4
1 Chule Samuel in Israel mipi te lah a ale lhut kitjin ahi.
Philistine Ten Pathen Thingkhong Alahpeh
Hiche phat laiya chu Israel te le Philistine mite kikah a kigalna uma ahi. Israel sepai ho Ebenezer kom'a ngahmun uma ahi, chule Philistine ten Aphek mun a ngahmun aneiyu ahi.
2 Philistine ten Israel mite gallin ahin nokhum'un ahile Israel sepai ten ana lal’un mi 4,000 jen ana that tauve.
3 Chuin gal kisat akichaiya mipite angahmun ahung lhunphat un, Israel upaho chun, “Ipi jeh a tunia Pakaijin Philistine masanga gal eilalsah u hintem?” Chuin ama hon aseiyun, “Shiloh a kon'in Pakai Kitepna Thongkong chu eiho dingin gapudoh uhitin hichu ilah uva ahung lhun tengleh, hichun igalteuva kon'in eihuhdoh thei tauvinte,” akitiuvin ahi.
4 Hijeh chun ama hon Shiloh a Pakai kitepna van gam sepai te, Cherub vantil teni kikah’a cheng, Pathen Thingkhong pudingin mi asol’un, chule Eli chateni Hophni le Phinehas chu Pathen Kitepna Thongkong chutoh ahung lhon khom’in ahi.
5 Chutah chun Pakai Thingkhong chu Israel te ngahmun ahung lhun amu phat un, akipah lheh jengun, akipanau ogin chun leiset ahotling leuvin ahi.
6 Hichun, “Ipi soh hitam?” tin Philistine miten adong uvin, “Gingleng lunga a ao gin’u ajah phat un, Hebrew mite ngahmun ging leng lung khu ipi thu hitam?” akitiuve. Chuin ama hon Pakai Kitepna Thongkong ngahmun hunglhung ahi ti ahechen tauve.
7 Amaho alung linglao tauvin ahi. “pathen ho angahmun uva alhung tai,” tin asam’un, akicha tauvin ahi. Chuin amaho apeng uvin, “Ohe! Hiche hi vangsetna ahi!” Tumasanga chu hitobang thil hi ana um khalouhel ahi.
8 “Hitobang hat tah Israel Pathen a konna kon eihuhhing jou diu ham? Nei panpiuvin! Egypt gam'a gamthip a hivei jouse sugama pathen ho chu ahiuve.
9 Hitobang kisatna anaum khapoi, Philistine! Ihatlou ule Hebrew mite soh a ium diu ahi! pasal bangin dingun, chule sat un!” akitiuve.
10 Chuin Philistine ten jong nasatah in gal asat un ahile, Israel mite chu ajou un mihem tamtah jong athat tauvin ahi. Hiche nikho chun Israel te mi 30,000 athiuvin, athimoh chengse chu angahmun lam'ah ajam tauvin ahi.
11 Pathen Kitepna Thongkong jong alahpeh un, Eli chapa teni Hophi le Phinehas jong chu athat tauvin ahi.
Eli Thempu Thi
12 Benjamin phung mikhat galmun a kon'in ahung lhailut in, hiche ni ma-ma chun Shiloh ahunglhungin, apon taldeh duh le aluchung’a leisetnat dehduh pumin ahung lhailut in, hichun agentheina avetsah ahi.
13 Eli chu lampam'a touna chung khat a touva anavet ahin, chule thusoh chu ajah nom ahi. Ajeh chu Pathen Thingkhong akipohdoh jeh uchun alungsung akithing in ahi. Chule hiche mipa khopi sung ahunglut phat chun thusoh chu aseijin ahile, khopi pumpi miho chu hakan akap tauvin ahi.
14 “Hiche awgin kithong khu ipi ham,” tin Eli in adongin ahi.
Thupopa chun Eli chu thusoh chu aseipeh tai.
15 Eli chu tehse kum somko le get, amit in kho mulou ahitai.
16 Aman Eli heng’ah, “Keima tutah a chu galmun'a konna hung’ah kahi, keima tah tunia hiche mun a chu uma kahi,” ati.
Hichun Eli in, “Ipi iti nam?” tin adonge.
17 Hichun thupopan, “Israel ten Philistine te chu alal tai, mipite akisat chaptai chule nacha teni Hophni le Phinahas jong athat tauve chujongleh Pathen Thingkhong jong ala tauve,” tin ana donbut in ahi.
18 Thupopan Pathen Thingkhong ala tauve ti thucheng ajah-jah chun Eli thempu kelkot pang langa atouna a kon'in anunglhuh in ahi. Aman angong akitaboh in athitai, ajeh chu ama chu ateh lheh tan chule atahsa gih jong apohlal lheh ahi. Ama chun kum somli jen Israel te thutan vaihom a jong ana pang ahi.
19 Eli thempu mounu, Phinehas inneipi, naovop ahin, anao penna ding naija ahitan, a inneipu thi le atehpu thi chule Pathen Thingkhong kipohmang thu ajah jah chun naoso nat in ahin phan anavah pai-paijin ahi.
20 Amanu chu naopen nat in athitai, ahinlah athi masangin naodom nun atilkhouvin alhamon in, “Kicha hih in, Pasal naosen khat naneiye,” ati peh e. Ahinlah amanun ima ana donbut thei tapoi.
21 Naosen min chu Ichabod asahtai, (“Loupina hoiya um hitam?” tina ahi), ajeh chu, “Israel loupina chu akiladoh tai.” Amanun hiche min asahpehna jeh chu Pakai Thingkhong min akipohmang jeh le, atehpu le a inneipu athi tah jeh a asah ahi.
22 Hiti chun amanun Pathen Thingkhong alahmang peh jeh uva, “Loupina chu Israel te toh kikhen kang ahitai,” tia asei ahi.