Pol iratuluwi nongan iya kili hu
Rom
Nongan imu
Pol iratuluwi nongan iye, paratesah, inamiliy para kiya nime hu Kristen mepo hutora kol namandran masih Rom. Yiy inamiliy para kiropolo hu hape na, pe kamulan andre kiya pohowe nongan kiya kol namandran iya Spen. Pe nongan Pol iratuluwi aro, ara iwong ngawan iya nongan hiyan ata Kristus, pe iya mipwan tahu ndramat mepo hu ngara koho ndruwa Yesu.
Pe mamu Pol iwong ipa ndrokololang iya kili hu Kristen para Rom, pe ipwai iya kili hu tehe ngara kitohun lang masih, pe kisok Ngindrai para kisopwat hu. Pe iyamulan ipohowe ndroiyi lohongai para nongan yiy iratuluwiy ipa, “iyau sai para lohongai ndrisiyon opu, worou lahiy para karayah ndramat imwonen kiya mbulmara Ngindrai” (1:17). Pol ipa toro, konan hu ndramat masih, konan yihu ndraye Yutah, ndre hu ndramira lah, yihu masih ara ngara hu kambusi pakut mwomwan. Pwen tehen torako, Ngindrai koyun iskirani hu, pe ikonuhi hu. Pe ndramat mepo ipwotisingi lohongan iya kili Yesu Kristus, ara Ngindrai andre kisopwat yiy, pe yiy andre kirayah kowase Ngindrai, pe nali Yesu Kristus.
Kapa Ngindrai kisopwat ndramat hamou, pwen ndramat ara, ara andre kiwiri taleh howen. Pe Ngindrai ara andre kiro kili yiy, pe Mwoiwa Ngindrai andre kipep kiro kili yiy. Pwen tehen torako pakut mwomwan pe kimat, ara pwoke para aliy pwi, pe kinlahiy para kiramwaitini yiy pwi, pe andre kintayah namandran tan pwi. Pe ita sapta 5-8, ara Pol iwong iya ndroiyi lonhongai para nongan para pwahanou ta Ngindrai, pe iya pwoke ta Mwoiwan Haiyan, ita nondriya hu ndramat mepo hupwotisingi lohonga hu iya kili Yesu.
Pe ita sapta 9-11, ara Pol iwong iya nopwaran handra namandran atan. Pol mbukenan ara yiy hamou ndraye Yutah, yihu ara hu ndraye hapat mepo koluw kinna Ngindrai kintakinima hu pwen tehe yihu ndramiran imwonen. Hapeko yihu ndramat soyon iya para Yutah, ara huiki ndruwa hu iyata Yesu. Pe yihu ndramat soyon para mawen ara hu rayah ndramira Yesu, hapeko yihu para Yutah imwonen, ara pwi. Pe Pol ipa ara mwomwan atahu Yutah mbukenan. Yihu kanyirowe melit namandran aro mepo Ngindrai nakimbusiy kiya kili hu. Hapeko Pol ilohonganiy tehe kamulan yihu ndramat para ndraye Yutah i, ara andre hu karayah hu ndraye Yesu.
Ita nongan Pol iratuluwiy iyahapwen, ara iwong iya kultuw atahu Kristen para hu koro ndruwan. Pe iwong iya kultuw para kanamili hamou-hamou tisingiy. Pe yiy iwong i iya kultuw para kambusi mbulya Ngindrai, pe kultuw para koro pahandra kapman, pe kultuw para kasopwat hamou-hamou.
1
1 Yo Pol, yo ara ndramat hamou para poya mbulen ta Kristus Yesu mepo Ngindrai kiniyoh yo tehe aposel hamou pe iyki yo para pohoweya nongan hiyan atan—
2 nongan hiyan mepo kinpwatisingiy koluw kinna iyau kili hu poropet tan ita nondriya hu Nongan Haiyan
3 mepo iwong iyata Norun Kamai. Yiy ara irayah tehe ndramat pe yiy ara ndraye King Tepit hamou.
4 Pe Ngindrai ipwaingani yiy tehe Norun Kamai iro mwonen itine kimat iyau pwoke ata Mwoiwan Haiyan. Pe yiy ara Yesu Kristus mepo Yapan torou.
5 Pe iyau ngala Yesu Kristus opu, Ngindrai iyki pahas pe mbulen para aposel isa kili worou, para kaluwani hu ndramira lah masih para koro ndruwa nongnan kiya lohongai ndrisiyon iya kili Yesu.
6 Pe wawu yi, ara para sura yihu Ndramira Lah mepo Yesu Kristus kiniyoh hu, pe wawu ara atan.
7 Pe yo uratuluwi nongan iya kili wawu ndramira Rom masih kene mepo Ngindrai ndriyan kinmbulihi wawu, pe kiniyoh wawu para karayah hu ndramiran haiyan:
Pahas pe ndriya wayis iyau kili Ngindrai Tamarou pe iyau kili Yapan Yesu Kristus isa kili wawu.
Pol inamiliy para kiya saisai kiya Rom
8 Pe nakuwong kimu toro, yo urawuloh iya kili Ngindrai ato iyau kili Yesu Kristus isa kili wawu masih, paratesah, lohongai ndrisiyon tawawu, ara kantiyaniy kinna kol pwan masih kene.
9 Pe Ngindrai ara andre kipwokeyani nongno tehe upo mbulyan iyapolo ndriyo masih iya pohoweya nongan hiyan ata Norun Kamai. Pe lang masih ngara kuro lohongani wawu.
10 Pe lang masih ngara kutohun tehe kiya namiliwai pwokeyan ta Ngindrai, pe kipa hiyan kisato, pwen andre kusa saisai kusa kili wawu.
11 Yo unamiliy imwonen para kusa nime wawu, para kusaiki yukyuk hayah ta Mwoiwan Haiyan kisa kili wawu para kipwokeyani wawu—
12 pwen pe andre kipwokeyani lohongai ndrisiyon tawawu pe lohongai ndrisiyon ato, pe andre kipwokeyani ndriya worou hamou-hamou.
13 Wawu nali yo unamiliy para wawu kapahasaniy tehe lang soyon ngara kulohonge para kusa kili wawu, pe kusopwat wawu karayah Kristen tehe kunmbusiy kinna kili hu Ndramira Lah hayah. Hapeko melit isingori yo pe kunsa nime wawu pwi.
14 Pe Ngindrai iyki mbulen isa kili yo para kusopwat hu Krik pe hu Krik pwi yi, pe hu ndramat hu pahas iya lohongai pe hu ndramat lohonga hu kinpahas pwi.
15 Tehen tora ko ndriyo ara itine para kupohowei nongan hiyan kisa kili wawu mepo tora Rom i.
16 Yo kunhomasi para kupohowe nongan hiyan pwi, paratesah, nongan hiyan ara pwoke ta Ngindrai para kisopwat hu ndramat masih mepo hupwotisingi lohonga hu: yihu Yutah imu, pe iyamulan hu Ndramira Lah.
17 Paratesah, iyau nongan hiyan opu pwen kultuw imwonen ta Ngindrai kinsa yelan ngawan—pe yiy mepo kultuwayin imwonen iya kili Ngindrai iya lohongai ndrisiyon, ara andre lohongai ndrisiyon tan kimbusi yiy kiro mwalen, tehe pwayan kinpwai: “Yiy mepo kultuwayin imwonen, ara lohongai ndrisiyon tan andre kimbusi yiy kiro mwalen.”
Ndrina lokuh ta Ngindrai iya kili hu ndramat humbusi pakut mwomwan
18 Pe ndrina lokuh ta Ngindrai iyau kol paingan yang, ara kintayah ngawan kinsa kili hu masih mepo hu ngara kambusi kultuw mwomwan, pe kultuw pwassin. Pe hu ndramat mepo hu isingori nongan ndrokonan iya hu kultuw pwassin tahu.
19 Paratesah, nongan ndrokonan ata Ngindrai ara hu kanpahasaniy, Ngindrai kinpwainganiy kinna ngawan kili hu.
20 Pe hunimei iya mara hu pe lohonga hu kinileu iya tesah mepo kanmangsaniy, pwen hu ndramat hu kanlahiy para hu kapa pwi kiya aliy, ara pwi. Paratesah, iro mwonen Ngindrai imangsani kol pwan, ara ipwaingani hu kultuwayin—pe ipwaingani pwoke tan mepo andre kinto-kinto, pe kultuwayin mepo ihohin.
21 Paratesah, konan hu kanpahasani Ngindrai, hapeko hu kanhari ngalan tehe yiy Ngindrai ara pwi, pe hu kanrawuloh kinna kili yiy pwi, pe lohongai hiyan kinto kili hu pwi, pe lohongahu ara iya pwi.
22 Pe konan hupwai tehe lohongai waison iro kili hu, hapeko lohongai waison kinto kili hu pwi
23 pe hu kantotohun kinna kili Ngindrai mwalen pwi, hapeko hu totohun iya kili hu sumwoiwa hu nombungong tehe ndramat mepo kinmat, pe iya kili hu norukan para wohowoh, pe hu kan para tokuyai, pe hu kan para seselek.
24 Pwen tehen tora ko, Ngindrai itali hu huya nondriya hu namiliwahu para hu kultuw pwassin tahu, pe iya kultuw para pilah mepo imbusi hu konto howen pwi, pe humbusi kultuw mwomwan para kiyki masirai kiya nombuwe hamou-hamou tahu.
25 Pe hu suluyani nongan ndrokonan ta Ngindrai iya nongan pwasoyou. Pe hu totohun pe hupo mbulya hu melit mepo Ngindrai imangsani, hapeko hu kantotohun kinna kili Ngindrai mepo imangsani hu melit pwi—yiy mepo andre koro hari ngalan lang masih. Ndrokonan.
26 Paratesah, tunan aroko, pwen Ngindrai itali hu para hu kambusi hu kultuwayi pilah para kiyki masirai. Pe yihu pihin tahu ara husuluyani hu kultuw hiyan para yesowai pe huho ndruwa kultuw mwomwan iya kili hamou-hamou tahu.
27 Pe hu kamai ara humbusiy tehen aliy i, husuluyani kultuw hiyan para yesowai, pe kultuwayi pilah ara ipakarawani hu pe hupo pilah iya kili hamou-hamou ta hu. Pe hu kamai ara hurakultuw mwomwan iya kili hamou-hamou pe yihu wiri kora mwomwan tahu iya hu kultuw mwomwan tahu mepo hu mbusiy.
28 Pe mbuwali hu para hu kalohongani lohongai iman ta Ngindrai, pwen Ngindrai itali hu huya lohongai mwomwan tahu para hu kambusi tesah mepo nonombun para hu kambusiy.
29 Pe yihu kanpep kinna hu kultuw pwassin handra-handra, kultuwayi sinai, mwolou pe kultuw pwalan. Pe hu namili melit ta hamou, pe hutingundru ndramat, hu hingas, pe hu pwasoyou, pe hupwotisi ndramat. Pe hu ndramat para pwahalte,
30 pe hu ngara karasusut nongan, pe hu ngara kamwisnani Ngindrai, pe hu ndramat para lomei o mwaihei, pe hu ndramat para tandroindroi, pe hu ngara kasikiye hu, pe humburi lohongai para kambusi kultuw mwomwan, pe hu konho hilingi tamahu pe tinahu pwi;
31 pe lohongahu inun, pe lohongahu ndrisiyon pwi, ndriyahu kinmbulihi hu ndramat pwi, pe koisirai kinto kili hu pwi.
32 Pe konan yihu pahasani pwahanou imwonen ta Ngindrai tehe hu mepo humbusi hu kultuw tehen tora, ara andre hu kamat kaliy. Pe hu konto wayaniy para kambusi hu kultuw aro ko pwi, hapeko yihupa hiyan iyata yihu mepo hu ngara koro mbusiy i.