Nongan ratuluwiy iya kili
Hu Hipuruw
Nongan imu
Nongan ratuluwiy iye, ara para kisopwat hu Kristen para ndrokoyirayi sih, mepo yihu pakatali lohongai ndrisiyon tahu, paratesah, yihu ndramat hayah ara huiki hu huya pwan pe huiki nopwaran iya kili hu. Pwen pe nongan ratuluwiy, ara para kipwokeyani lohongai ndrisiyon tahu, pe ipwai iya kili hu iya mbulen namandran Ngindrai kinmbusiy pwen, iyau kili Kristus Yesu. Pe Kristus opu, ara ngara kipwainganiy kisa kili tou, kiya kultuwayi Ngindrai ndrokonan.
Pe nongan ratuluwiy aro, ara iwong iya melit namandran matihin. (Nongan sahin 1) Yesu ara yiy noru Ngindrai ndrokonan. Pe tandrohonga Yesu iro kol pwan, ara ikuni nopwaran pe ngandran soyon, pwen iya kultuw aro ko, Ngindrai imbusi Yesu irayah ndramat imu, para sopwat hu ndramat masih (2:10). Pwen tehen tora ko, Yesu ara iramwaitini hu poropet para koluw, pe hu angelou, pe Mose mbukenan, yiy ara iramwaitini yiy i. (Nongan luhin 2) Pe Ngindrai mbukenan, ara irakinima Yesu para kiro pris kinto-kinto. Pe yiy ara iramwaitini hu pris para Yutah i. (Nongan tihin 3) Pe Yesu ara yiy pris ihohin ita kol paingan yang, pe ilahiy masih para kikonuh hu ndramat mepo hu pwotisingi lohongahu iya kili yiy. Pe hu kultuw para katotohun kiho ndruwa nongan para pwahanou ta Mose mepo iwong iya aliy ara, ara irayah tehe sumwoiwa mbulen namandran mepo Yesu imbusiy.
Pe nongan ratuluwiy iye, ara para kipwokeyani lohongai ndrisiyon ta hu ndramat, pwen tehen torako, nongan soyon para lohongai ndrisiyon pwokeyan ata hu ndramat para Yisrayel para koluw (sapta 11). Pe iwong ipa, konan sehe nopwaran kirayah kiya kili hu, hapeko yihu ara kapwotisingi lohongai ndrisiyon tahu kipoo yihu kamat. Pe yihu kanimnim kiya kili Yesu, pe hu koho ndruwa kultuwayin, pe nondriya hu nopwaran, pe ngandran hu kaya aliy, ara hu karahatini hu.
1
Noru Ngindrai Kamai ara ihohin iya iyata hu angelou
1 Koluw kinna, Ngindrai kinwong pwen lang soyon iya kinna kili tumburouhu iyau kili hu poropet, ara iyau hu sai handra-handra.
2 Hapeko nondriya hu lang mahapo nakiyahapwen, Ngindrai kinwong pwen kinsa kiltou kinyau kili Norun Kamai mepo kintakiniman, para kirayah mbukena hu melit masih. Pe iyau kili yiy opu Ngindrai imangsani kol pwan pe kol paingan yang masih.
3 Norun Kamai, ara yiy mbukena nganngana nonowa Ngindrai, pe iwiri kaipisa Ngindrai imwonen, pe melit masih irayah ara ngara kipwahatiniy kiyau pwoke pwokeyan para nongnan. Iyamulan para kintali hu pakut mwomwan ta hu ndramat masih kinhipwen, pwen iya imirampwan nima Ngindrai mot mepo Yiy Pwokeyan Masih ita kol paingan yang.
4 Pwen pe Norun Kamai ara, ara yiy ihohin iyata hu angelou, pe ngalan mepo Ngindrai iykiy, ara ihohin masih i iyata hu angelou.
Norun Kamai ara yiy iho hin masih iyatahu angelou
5 Paratesah, Ngindrai kinho pwai kinna ta hu angelou kipa,
“Wou ara Noru Kamai;
pe mahapo kuntayah Tamam”
Ndre kipa,
“Yo andre kurayah Taman,
pe yiy andre kirayah noru Kamai”
Ara pwi.
6 Pwen tehen tora ko, iro mwonen Ngindrai ipwandrisa norun ndrohan kamai isa kol pwan, ara yiy ipa,
“Hu angelou masih ta Ngindrai, ara hu katotohun kiya kili yiy.”
7 Pe Ngindrai iwong iyata hu angelou ipa,
“Yiy imbusi hu angelou tan hurayah mwomwoyou,
Pe ndramiran hu para poya mbulyan, ara imbusi hu rayah ngana mwan.”
8 Hapeko iwong iya kili norun Kamai, ara ipa,
“O Ngindrai, ndrohonoku mipwan para king tam ara andre kinto pe kinto,
pe kultuw imwonen tam ara andre kiro mu tehe nes para kingtom tam.
9 Wou ndriyam imbulihi kultuw imwonen pe amwisnani kultuw pwassin,
pwen tehen tora ko Ngindrai mepo Ngindrai tam, ara itumwi ndraikei para pwesai isa kili wou, pe iyki wou ahohin iyata hu susuyam masih.”
10 Ngindrai iwong toro yi ipa,
“O Yapan, koluw kinna wou amangsani ndroiyi kol pwan,
pe hu kol paingan yang ara mbulya nimam.
11 Pe yihu andre kahapwen, hapeko wou andre anto;
pe yihu andre kamwiyih tehe koyau hamou saken.
12 Wou andre akuimwani hu tehe koyau hamou para tamburah;
pe andre asuluyani hu tehe koyau hamou.
Hapeko wou andre aro tehen tora ko,
pe hu hayou tam andre kinhipwen pwi.”
13 Pe Ngindrai kinho pwai kinnata angelou hamou kipa,
“Ampwan kiyapwen te nimo mot,
kipoo kuiki hu ndramat hu mwisnani wou
kaya pahandra pwelekam.”
14 Hu angelou masih, ara hu mwomwoyou para poya mbulen Ngindrai, pe ipwandrisa hu, para hu karayah pwandrendres ta hu mepo Ngindrai andre kisopwat hu.