18
Saul David Chung’a Athangthip
1 David in Saul akihoupi jouvin, lengpa chapa Jonathan toh akimuton, Jonathan in David angailut jeh chun, akikah lhona kintah a kitepna khat semdin akigong lhon tan ahi.
2 Hichenia kipat chun Saul in David akom'ah akikoi jing tan ainlam'ah akilesah kit tapon ahi.
3 Jonathan in David chu adei behseh jeh le ama akingailut banga angailut jeh in a-itih a kikhenpi lou dingin akikah lhon'ah kihahselna khat asemin ahi.
4 Jonathan in hiche akihahselna melchih nan, achunga kai asangkhol chol chu asut lhan asilpeh in, chule avonho, achemjam le athalpi chule akonggah geiyin David apetan ahi.
5 Chuti chun Saul in David chu asolna lam lam'ah achejin alolhing sohkeiyin ahi. Hijeh chun Saul in asepaiho chunga gallamkai dingin atungin ahile, mijouse jong achung ah akipah cheh un ahi.
6 Israel miten galjona ahin nei jouvun inlama ahung kile kit un, David in Philistine te ahintha jouvun, khopi jousea nupiho ahung potdoh un, Saul lengpa ahung kimupi uvin ahi, numei hon khongcha le tumging thei toh thon kipahtah in lam pumin la asauvin ahi.
7 Vailhun na a alasah u chu hiche ahi:
“Saul in asang asangin athat in,
David in asangsom asangsom in athat e!” tin alachoiyun ahi.
8 Hiche chun Saul nasatah in alunghan sah in, “Hiche hi ipi ham? Ama hon David achoisangun, sangsom athat e atiuvin, kei sangkhat that in eiseijun. Abankit tengleh lengin hin kitun kit taveh tau!” atin ahi.
9 Hijeh chun, hichenia kipat chun, Saul in David chu thangthipna mitvet in avepan tan ahi.
10 Ajing nikho ma-man Pathen a kon'in lhagao phalou Saul chungah ahung chukit in, insunga angol pen bangin apengin ahile, David in nidanga bangin, akhut in semjang asaijin ahi. Ahin Saul in akhut ah tengcha akichoijin ahi.
11 Chule hetman louvin, tengchan David chu akhon ahi, bangtoh khobeh ding agot ahin, ahinlah David in ana otdoh in ahi.
12 Pathen'in Saul adalhah a David aumpi jeh chun Saul in Daivd chu akicha lheh jeng tan ahi.
13 Hijeh chun Saul in, David chu sepai 1,000 chung’a lamkai dingin akoiyin gamla tah in asolmang tan ahi. David in jong kitup tah in alamkaijin gal akonpi in ahi.
14 Chuin David Pakaijin aumpi jeh chun imalam jouse’ah alolhing lheh jengin ahi.
15 David lolhinna thu ho Saul in ajahdoh kit phat in, akicha cheh-cheh jeng tan ahi.
16 David in nasatah a, kituptah a gal alamkai jeh in, Israel te jouse le Judah nam mite jousen jong David chu angailu un, akipapi lheh jengun ahi.
David In Saul Chanu Akichenpi
17 Nikhat hi Saul in David kom'ah, “Ka chanu alenjo nu Merab khu naji dia pedinga kigongsa kahi. Ahinlah amasan nangma Pakaiya dinga gal hang mong nahi photchenna neipen,” ati. Ajeh chu Saul’in alunggel a, “Keima tah in katha sangin, Philistine tetoh kidou dingin kisol henlang hin that doh uleh,” tia angaito ahi.
18 David in, “Kei koi kahiya chule ka insung mite hi Israel a ipi hiya, keima lengpa tupa kahi ding ham? Chule kapa insung mite jong ima ahipoi” ati.
19 Hijeh chun, Merab toh akichenna ding phat ahung lhun phat in, Saul in, Adriel kiti Meholah mipi toh Merab chu akichen sah tan ahi.
20 Ahinlah Saul chanu Michal chun David chu alungset in, hichu Saul in ajahdoh phat in akipah lheh jengin ahi.
21 Hichun Saul in alunggel in, “Hiche Philistine te khutna athina dinga phat kijen chomkhat ahi,” atin ahinlah Saul anivei nan David kom'a chun, “Katupa nahi tei ding ahitai!” ati.
22 Saul in avaipote kom'a chun, David jah a asei diu thu apen, “Lengpan nadei lheh jenge, chule keihon jong pha kasa lheh jeng uve, hijeh chun lengpa tupa nahi ding pha nasah louham?” tia aseipeh din ahil’e.
23 Saul avaipo ten hiche thu ho chu David kom'a aseijun ahile, David in, “Kei mivaicha, insung lhasam le mi nahsahmo, lengpa tupa a iti kapan thei ding ham?” tin ana donbut in ahi.
24 Chuin Saul mite hon hiche thu chu Saul kom'a aseidoh phat un,
25 Saul in David kom'a asei diu ahil kit in, “Lengpan mou lahman dia adei chu ahile amelmate chunga phulahna dinga Philistine te chep 100 tilou adang imacha angeh poi tin seipeh un,” ati. Ahinla Saul chun David chu Philisine te khut a thisah tei agot ahi.
26 Saul lengpa thil ngeh chu David in ajahdoh phat in kipahtah in asangtai, anikho kitep alhun masang'in,
27 David ama le amite akipatdoh un, Philistine te mi jani aga that un ahi. Hiti chun David in lengpan angaichat chu asuh bulhit peh in, chep kitan chu aga petan ahi. Chuin Saul in achanu Michal chu David ji dingin apetan ahi.
28 Pakaijin David aumpi ti kichen tah in ahetan, chule achanu Michal angailut dan ahetan ahi.
29 Saul in David chu aging cheh-cheh jengtan, hijeh chun Saul chu ahinkho lhumkeiyin David din amelma ahijom jing jengtai.
30 Philistine sepai ten aphatseh leh ahin nokhum jing jengun, ahin David hatna achang jing jengin, David min nasatah in akithang tan ahi.