8
Israel ten Leng Angeh U
1 Samuel ateh lheh tan ahile, Israel lah a thutan vaihom ding’in achapa te apansah tai.
2 Joel le Abijah chu achate lah a akum tampen teni chu Beersheba khopi’ah thutan vaihom’in apang lhon'e.
3 Ahivangin apa toh abang lhonpoi, sum lam’ah akitah lhonpoi. Amanin sum nehguh pou abol lhon'in, thu adih in atanji lhon tapoi.
4 Achainan Israel upaho jouse chu Ramah kho ah Samuel toh lunggel khomna anei uvin ahi.
5 Ama hon, “Ven, nangla nateh lheh jengtan, na chate jong nang toh abang lhonpon, Leng khat nei peuvin namdang ten anei banga thutan dingin,” atin aseipeh un ahi.
6 Samuel vang chu athil ngaichat u chung’ah chun alung alhaipoi. Hijeh chun panpi ngaichan Pakai kom'a ache in ahi.
7 Pakaijin Samuel jah a, “Nakom'a asei jouseu bolpeh in, nang napaiju ahipoi, keijoh eipaiju ahi bouve, ama hon kei eideilou u ahibouve, aleng diuva eideilou u ahi,” tin adonbut tan ahi.
8 “Egypt gam'a konna kahin puidoh uva kipatna gamchom mite indoi bou ahou nom jo uve. Tua jong hitobangma a chu nang jong nabol'u ahi bouve,” ati.
9 “Asei jouseu chu bolpeh in, ahinlah leng khat in achung uva vai ahin hopna ding thua hin, kaangkhen chan gihsalin,” atipeh tai.
Samuel In Israel Chate Agihsal
10 Hijeh chun Samuel in, Pakaiya konna gihna thucheng ho chu Israel mite chu leng athumnau chungthu’ah chun aban ban’in ahetsah tan ahi.
11 Samuel'in Israel te jah ah, “Leng nahin nei uva aman nachung uva lengvai ahin hop tengleh, Leng in na chateu chu alah a sakol kangtalai ho leh sakol sepai dinga, chule sakol kangtalai masanga alhaisah diu ahi.
12 Abangkhat chu sepai lah a jalamkai chule lamkai napeh dingu, abang kit chu pumthou changa loukaiya apansah dingu, abangkhat chu kangtalai ase ho sema na pansah diu ahi,” ati.
13 “Lengpan na chanu teu amat uva anhon'a apansah uva, abang chu changlhah kanga apansah diu chujongleh abangkhat chu thao namtui sem’a apansah uva soh a anei diu ahi.
14 Nalou phalai hou jouse na lahpeh uva lengpithei lei le olive leija abol uva athao alah tengu leh atohkhompi ho apeh ding’u ahi.
15 Aman na changga le lousoh ho a konna som’a khat alah ding chule vaibol'a pang ho leh sohte ho apeh ding’u ahi.
16 Aman na pasal hou le numei hou soh dia akimat a, chule na gancha hoilai laiho ama dinga akilah ding ahi.
17 Aman na ganchahon ho jeng’a jong som’a khat angeh ding, nacham louva napeh ding ahi.
18 Chuche nikho chuleh nang hon nakilhen’u lengpa jeh a chu nahung ka diu chule Pakaijin naka gin’u na ngaipeh lou diu ahi,” tin aseipeh tai.
19 Ahivangin mipite ho chun, “Hijeng jongleh Leng chu kadei nalai uve,” tin Samuel thusei chu angaisah dehpouvin ahi.
20 Hichun mipi ho chun, “Ka kimvel uva gamdang ho bangin, ka lengpauvin kachung uva thutan hen, gal kisat jeng’a jong hin eilamkai uhen,” ati tauvin ahi.
21 Hichun Samuel in Pakai kom’ah mipi ho thusei chu aseipeh kit in ahile,
22 Pakaijin, “Asei bang-bangu chun bolpeh inlang, Leng chu petan,” ati. Hichun Samuel jong anom’in mipi te ho chu a inlam cheh uva anungsol tan ahi.