3
Da' bchaḻj Ẕwa, benne' bezóe' benách ka' nis
(Mt. 3:1‑12; Mr. 1:1‑8; Jn. 1:19‑28)
1 Kate' ba zej chi yiz ẕnna bia' Tiberio, benne' Sésar, dot yežlyó nga, ẕnna bia' Ponsio Pilato gan nbab Judea, na' Herodes ẕnna bi'e gan nbab Galilea, na' Lip, biche' Herodes na', ẕnna bi'e gan nbab Iturea, na' gan nbab Trakonite, na' bennen' lie' Lisanias ẕnna bi'e gan nbab Abilinia.
2 Kate' ža ka' Anás ḻen Kaifás, zej nake' bx̱oz blo ka', na' ḻa' na'ze Dios bcháḻjḻene' Ẕwa, ẕi'n Secría, kate' ne zoa Ẕwan' ḻo latje dach.
3 Wdá Ẕwan' do ẕente žoa'a yego Jordán, na' bchaḻje' kan žaḻa' yezoagak benách ka' nis, benne' ka' žeyát ḻáže'gake' nich yenít ḻaw Dios doḻa' da' zej nbage'e.
4 Gok da' ki kan nyejw ḻe'e yich la'y, dan' wnná Isaías, benne' bchaḻje' ḻo wláz Dios ža ni'te, dan' ẕnnan:
Benle chi'i to benne' wnníe' zižje ḻo latje dach, wnné':
“Le wpá' nez nich žin X̱anžo Dios gan zoale.
Le yebéj li nez las ka' gan tie'.
5 Le yeschá' yógo'te gan zej že' bloj ka'.
Le gon lache' yógo'te ya'a sibe ka', na' ya'ado' ka'.
Le yebéj ḻi nez legw ka',
na' le gon chawe' nez yej ka'.
6 Yógo'te benách ḻé'egekle' bennen' seḻa' Dios, bennen' yeslé' ḻégake'.”
7 Kate' bžojgak benne' zan ḻo yež ka' nich yezóagake' nis ḻo na' Ẕwan', ḻe' gože' ḻégake', na' wnné':
—Ḻe'e, lježgak bele snia ka'. ¿Biẕ chen' žénelele yezoale nis? ¿Zoa no benne' gože' ḻe'e bi chog Dios chele gatle cha' yezoale nis?
8 Na'a, le gon da' gak bian' ba beyát ḻáže'le, na' bi sa' ḻáže'le, bi nnale: “Dios bi choge' cheto' gatto' dan' nakto' ẕa'só Bran” dan' žapa' ḻe'e, gak Dios ke'e yej ki, na' gone' ga yeyákgaken ẕa'só Bran na'.
9 Nakle ka yag ka'. Ba ẕbez ya wage nich chogen yag ka'. Bíte'teze yag da' bi ẕbian da' ẕix̱ chen, chóggaken', na' wzéygaken' ḻo yi'.
10 Naž benách ka' nníta'gake' ga na' wnnábgekle' ḻe', na' wnnágake':
—¿Nakx̱kze gonto'?
11 Bechebe Ẕwan', na' gože' ḻégake':
—No benne' de chope ẕe' žaḻa' wneẕjwe' ton che no benne' bi de chie'. No benne' de da' žawe', ḻezka' žaḻa' chisen' chegak benne' ka' bi de da' gáwgake'.
12 Ḻezka' baḻe benne' wechiẕjw ka', benne' ẕchíẕjwgake' benách ka' ḻo wláz yež zi'to', bžíngake' ga na' nich yezóagake' nis. Wnnábgekle' ḻe', na' wnnágake':
—Benne' wsedle, ¿biẕ žaḻa' gonto' neto'?
13 Ẕwan' gože' ḻégake':
—Bi wchíẕjwžele kan wnná benne' ẕnna bi'e ḻe'e.
14 Ḻezka' baḻe benne' žjake' ḻo wdiḻe wnnábgekle' ḻe', na' wnnágake':
—¿Cheẕe neto', biẕ žaḻa' gonto'?
Ẕwan' gože' ḻégake':
—Biž wcheble nitó benne' nich ka'le bi da' de chie'. Biž nnale chegak benách ka' da' wen ḻaže' nich gonle ga chíẕjwgake' ḻe'e, san le chaz ḻaže' ka da' náẕjwle.
15 Ḻezka' benne' ka' želbeze' Bennen' seḻa' Dios, wnníta'gake' ga na', na' žsa' ḻáže'gake' cha' nak Ẕwan' Benne' Criston'.
16 Bechebe Ẕwan', na' gože' yógo'tegake', na' wnné':
—Da' li neda' žezóa' ḻe'e nis, da' ẕḻoe'elen nakle ka benne' ka' ba gótgake', na' zej nzi'e yeḻa' nban da' yoble, san za' Bennen' wchize' ḻe'e Dios Be' La'y, na' da' naken yi' chie', na' Dios Be' La'y na' gonne' ḻe'e yeḻa' nban da' zejlí kanne. Bennen' ze'e napže' yeḻa' wnná bia' ka neda', na' neda' bi naka' zi kweja' ẕele'.
17 Nox̱e' da' žẕen yi' chie', na' wlobe' ẕoa' stribe chie', dan' ẕḻoe'elen kan gaken chegak benách ka'. Wtobe' ẕoa' striben', na' ko'o chawen', san bebe chen wzeyen' ḻo yi' da' batkle yoḻen.
18 Kan zej nak diža' ki, na' yebaḻe diža' zan bzejni'ile' benách ka', na' bzenle' ḻégake' diža' chawen'.
19 Ẕwan' bdiḻ diže'e Herodes, benne' wnná bia', dan' zóaḻene' Herodías, ẕo'le Lip, benne' biche'e, na' dan' žone' da' zan da' kegle.
20 Naž ben Herodes na' to da' kegle da' ẕenže, bsejwe' Ẕwan' liž ya.
Žezóa Jesús nis
(Mt. 3:13‑17; Mr. 1:9‑11)
21 Kate' ža ka' kate' bi na' nyejw Ẕwan' liž ya, na' žezóe' benách ka' nis, ḻezka' bezóe' Jesusen' nis. Kate' Jesusen' ne ẕcháḻjḻene' Dios, wyaljw ya'abá,
22 na' bḻa' ḻaw Dios Be' La'y. Ẕnne'e ka to plomdo', bian' betjba', na' bžinba' gan zoa Jesusen'. Benle' chi'i to Benne' ẕchaḻje' ya'abá che Dios, na' wnné':
—Le' nako' Ẕi'na'. Nži'ila' Le', na' žaz ḻaža'a Le'.
Kan zej nak x̱a x̱na' wdé ka' che Jesús
(Mt. 1:1‑17)
23 Katen' Jesusen' wzó ḻawe' žone' x̱chin Dios, zeje' Ḻe' ka chi žoa yiz. Žékgekle benách nake' ẕi'n Jwsé. Jesusen' nake' ẕa'só Elí.
Bennen' nake' x̱a Lia, x̱na' Jesusen'.
24 Elí na' goke' ẕi'n Matat.
Bennen' goke' ẕi'n Lebí.
Bennen' goke' ẕi'n Melki.
Bennen' goke' ẕi'n Jana.
Bennen' goke' ẕi'n yetó Jwsé.
25 Jwsé ni goke' ẕi'n Matatías.
Bennen' goke' ẕi'n Amós.
Bennen' goke' ẕi'n Nahum.
Bennen' goke' ẕi'n Esli.
Bennen' goke' ẕi'n Nagai.
26 Nagai na' goke' ẕi'n Maat.
Bennen' goke' ẕi'n yetó Matatías.
Bennen' goke' ẕi'n Semei.
Bennen' goke' ẕi'n yetó Jwsé.
Bennen' goke' ẕi'n Judá.
27 Judá na' goke' ẕi'n Joana.
Bennen' goke' ẕi'n Resa.
Bennen' goke' ẕi'n Sorobabel.
Bennen' goke' ẕi'n Salatiel.
Bennen' goke' ẕi'n Neri.
28 Neri na' goke' ẕi'n yetó Melki.
Bennen' goke' ẕi'n Adi.
Bennen' goke' ẕi'n Kosam.
Bennen' goke' ẕi'n Elmodam.
Bennen' goke' ẕi'n Er.
29 Er na' goke' ẕi'n Josué.
Bennen' goke' ẕi'n Elieser.
Bennen' goke' ẕi'n Jorim.
Bennen' goke' ẕi'n yetó Matat.
30 Matat na' goke' ẕi'n Lebí.
Bennen' goke' ẕi'n Smon.
Bennen' goke' ẕi'n Judá.
Bennen' goke' ẕi'n yetó Jwsé.
Bennen' goke' ẕi'n Jonán.
Bennen' goke' ẕi'n Eliakim.
31 Eliakim na' goke' ẕi'n Melea.
Bennen' goke' ẕi'n Mainán.
Bennen' goke' ẕi'n Matata.
Bennen' goke' ẕi'n Natán.
32 Natán na' goke' ẕi'n Dabí.
Bennen' goke' ẕi'n Isaí.
Bennen' goke' ẕi'n Obed.
Bennen' goke' ẕi'n Boos.
Bennen' goke' ẕi'n Salmón.
Bennen' goke' ẕi'n Naasón.
33 Naasón na' goke' ẕi'n Aminadab.
Bennen' goke' ẕi'n Aram.
Bennen' goke' ẕi'n Esrom.
Bennen' goke' ẕi'n Fares.
Bennen' goke' ẕi'n yetó Judá.
34 Judá na' goke' ẕi'n Jakob.
Bennen' goke' ẕi'n Isaak.
Bennen' goke' ẕi'n Bran.
Bennen' goke' ẕi'n Taré.
Bennen' goke' ẕi'n Nakor.
35 Nakor na' goke' ẕi'n Serug.
Bennen' goke' ẕi'n Ragau.
Bennen' goke' ẕi'n Peleg.
Bennen' goke' ẕi'n Heber.
Bennen' goke' ẕi'n Sala.
36 Sala na' goke' ẕi'n Kainán.
Bennen' goke' ẕi'n Arfaxad.
Bennen' goke' ẕi'n Sem.
Bennen' goke' ẕi'n Noé.
Bennen' goke' ẕi'n Lamek.
37 Lamek na' goke' ẕi'n Matusalén.
Bennen' goke' ẕi'n Enok.
Bennen' goke' ẕi'n Jared.
Bennen' goke' ẕi'n Mahalalel.
Bennen' goke' ẕi'n yetó Kainán.
38 Kainán na' goke' ẕi'n Enós.
Bennen' goke' ẕi'n Set.
Bennen' goke' ẕi'n Adán.
Bennen' goke' ka ẕi'nkze Dios.