16
Samuel In David Leng Dia Thao Anu
1 Tun Pakaijin Samuel kom'a, “Nangman phat sottah Saul chung changa pul nadou chu phaset tante, keiman ama chu Israel te leng ahina a konna ka paidoh ahitai, hijeh chun na thao theiyah olive thao kithun dim inlang Bethlehem’ah chetan. Hiche khopia cheng amin Jesse kitipa chu holdoh in, ajeh chu keiman achate lah a khat chu leng dinga ka lhendohsa ahitai,” ati.
2 Ahin Samuel in adongin, “Keiman hichu iti kabol thei ding ham? Hichepi chu Saul in jadoh henlang hileh eithalo ding ahi,” ati.
Pakaijin adonbut in, “Bong ala khat kikai inlang chen, chule Pakaiya dinga gan kilhaina a dinga hung kahi tin,” ati.
3 “Chule gan kilhaina ah Jesse kouvin, chuteng keiman achate lah a koipen chu kei dinga thao nanu ding ham ti chu na hetsah nange,” ati.
4 Chuin Samuel in Pakaijin ahil bang chun aboltai. Ama Bethlehem alhun phat chun, khopi sunga um upaho jouse chun kitihot pum-pum’in akimupi uvin, “Ipi adihlou um ham? Chamna puma nahungu hinam?” tin ana dongun ahi.
5 Hichun Samuel in, “Henge, keima gan kilhaina a dinga hunga kahi, na boncha uvin Pakaiya dingin kisutheng unlang gankilhaina a dingin cheu hite,” tin Samuel in adonbut in ahi. Chuin Samuel in Jesse le achate akou khom’in kisuhthengna kin agong’in, chule pumgo thilto a jong jao diuvin atem'un ahi.
6 Chuin amaho chu ahunglhun phat un, aman Eliab chu khatvei aven chule alungthim'ah, “Pakaijin alhendohpa hitei yinte!” tin agel’e.
7 Ahinlah Pakaijin Samuel kom'a aseijin, “Nangman atahsa poh ahilou le asandan chun vehih-in, ajeh chu keiman ama chu kadei lou ahi, ijeh inem itileh Pakaijin mihem thilvet banga avet ahipoi, ajeh chu mihem’in apolam melput avet ahin, Pakaijin vang alungsung avet ahi,” ati.
8 Chuin Jesse in achapa Abinadab chun Samuel anaijep a amasang’a ding din asol'in ahinlah Samuel in, “Ama jong hi Pakai lhendohsa chu ahipoi,” ati.
9 Aban’in Jesse in Shimea ahin koudoh in, ahinlah Samuel in, “Ama jong hi Pakaijin alhendoh chu ahipoi,” ati.
10 Chuti chun Jesse chate sagi jen chu Samuel angsung’ah ahin puilut un, ahin Samuel in Jesse adongin, “Pakaijin hiche ho hi khatcha alhengpoi,” ati.
11 Chuin Samuel in Jesse jah a, “Na chate hicheng bou hi hitam?” tia adoh leh,
Jesse'n adonbut in, “Aneopen pa aum nalaiye, ahinlah ama hi in’ah aumpoi, loujaova kelngoi le kelcha ho aching’e,” tin adonbut in ahile
Samuel in, “Ama chu gakou sah un, ama chu ahung lhun tokah a, toujong itoulou diu chule anneh twidon jong ibollou diu ahi,” ati.
12 Hiti chun Jesse in akou ding mi asol'in ahi. Ama chu mi tahsa phatah chule amit-ha hoitah ahi. Chuin Pakaijin, “Thao nu ding chu ama hi ahi,” ati.
13 David asopi teho lah a kon'in ahung ding doh in, hichun Samuel’in olive thao alan thao chu anu tai. Hiche nia kipan chun Pakai Lhagao chu thaneitah in David chung’ah ahung chutan ahi. Chuin Samuel Ramah ah akile tai.
David In Saul Thutanna a Na Atoh
14 Hiti chun Pakai lhagaovin Saul adalha tan ahi, chule Pakaijin ahinsol lhagao engse khat in Saul chu lunggimna le tijatnan abolgim lheh jengin ahi.
15 Saul asohte ho lah a phabep khat in akom'ah, “Tua hi Pathen a konna lhagao gilou khat in na suhgim ahi kaheuve,” atiuve.
16 “Hijeh chun, kapu, neisol’unlang semjang saithem khat gahol unge. Hitia lhagao engsen nahin phah phat-phat le ama chun semjang saiyin tin, chuteng damdoh kitji tan nate,” atiuve.
17 Hichun Saul in, “Apha lheh jenge, cheuvin lang semjang saithem tah mikhat gahol unlang, chule ama chu kaheng'a hin puijun,” ati.
18 Chuin asohte ho lah a mi khat in Saul jah ah, “Jesse chapa teho lah a khat, Bethlehem mi, semjang saithem tah, hiche goh chu hilouva mihangsan, gal-hat, galbolmi, ijakai hekhen themtah, chule mel-hoitah, chujongleh Pakaijin aumpi mi ahi,” ati.
19 Chuin Saul in thupolea mikhat Jesse henga thulhut ding’in asol'in, “Na chapa David kelngoiching chu neihin solpeh in,” ati.
20 Saul in David athum chu Jesse in anoppeh in, changlhah toh, lengpitwi haikhat, chule kelnou khat, sangan khat apohsah in ahi.
21 Chuin David Saul kom’ah achen, Saul chu ajen pan tan ahi, Saul in David angailu lheh jengin chule David chu Saul galvon pon apang tai.
22 Chuin Saul in Jesse kom'a thu athot in, “Lungset tah in David hi kakom'ah kakin bol in pang jeng tahen, ajeh chu achung’a kalung alhai lheh jengin ahi,” ati.
23 Chule Pathen'in ahinsol lhagao engse chun Saul ahin phah tengleh, David in semjang chu asaipeh jiteng, Saul chu ahung limdohjin chule lhagao engse chun adalhaji in ahi.