ding thu jouse abonchan amanu chu athumop tai.
4 Tekoa khosunga numeinu chu lengpa kom'a ahung phat in abohkhup in tol'a amai asulut in jana apetai, chule aman aseijin, “Vo lengpa, nei panpin,” ati.
5 Hichun lengpan jong adongin, “Na gentheina ipi pen ham?”
atileh, amanun adonbut in, “O kaden, keima meithainu kahi, kajipa athia ahitai.
6 Chule nasohnu keihin chapa ni kaneijin, amani chu loujaova ahung kibao lhon'in akina lhone; hichun amani phel khen ding mihem khat cha ana umlou jeh in khatpan khatjoh pa chu ajep in athat pai tai.
7 Hijeh chun tun vetan, insung pumpi ahung kon uvin nasohnu hi eidel khum uvin hitin asei uve, asopipa that pa chu hin lhadoh loiyin, aman asopipa athat in ahinkho khel a keihon ama katha diu ahi,’ tin asei uve; hitobang hin ama hon ama chilhah jong asuhbei tei diu dol ahitai. Hitia hi ama hon keima mei-am jeng jong achen mit uva hiche leiset chunga kajipa min asuhmang diu, achikhai ding jong aumsah lou diu ahitai,” ati.
8 Chuphat in lengpan jong numei nu kom'a chun hitin aseiye, “Keima boldin dalhan lang, na inlam a chen, keiman ana vesui tange, koiman atohkhah louna din,” tin asol tai.
9 Chuin Tekoa khoa hung kon numeinu chun lengpa kom'a chun hitin aseikit e, “Kakipah e, kapu lengpa chule Kapu lengpa chu keima eikithopi jeh a nahin seiset khah uleh themmona chu keima le ka inkote chunga chujo hen, lengpa le alaltouna vang themmona beiyin umjo hen,” tin aseiye.
10 Chuin lengpan aseikit in, “Mihem khat touvin nakom'a thu aseikit a ahileh ama chu kei kom'a hinpui jengin, ama chun nangma natham khah kit louhel ding ahi,” atipeh e.
11 Hichun amanun jong aseikit in, “Lungset tah in Pakai na Pathen henga nei taopeh tei-teijin, chutia chu thisan phu lanom pan mi athakit louva, kachapa atha louna din,” atileh; lengpan jong aseipeh-in,
“Pakai hingjing min'a kasei ahi, na chapa chu asamjang khat jeng cha jong kisubui louding ahi,” atitai.
12 Hichun numei nun aseikit’in, “Lungset tah-in nasohnu kei hi kapu lengpa kom'a thucheng khat beh nei seisah kit in,” atia ahileh;
lengpan jong, “Seiyin seiyin,” ati.
13 Hichun numei nun aseijin, “Chuti ahileh ipi dinga nangman Pathen mite douna a hitobang thilgon hi nanei ham? Ijeh-inem itileh lengpan hitobanga thutanna naneiya kon hin lengpan nadel mangpa inlama napuilut loujeh in na thutan hi nangma chung ma-ma a nakitan ahitai.
14 Ajeh chu eiho iboncha uva athi cheh ding ihiuve, chule iboncha uva tol'a twi kisunglha kinung thaldoh kit theilou tobang ihiuvin ahi. Pathen'in jong mithilong damsa chu phong doh kit deh taponte; chule lengpa chun ama toh ikikhan teng ule ama toh ihung umkhom thei kitna diu aneijin ahi.
15 “Chule keima hiche thuseiya hi kapu lengpa henga hung kahi, ipi jeh-inem itileh mipi hin keima eitijat sah tauvin chuphat a nasohnu ken jong hitia hi kagel a, ‘Keiman lengpa kom'a gasei tange, ijem itileh lengpan asohnu kei thusei hi ngai jeng khat nante
16 chule lengpan jong eisumang ding miho khut a eihuhdoh tei ding ahi, Pathen mite lah a ei suhmang sah louding ahi.’
17 Henge, kapu lengpan lungthim chamna eihin peh kit diu ahi. Chule keiman kahen nangma hi thilpha thilse hekhen dol a Pathen vantil tobang nahi. Pakai na Pathen'in napanpi jing hen,” ati.
18 Hichun lengpan jong numeinu chu adonbut in, “Keiman kadoh doh chu ipi hijongleh imlou helin neihin seipeh in,” ati.
Hichun numei nun jong aseijin, “Kapu lengpan na seinom nom sei jengin,” ati.
19 Hichun lengpan adongin, “Thil hijatpi naseina a hi nangma Joab chutoh kihoutoh a kikhut jop nahim?” atileh; numeinu jong chun adonbut in, “Kapu lengpa, iti ken kaseilep ding ham? Koima chan nangma kom'ah imacha sel thei ponte. “Henge, Joab in eihinsol a chule thu hijatpi hi aman nasohnu keima hi eithumop a ka kamsung'a eikhumpeh ahinai.
20 Na lhacha Joab chun nalung nakhel a thil kigon dol jouse nakhel doh ding gelkhoh na a hiche hi abol anahi. Ahoi chu hita leh kapu nangma hi leiset chunga um thil ijakai hetna dol a nachih dan mong-mong Pathen Vantil chihna tobang bang ahi bouve!” atin ahi.
21 Chutah chun lengpan jong Joab kom'a aseijin asol tan ahi, “Aphai, tun chen lang gollhangpa Absalom chu ganung puilut tan,” ati.
22 Chuin Joab jong chu tol'a abohkhup in, jana apen, lengpa phatthei aboh in, hiti hin Joab chun aseitai, “Tuni hin kapu lengpa mitmun lungset na kachang mong-mong e, nasoh pa thil ngeh khoh pen hi nanop peh jenge,’ ati.
23 Chuin Joab jong akipat doh paiyin Geshur gam'a achen Absalom chu Jerusalem a ahin lepui tai.
24 Ahin lengpan hitin thupeh aneiye, “Absalom hi ama insunga che maithei ahi, ahin keima angsunga vang hung vahlut thei louhel ding ahi,” ati. Hijeh chun Absalom in lengpa chu amu tapon ahi.
David Le Absalom Kicham
25 Tun Israel chate lah a Absalom tobanga amel-hoi jeh a seiphat thei dang koimacha ana umpoi; Absalom hi akeng khotaljum apat alujang geiya achunga nolna ding beihel ahi.
26 Alujang sam chu kumkhat a khatvei bou acheji ahi chule ajeh chu agih behseh jijeh ahi. Hitia hi asam akivoa thil tenaa atea ahileh, asam jeng jong chu pound nga cheng agih jin ahi.
27 Absalom hin chapa thum ahingin, chule chanu khat jong ahingin, achanu min chu Tamar akiti; Tamar jong hi numei hoi tah khatma ahi.
28 Hiti hin Absalom hi kum ni lhingset Jerusalem'a cheng ahin, hijongleh lengpa angsung'ah khatvei cha avahlut kha hihbeh in ahi.
29 Chuin Absalom chun Joab kou dingin mi asol’in, ahunga ahileh lengpa kom'a sol din agon; ahinla Joab chu Absalom kom'a ahung tapon ahi. Hichun Joab in mi asol kit in, ahi vang'in Joab chu ahung deh kitpoi.
30 Chuphat in aman jong asohte kom'a asei in, “Veuvin, Joab lou khu keima lou ban tah ahin, cheuvin lang alou khu meijin gahalvam tauvin,” ati. Hijeh chun Absalom soh ten jong Joab lou chu meiyin agahalvam tauvin ahi.
31 Chuphat in Joab jong akipat doh in Absalom kom'a achen akom'a hitin aseiye, “Ipi dinga nasoh ten kalou meiya ahalvam jengu hitam?” agati.
32 Hichun Absalom jong chun Joab chu adonbut in, “Ajehchu lengpan ipi ding pen tah a keima hi Geshur gam'a konna hung khoh-khoh a kahiya, kei dinga Geshur gam'a umden chu nomjo dinga?” tin aseiye, tia gadoh sah ding kati nahi. Tujengin jong lengpa angsunga nei lutsah mong-mong inlang keiman themmona kaneiya ahijongleh aman eithat jeng hen, ati tia gasei sah ding kati nahi,” ati.
33 Hijeh chun Joab jong lengpa kom'a achen aga seipeh tan ahileh, hichun lengpan jong Absalom chu akoutai. Chuin Absalom jong lengpa kom'a ahungin, lengpa angsunga chun abohkhup in amai tol'a asulut in jana apen ahi; chuin lengpan jong Absalom chu achop tai.