2
Hannah Thangvah Taona
1 Chuin hiti hin Hannah ataovin:
“Ka lungsung Pakaiyah akipah jinge!
Pakaijin eihatsah tai.
Tun kamelma te donbutna ding kanei tai;
Kakipah e ajeh chu nangman nei lhatdoh tai.
2 Pakai tobanga theng adang aumpoi!
Nangma tobang koima dang aumpoi,
Eiho Pathen tobang songpi dang aumpoi.”
3 “Kiletsah tah in hoithona thu seidan!
Huham tah in paodoh hih hellin!
Ajeh chu Pakai hi Pathen ahin ipi nabol ahetlou imacha aumpoi;
natoh ho jouse thu atan ding ahi.
4 Gal-hat te thalpi jouse tunvang akiheh bongtan,
mi thalhom chu thahat akisotai.
5 Oivasetna neten neh ding nei louvin kel thoh in aum’un,
agilkel ho avasoh tauve.
Chaneilou nu chun tun cha sagi aneitan,
chule cha tamtah neinu chun amansah gamtai.
6 Pakaijin thina le hinna ani gellin apen;
aman abang lhankhuh ah alhahsuh sah in hinlah abang akai thouve.
7 Pakaijin abang avaichat sah in adang ahao sah e;
abang alhahsuh sah in abang aphong dingin ahi.
8 Aman vaicha ho leivuija kon'in aphong sangin
chule angaicha te nen khuh a konin achoisang'e.
Leng chapa te lah a tousah in,
loupina laltouna a atousah e.
Thilsem jouse hi Pakaiya ahin,
chule vannoija thil ho jouse kitoh tah in akoiye.”
9 “Aman ama dinga tahsan umtah ho chu aventup ding ahi,
ahinlah michonse ho chu muthim lah a mangthah ding ahiuve.
Ajeh chu athahatna a koimacha dingjou louding ahi.
10 Pakai douna a galsat ho chu cheh chao ding ahiuve.
Amaho douna a van'a konna keh alhah sah ding ahi;
Pakaijin van'a kon'in leiset a thu ahin tanin ahi.
Aman aleng ho chu thahatna apen;
aman athaonu changho chung'ah athanei nau abelap peh in ahi.”
11 Chujouvin Samuel jaolouvin Elkanah jong a in lam Ramah kho ah akiletan ahi. Chule chapang pan thempu Eli kithopi nan Pakai kin abolin ahi.
Eli Thempu Chapa Phalou Teni
12 Eli chapa teni chu migilou michavai ahilhon toh kilhon’in Pakai ginna le jana pelou ahi lhon'e.
13 Hiche laiya thempu hija atoh dingdol mi koi tobang hamkhat in kilhaina atodoh teng, Eli chapa teni chun sohpa chu satul kathum nei khat puma asolji lhonin ahi. Hichu gancha thilto sa kihonsou lai pet ahiji.
14 Hiche thihkhe chu khangbel sunga asolutna, asodoh pen-pen chu Eli chate apeh ding, Israel chate Shiloh a gan kilhaina a hunglha jouse hitia chu gihna aneiji lhon ahi.
15 Abang kom le sathao ho kilhutvam masang le thempupa sohpa chu hunga kilhaina ganthatpa jah a chu hitin ahung seiji'n, “Thempupa kigo ding sahing neipen, ajeh chu aman nangma honminsa chu akilah louhel ding ahi, sahing bou adei ahiye,” tia ahung sei ding ahi.
16 Mihem gan kilhaina kin sempa chun hitin adonbut jin ahi, “Nadei jat-jat kilah in, ahinlah athao kihallha masa ding ahi,” atijin, ahin thempu sohpan jong, “Ahipoi nangman atuma neipeh doh ding ahi, achuti louva ahileh keiman pumhatna kalahpeh ding nahi,” tin aseijin ahi.
17 Hiti chun hiche khangthah teni chonsetna chu akhoh lheh jeng tan, ajeh chu Pakai maicham jeng jong chu kimit thipna changin anei tauvin ahi.
18 Ahinlah Samuel chu chapang cha hijongleh, Pakai lhachan apangtai. Thempu kivonna tupat ponnem khat in akong akigah jin Pakai angsung'ah lhachan apangji tan ahi.
19 Kumseh leh anun sangkhol chol neo khat akhuipeh in a inneipu toh kilhaina gantha bol dingin achekhom lhon'in ahi.
20 Inlama ahung kile masang teng’u leh, Eli in Elkanah le a inneipi phatthei abohjin chule hitin aseiji’e, “Pakaijin hiche na inneipi chapa khat napeh jeh in amanu a kon'in cha le nao tampi nahinsah hen,” tin aseiye.
21 Chule Pakaijin chapa thum le chanu ni apen, hiti chun Samuel chu Pakai angsung’a ahung khangtou touvin ahi.
22 Tun Eli chu ateh lheh jeng tan, chujongleh achapa tenin Israel mi tampi abolna lhon thu kithang, kikhopna ponbuh kotpi phunga lhacha a pang numeiho aluppi lhon jong ajatai.
23 Hijeh chun Eli in ajah lhon'ah, “Na thilbol lhon jouse Israel mipi ten kakom'a aseiyun kaja sohkei tai, ipi bolla hitobang chonsetna hi nabol lhon ham?
24 Na ngah tei-tei lhon ding ahi, kacha teni! Pakai mitea konna kajah thucheng ho hi ahoi hihbeh jengin ahi.
25 Mihem khat chu mihem dang khat douna a achonsetna ahileh Pathen'in asuhcham thei ahi, amavang mihem khat chu Pakai douna a achonsetna ahileh, koipen in ama dinga asei champeh ding hitam?” ati. Ahinlah Eli chapa tenin apa thusei ngai nahsah in anei lhon poi. Hijeh chun Pakaijin amani thina ding gonsan akoitai.
26 Chapang cha hijongleh, Samuel vang chu Pakai le mihem te deisah in akhangtou touvin ahi.
Eli Thempu Insung Gihna
27 Nikhat hi Pathen mi khat Eli kom'a ahungin, ahin ama chu Pakaiya kon'in thu ahinpo in, hitin aseipeh tai: “Keima, Egypt gamsung Pharaoh insunga soh changa aumlai uva napa insung mite henga kei le kei kiphong doh a kahitai.
28 Keiman Aaron hi Israel phung jousea konna ka thempu hi ding chule ka maicham chunga thilto ding, gimnamtui hal ding chule ka masanga thempu sangkhol chol kivon’a, kakin tong ding’a ka lhendoh nahi hilou ham? Chule Israel chate a konna kimudoh kei dinga thilto jouse chu napa insung mite ka pehdohsa ahitai.
29 Achutia ahileh ipi dinga kaumna a ka thupeh gan kilhaina le kathilto napai manga, kami Israel te thilpeh jousea konna ahoipen chun na thaodoh sahna dinga kei sanga na chapa teni na jabol joh ham? Kami Israel te thilto aphalai laiya chu nangho kivah thao chet nahiu hitam?” ati.
30 “Hijeh chun Pakai Israel Pathen'in hitin aseiye, keiman nangma Levi insung le napa insung chu imatih chan a ka thempu a pang diu ahi tia naseisa ahin, ahinlah keima eija a chu keiman jong ama chu kaja ding ahi, chule keima giltah a eibol louva chu keiman jong ka khohsah louding ahi.
31 Phat ahung lhunge, vetan, Keiman na thaneina ka suhbeina ding nikho ahung nai tul-tul'e. Hiteng chule na insunga pasal tehse khat chabeh jong hung umlou ding ahiye.
32 Hiche phatteng chule Israel te kipe haona chu nangman ngaicha geova na mitlhi lha-lha a nahin vet ding ahi. Chujongleh na insunga konna pasal ateh a thi khat a khatcha jong umdoh louding ahitai.
33 Ahingdoh chasun jong gim hesoh thoh a um diu, chule achate hou jong thise jenga thi diu ahi.
34 Ka thusei ho hung guilhung ding vetsahna chu, nacha teni chunga hunglhung ding, Hophni chule Phinehas, nikhat sunga ani lhon’a thi ding ahi!
35 “Chutengleh keiman tahsan umtah thempu eijen ding leh kalung deitah bolding ka tundoh ding ahi. A insung jeng jong ka tundoh peh a, chule amaho chu ka leng tundoh ho thempu a tonsot a pang dingu ahi.
36 Chuteng na insung’a ahing chengse a angsunga bohkhup uva, paisa le an athum diu, 'Lungset tah in' tia asei diu, 'natoh ding nei peuvin, thempuho lah ah, chuteng keihon neh ding kham nei tauvinge, ati diu ahi,'” ati.