6
Philistine Ten Pathen Thingkhong Anung Le
1 Pathen Thingkhong lha sagi jen Philistine gam'a aga thamin ahi.
2 Philistine mihon thempuho le gaothem miho akoukhom uvin hitin ana dong uvin, “Pakai Thingkhong chung chang thu hi ikalo diu hitam? Aumna ngaiya iti kasol diu ham? Nei seipeh uvin,” atiuve.
3 “Israel Pathen Thingkhong chu nathah tengule thilpeh toh thah thauvin,” tin aseipeh un ahi. “Chonset thilto nato dingu chutileh natna chu kitang ding ahi, chuteng nadam uva, kitoldoh theilou natna chu Pathen khut ahi ti nahin het diu ahi,” atiuve.
4 Hichun ama hon, “Itobang chonset thilto kabol diu ham?” tin ana dongun ahile, ama hon adonbut un, “Hiche natna chun nangho le na vaipo nga ho nabonchau chunga achuh jeh chun, nang hon Sana tum nga le sana a kisem jucha nga, na gamsungu sunohphah dungjuijin sem’un.
5 Hijeh chun gamsung suse na uilut lim le na jucha lim’u chu nasem uva chule Israel Pathen chu loupina napeh dingu ahi. Chuti henlang hileh nangho leh na Pathen hou chule nagam uva kon'in akhut ahin jangkhaisah dom ding ahi.
6 Nalung tahsah hih un chule doulung jong puhih un, Pharaoh le Egypt mite bangin lung puhih un. Pathen'in thil kidang abol ho jeh a hung potdoh ahibou uve.
7 Tun bongkang thah sem uvin lang bongpi namkolyon pokhalou hel anou noichep lai cheh ni gakaiyun chule bongpi teni chu bongkang thah chu kaisah un, anou teni vang chu akom lhona kon'in inlam'ah hin nungkai tauvin,” ati.
8 “Pakai Thingkhong chu bongkang chunga chun tungdoh unlang akom'a chun chonset thilpeh dinga thilto sana tum, sana a kisem jucha lim le uilut lima kisem jong chu na semtha diu, chutengleh bongpi teni chu soldoh unlang achena nom nom’ah che tauhen.
9 Igamsung’u akhokal Beth-shemesh lang ajot a ahile gentheina te ho hin Pathen khut a kon ahi, ti hiche a konna chu hetthei ahi. Amavang achetah louva ahivangle igamnau chu ama khut ahipoi ti kihetdohna ahi,” atiuve.
10 Chuti chun aki seipeh nau bang-bang chun abol tauvin ahi, bongpi noitwi neilai ni kaisah dingin agongun bongnou teni vang chu ajaosah pouve.
11 Chuti chun Pakai Thingkhong chule chonset thilto sana jucha lim le uilut lim sana tum jong chu bongkang chunga chun akoi tauvin ahi.
12 Chuin bongpi teni chu jangkeijin Beth-shemesh geiyin ache lhungkei lhon'in ahi. Philistine mipite lamkai hon Beth-shemesh gamgi chan geijin ahin juilhung peh un ahi.
13 Chule Beth-shemesh mihon phaicham'a chu suhlou chang ana at laitah u ahin, akhoda uva ahile Pakai Thingkhong ahung lhun amu phat un, hapan akipah lheh jeng tauve.
14 Bongkang chu Joshua kitipa loulaiya songpi kom'a ahung kingan chuin mipite hon bongkang thing meiya tidingin avolha uvin, bongpi teni chu athat un Pakaiya govamna maicham asem'un ahi.
15 Levi phungmi phabep khat in Pakai Thingkhong chule akom'a thingkhong sana jucha lim le sanatum uilut lim jong chu alalha uvin songpi chunga chun akoijun ahi. Hiche govamna maicham ho chu Pakaiya dingin asem’un ahi.
16 Philistine lamkailen mi nga in thil kibol ho jouse chu amu sohkei uvin chule hiche ni ma-ma chun Ekron ah akile kit tauve.
17 Chule Philistine miten Pakai henga chonset thilto dinga ahin nungsol’u sana uilut lim, sana tum nga ho chu Ashdod akon khat, Gaza akon khat, Ashkelon akon khat, Gath akon khat chule Ekron a konna khat cheh ahi.
18 Chule sana jucha limho chun Philistine khopi nga ho, chule akimvella khoneoho, gamvaipo nga gamvaipoh na noiya umho vetsahna a ahin thot u ahi. Beth-shemesh khoa Joshua loulaiya songpi lentah khat a bongkang chu asolhah nau chu tujengin jong imatih chan geiya hettohsahna dingin aum jing nalaiye.
Thingkhong Kiriath-Jearim’a Apohlut U
19 Ahinlah Beth-shemesh a kon mihon thingkong sung avet jeh un mi som sagi Pakaijin athat tai. Hiti chun Pakai natoh kidang jeh chun mipi te nasatah in alunghem lheh jeng tauvin ahi.
20 “Hiche Pathen theng masanga hi koiham adingjou ding’ah?” tin mipin asam’un “Thingkhong chu hoiya itoldod diu hitam?” tin akidongto tauve.
21 Hijeh chun thupo din Kiriath-jearim mipite henga mi asollun, “Philistine miten Pakai Thingkhong chu ahung thahlut tauve. Hungun lang, hung kilah un!” tin thu apohsah tauvin ahi.