21
David Saul’a Kon'a Ajam
1 David chu Ahimelech thempupa kimupi din Nob khopi’ah achen ahi. Ahimelech in David chu amu phat in ati akihot in, “Itia na changseh nahi ham? Ipi jeh a mikhat beh in nahin kilhonpi louham?” tin ana dongin ahi.
2 David in adonbut in, “Lengpan kin chomkhat a eihinsol ahi bouve, ipi bol dia kahung hi koimacha hetsahlou dia eihil chah ahin, chule ka sepai te chun katepna mun chom khat a eikimupi diuva ka seipeh ahi,” ati
3 “Neh le chah ipipi nanei em? Changlhah pheng nga ahilou le nehthei adang ipi um'em neipen,” ati.
4 Hichun thempu pan jong, adonbut in “Keihon changlhah mai-mai kanei pouve. Ahinlah koitobang nailamcha a numeiya kisuboh louho dingin changlhah theng kanei uve,” ati.
5 Hichun David in, “Lungkham hih in, keiman kamite adeh a galsat dinga ache tengu le numeiya konna kikangse louho kaphal jipoi, gamkhol mai-mai kache tengu jongleh hiche thudol’a kisuboh ngailou ahiuve, achutile hiche khohsah tum neiya kholjinna a iti thenda diu ham!” ati.
6 Neh ding dang aumtah lou jeh in, thempu pan changlhah kithensosa chu David apetai, ajeh chu changlhah Pathen a tosa bou chu anei ahin, hichu athah akitoni tengleh changlhah chu kikhelji ahi. Chule hiche nikho tah a chu athah ana kikoi khel ahi.
7 Edom mite akon Doeg kiti mipa khat, Saul gancha ching lamkaipu khat anaum khan, Hou-In mun’a bol lhing ding kin aneijeh in ana umden khan ahi.
8 David in Ahimelech jah a, “Nakom'a tengcha ahilou le chemjam um'em? Lengpa kin’a kigoman louva kahung ahin, manchah ima kahin choilou ahi!” ati.
9 Hichun Ahimelech in, “Elah phaicham’a natha pa, Philistine mipa Goliath chemjam bou chu kaneije; hikom'a thempu von kikoina nunglam’a khun pon’in akichun in aum'e, nadei le kilah in, adang vang aumpoi” ati.
Chuin David in ajah a, “Hichu neipen! Chusang’a phajo le hoijo chemjam adang umponte,” ati.
10 Hichun David Saul kom'a kon'in ajamdoh in, Gath khopi Achish lengpa heng ajontan ahi.
11 Ahinlah Achish lenggam sung’a lamkaiho chu akom uva aum ding chu akipah pouvin ahi. Ama hon, “Hiche mipa hi agamsung’a leng changsa David chu hilou haimo? Miho lam uva, ama chung changa hi la asah uva,
Saul in mi asang asangin athat in,
David in vang sangsom somin athat e,
tia alachoi pau chu hilou ham?” tin adong uve.
12 Hiche athuseiho chu David in ajah phat in Gath lengpa Achish chu akicha lheh jeng tan ahi.
13 Hijeh chun David jong aki ngolsah in, kotpi phung dung ho chu ajihpolin, chule akhalhang dunga achilphon akaisah dehduh jengin ahi.
14 Achaina in Achish lengpan amite ho kom'ah, “Hitobang mingol chu kaheng'a nahung sah uham?
15 Kakimvel'a hitobang mingol kanei louva nabol uham? Ipi dinga motchon chon a eisuboi ding bep a ka insung laitah a, kamasang’a hiche pa hin puilut nahiuvam?” tin ahung eojah jengin ahi.