Nongan Pol iratuluwiy iya kili hu para
Epesus
Nongan imu
Ndroiyi lohongai para nongan ratuluwiy aro, ara toro, Ngindrai nakirawurani melit masih kiro pahandra Kristus, hu melit masih para kol paingan yang pe para kol pwan, pe Kristus ara andre kiro payan para melit masih (1:10). Pe Ngindrai andre kirakelahani hu ndramiran mbukenan, pe andre hu kappai tisingiy kiyapolo Kristus, pe hu koro ndriya sih.
Pe nongan imu mepo Pol iratuluwiy, ara iwong soyon iya koisirai ta Ngindrai, ara ngara kimbusi hu ndramat masih kapwotisingi lohongahu kiya kili Kristus, pe para hukambultere kiya harong pe karayah hapat opu. Pe iyau mbulya Yesu opu, Ngindrai ikonihi hu ndramat, pe iyki Mwoiwan Haiyan iya kili hu tehe kiniman para kimbusi melit masih hiyan kiya kili hu tehe kintandrangan kinna aliy (1:14). Pe nongan luhin mepo Pol iratuluwiy, ara iwong tehe yihu Kristen ara hukappai kiyapolo Kristus, pwen tehen torako, yihu andre karo ndriya sih, pe hu andre koho ndruwa hu kultuwayi Ngindrai mbukenan.
Pe iripo nongan aro, Pol ngara kiwong kiya hu nongan pwandritiye para kipwainganiy kileu tehe yihu kappai tisingiy kiyapolo Kristus, pe yihu karayah hapat opu. Pe yiy ipa, hu ndramira Ngindrai ara nombuwe hu ara tehe hamou opu, pe Kristus ara yiy paya nombuwen ara (4:1-16). Pe yihu ndramira Ngindrai i, ara tehe seu hawum, pe Kristus ara pahut mwayih masih para seu ara (2:19-22). Pe hu ndramira Ngindrai ara tehe pihin hamou, pe Kristus ara tehe nambuyu pihin ara (5:22-32). Pe iripo nongan ratuluwiy iye, worou ngara kanimei nokulaniy hiyan iya, iya hu melit hiyan mepo Ngindrai andre kimbusiy kiya kili ndramiran hu.
1
1 Yo ara Pol, pe iyau namiliwai pwokeyan ta Ngindrai opu, yo urayah aposel hamou ata Kristus Yesu.
Yo uratuluwi nongan iye iya kili wawu yau haiyan ta Ngindrai tora kol ngawan Epesus, mepo wawuiki lohonga wawu ndrisiyon iya kili Kristus Yesu.
2 Pahas pe ndriya wayis iyau kili Tamarou Ngindrai pe Yapan Yesu Kristus isa kili wawu.
Kahari ngala Ngindrai iya hu lomwes iyau kili Mwoiwan Haiyan
3 Worou kahari ngala Ngindrai Tamarou Yapan Yesu Kristus, yiy mepo itoholi worou iya hu lomwes haiyan para kol paingan yang para mwoiwa ndramat iyau kili Kristus.
4 Paratesah, Ngindrai kinmangsani kol pwan mapu, kintakinima rou pwen atan, yiy para koro haiyan pe koro mwonen mbulmaran.
5 Pe iyau kultuw para namiliwai tan, yiy kintakinima rou pwen tehe norun kamai iyau kili Yesu Kristus, iyau namiliwai pwokeyan tan pe kultuw hiyan—
6 pwen tukahari ngala Ngindrai iya nonowa pwoke para pahas tan, mepo kiniykiy pwen o mwaihei, kinsa kiltou iyau kili Norun Kamai mepo ndriyan imbulihi yiy pe neren imwonen.
7 Pe iyau ndreye Norun Kamai opu, yiy irokonuhi worou tu mui, pe irapiyani hu pakut mwomwan torou. Pe iyapolo pahas ta Ngindrai mepo namandran iya,
8 mepo niman ipopo ko pe kiniykiy pwen kinsa kiltou, iyapolo lohongai waison masih pe lohongai ileu.
9 Pe Ngindrai kinmbusi namiliwan pwokeyan ita kohon lohongan isa yelan ngawan isa kiltou iyau hiyan tan, pe imbusiy iyau kili Kristus.
10 Pe lohongai kokohon mepo Ngindrai andre kimbusiy kiya hapwen kiro mwonen lengen imwonen—ara andre kirawurani hu melit masih mepo imangsani hu kasa harong, melit masih para kol paingan yang, pe melit masih para kol pwan. Pe Kristus andre kihohin kiya ata hu melit masih.
11 Pe melit masih hurayah, ara iyau namiliwai pwokeyan ta Ngindrai mepo kinlohonganiy pwen iro; pe Ngindrai kintakinima rou para karayah yowen imwonen, pe tukapai kiyapolo Kristus, paratesah, iyau lohongan imwonen mepo kinmwaniyaniy pwen koluw kinna.
12 Pwen pe worou mepo tuho mu para kaiki lohongarou iya melit itapo isa iyau kili Kristus, ara tukahari ngala Ngindrai kiya pwoke tan.
13 Pe wawu yi wawu rayah yowe Ngindrai iro mwonen wawu hilingi nongan ndrokonan, Nongan Hiyan mepo iyki sopwat hiyan isa kili wawu. Pe wawu pwotisingi lohonga wawu iya kili Kristus pe wawu rayah hamou, pwen Ngindrai irakinima wawu tehe atan mbukenan, ara iyau kili Mwoiwan Haiyan mepo kintandrangan kinsa kili wawu.
14 Pe Mwoiwan Haiyan ara ipa hiyan iya hu memelit mwayih torou kipoo Ngindrai kikonuhi hu kamui, hu mepo andre karayah tan mbukenan–pe tukahari ngalan kiya pwoke tan.
Pol irawuloh pe itohun
15 Paratesah, iya hu melit masih mepo Ngindrai kinmbusiy iro mwonen uhilingi lohongai ndrisiyon tawawu iyata Yapan Yesu pe namiliwa wawu iya kili hu yowe Ngindrai,
16 ara kunho tohai para kurawuloh kiya kili Ngindrai kisatawawu pwi, pe ngara kulohongani wawu kiro mwonen ngara kutohun
17 Pe ngara kuro wayaniy para kusok Ngindrai Yapan torou Yesu Kristus pe Tamarou mepo mangana pwoke tan para kiyki lohongai waison, pe nongan kokohon kisa kili wawu, pwen andre akapahasani yiy hiyan.
18 Yo utohun tehe lohonga wawu andre kileu pe akanime nganan, pwen andre akapahasani melit mepo itapo isa, mepo yiy kiniyoh wawu kinna aliy, pe hu lomwes pe melit hiyan soyon atan mwayih mepo kintandrangan kinna kili yowen hu haiyan.
19 Pe iya pwoke namandran atan mepo iripo pombulen kiltou mepo tupwotisingi lohongarou iya kili yiy. Pe pwoke ara ihisoule ko tehe pwoke pwokeyan atan,
20 mepo iyau pwoke tan aro ko, yiy ihingini Kristus itine kimat, pe kiniyki yiy ita mipwan nima Ngindrai mot ita kol paingan yang.
21 Pe Kristus ara ihohin iyata hu pohon masih para kol paingan yang, pe hu pwoke nopwaran masih, pe hu mwomwoyou masih para hu pwoke nopwaran handra-handra, pe ngala hu melit masih mangalahu, para hu lang mahapo ko, ara pwi, hapeko para lang itapo isa yi.
22 Pe Ngindrai iyki hu melit masih huya pahandra pwoke ta Kristus, pe irakiniman para yiy kiro paya melit masih ta hu mepo hurokum.
23 Pe hu mepo hurokum ara, ara hu nombuwe Kristus, mepo isapep pe isilihi topwe hu melit masih iya sai masih kene.