11
David Le Bathsheba
1 Chavang lai le chonna ngai dan a anaum leng ho galkon phat laiyin David jong chun Joab le asepai te toh Israel chate abonchan galkon din asoltai; amaho jong acheuvin Ammon sepai te agasumang un, chule Rabbah kho aga um tauve. Ahin David vang chu Jerusalem khopia aumden jing nai.
2 Nikhat hi nilhah lam ni kihei don hin David jong asun cholna jalkhun'a kon'in athoudoh in leng Inpi inchunga chun avahlen ahileh, inchunga kon chun numei mel-hoi khat akisil pettah amun ahi.
3 Hijeh chun David in mi asol in numeinu chu koi ham, tin agadoh le sah tai. Hichea hin mi khat chun, “Hiche nu hi Eliam chanu, Hit mipa Uriah jinu Bathsheba chu ahi” tin aseipeh tai.
4 Hichun David in mi sottol le ho asol in amanu chu aga puisah in, Bathsheba jong chu leng inpi sung ahung lut in, chuin David chun amanu chu aluppi tan ahi. Hiche pet a hi Bathsheba chu athi neijou akisuh theng jou chabou ahi; akichaiyin amanu jong a inlama achetai.
5 Phat chomkhat jouvin Bathsheba'n nao avop ahin kihetdoh phat in aman David kom'a hitin thu athot in, “Keiman nao kavop tai,” ati.
6 Hichun David in Joab chu thu athot in: “Uriah kitipa Hit mipa chu kaheng'a hinsol temin,” ati. Hijeh chun Joab in jong Uriah chu David lengpa hengah ahinsol tan ahi.
7 Chuin Uriah chu David kom ahung lhun phat in, David in jong Joab umchan chule mipi itobang banga um uva chule agalsat u machal jing hinam tin adongin ahi.
8 Chujouvin David in Uriah kom'a aseitai, ‘Na inlam'a chen lang gakichol tan,” ati. Leng inpi adalhah chun David in Uriah dingin thilpeh jong athot in ahi.
9 Ahivangin Uriah chu inlang achepon, lengpa kotpi phung bul'a kotkhah ngah ho toh chun hiche jan chun alumden tan ahi.
10 Hichun David in Uriah a inlam achelou ahin hetdoh phat chun, akouvin ipi jeh ham ti adong tan ahi, “Kholgam a konna hunglhung nahilou ham, ibola na inlam'a chelouva naum ham?” ati.
11 Hichun Uriah in David kom'a aseijin, “Pathen Thingkhong le Israel chate chule Judah mite lhambuh jenga cheng ahiuvin, kapu sepai te kapupa Joab le asepai te jong tollhang lah a ngahmun mai-maiya cheng ahiuve. Ipi dinga keima in'a kachea kadudu kaneh a atui-tui kadon a kajinu angsunga nomtah a kalup ding ham? Nangma damlai sung le nahinkho phatlai sungsen keiman hitobang kinopsahna thil hi bol ponge,’ tin aseiye.
12 Chuphat in David chun Uriah kom'a aseijin, “Aphai, tunin jong hikom'a umtan, jing tengleh na vaikon doh sah nange,” atitai. Hijeh chun Uriah jong chuche nikho le ajing nikho chun Jerusalem'a anichongtan ahi.
13 Chuin David in Uriah chu, ama kom'a anne ding leh lengpitwi don dingin akouvin; chuin ama chu lengpitwi adon kham sah tai; chuche jou jengin jong a inlam'a ajinu kom chedin asoldoh jou dehpon, nilhah lamin Uriah chu kelkot ngah sepai te chutoh lumkhom din ajalkhun akijot kit tan ahi.
Uriah Thina Ding David In Agon
14 Chuin Ajing jingkah chun David in Joab lekha khat athot in hichu Uriah khut a agah thot e.
15 Lekha sunga hin David chun hitin asun e, “Uriah hi gal kisatna ahahlai laiya amasan pansah uvin lang chutengleh gal miten atha tei-tei nadin ama achangseh in dalhauvin,” tin asun e.
16 Hijeh chun Joab injong khopi khat aum phat in mihat tah-tah panmun ahi, tia ahetsa bangkom laitah a chun Uriah chu apansah tan ahi.
17 Chuin khopi sunga sepai te ahung kondoh uvin Joab chutoh akisat tauvin ahi; chule hiche mun a chun Hit mi Uriah jaonan mipi lah a David sepai te phabep jong athat tauvin ahi.
18 Hichun Joab in jong mi asol'in gal kisat umchan jouse chu David kom'a aga lhutsah tai.
19 Hichun asottolle mipa chu ahilchah masan, “Lengpa kom'a chu gal kisat thusim aboncha nasei sohkei ding ahi, ati.
20 Ahin ijem tia lengpa alung han jeng tah a nang kom'a, ‘Ibola chutobang'a chu khopi na nailut jeng uva kisatpi dinga nacheu baham? Kulpi bang dunga konna nahin kap jeng diu nahet louvu ham?
21 Chule Gideon chapa Abimelech chu koi tha ham? Bangvum'a konna numei khat in sumhei song ahin lhah sah leh alhah khum khah a hijeh a chu Thebez kiti laiya chu thiden hilou ham? Ibola hitobang tah a chu bang na nailut jengu ham?’ tia asei leh; nangman, ‘Nasohpa Hit mi Uriah jong athi tai,’ tia na seipeh ding ahi,” tin ahil’e.
22 Hichun sottolle pa chu Jerusalem ahungin David kom'a Joab in asol lona jouse chu abonchan aseipeh sohkei tan ahi.
23 Hichun sottolle pa chun David hengah hitin aseiye, “Gal miten keiho eihin joujo tauvin, keiho dou nan tollhanga ahung kitoldoh jeng uve; ahivangin keihon jong kelkot phung lam chanin kale dellut kit uvin ahi.
24 Chuin galmi thalpi kap them hon banga kon'in nasohte lengpa sepai phabep jong ahin kaplih tauvin, chule nasohpa Uriah jeng jong athitai,’ ati.
25 Hichun David jong chun sottolle pa kom'a chun aseijin, “Nangman Joab kom'a hitia hi nasei ding ahi; Hiche thilsoh jeh hin nangma lung lhadai hih in, ajeh chu chemjamin khat-khat a aban tan-tan ahitai; aban teng natha hatsah jon lang khopi chu delkhumin, tin seipeh in, hiti chun Joab chu atilkhou tan,’ ahi.
26 Chuin Uriah jinun ajipa Uriah chu athitai, ti ajahdoh phat in ajipa dingin akap in apul adoutan ahi.
27 Amanu pul douna phat akichaijin David in mi asolin amanu chu leng inpi sungah aga puilut sah tai, chule Bathsheba in David chu chapa khat ahinpeh tai. Hinla David thilbol achonna chungah Pakai alung lhai tapon ahi.