4
Vantung ah Pathian Biakna
1 Hi sia zawkciang in ka en a, en vun, vantung ah kongkha ki hong hi: amasabel ka zak aw sia keima hong paupui lemle taw kibang hi; hong kato tan a, maisang thupiang tute kong lak tu hi, hong ci hi.
2 Thakhatthu in Thaa sungah ka om a: en in, vantung ah kumpi tokhum khat ki koi hi, taciang a tungah khat to hi.
3 A to pa sia enleang jasper le sardine suangmanpha taw kibang hi: kumpi tokhum kimkot ah sa-ngun om a, tua sa-ngun sia, emerald suangmanpha taw kibang hi.
4 Kumpi tokhum kimkot ah tokhum kul le li om hi: tua tokhum te tungah upa kul le li te a to ka mu hi, amate in puanpak sil uh a; a lutung ah zong kham lukhu te khu uh hi.
5 Kumpi tokhum pan in khualeng vazial hi, vanto vadum a, aw tampi nging hi; kumpi tokhum mai ah a kuang mei-inn sali om a, tua te sia Pathian i Thaa sali te a hihi.
6 Kumpi tokhum mai ah crystal suangmanpha bang ahi limlang tuipi khat omhi; kumpi tokhum a lai le a kimkot, a nung le mai buppi mit bebek a dim nganhing li om hi.
7 A masabel nganhing sia tawpi bang hi a, a nina nganhing sia khuino taw kibang hi, a thumna nganhing sia mihing maitang bang nei a, a li na nganhing sia a leang muvanlai taw kibang hi.
8 Tua nganhing li te in tha luktek nei uh a; a sungah mit bebek taw kidim hi: sun le zan tawlnga ngawl in, Thiangtho, Thiangtho, Thiangtho, na theampo a hi thei Topa Pathian, a bosa hun, tu hun le mailam hun ah a om tawntung pa, ci uh hi.
9 Tua nganhing te in a tawntung in nungta a, kumpi tokhum tung a to pa tungah minthanna, upatna le pokna te a piak uh ciang in,
10 Upa kul le li te zong kumpi tokhum tung a to pa i mai ah boksuk uh a, a tawntung a nungta pa bia in, amate i kham lukhu te sia kumpi tokhum mai ah khiasuk uh a,
11 Maw Topa, minthanna, upatna le vangletna te nga tu in na kilawm hi: banghangziam cile, nangma in na theampo na bitphua a, nangma lungkimna tu in na bitphua hi, ci uh hi.