Yeꞌs mkeꞌ apost Pab lo Tito
1
Pab ni dyux lo Tit
1 Pab, xaꞌ ndli sinꞌ lo Dios nde apost chanꞌ Jesucrist, ta xata nak jwan' ndli lazo' re xa' jwanꞌ mblí Dios sa masraꞌ yolo xaꞌ jwanꞌ li, sa gal' xobyek xa' Dios,
2 nde keno xa' yalnaban adiꞌ jwanꞌ ngembed naꞌ, Dios Xaꞌ nankwinꞌta, axta senꞌ teraꞌ tyoxkwaꞌ izyo, zya mdaꞌla Xaꞌ xkiꞌs Xaꞌ taꞌ Xaꞌy.
3 Nde wiz jwanꞌ mto Xaꞌ beꞌ, mbloꞌto Xaꞌ xkiꞌs Xaꞌ jwanꞌ ndej na ta mtanꞌno Xaꞌ na por yalnyebeꞌ chanꞌ Dios, Xaꞌ ntolanꞌ.
4 Ngeke'n yes re' loa,Tit, xinꞌpa na lo xkiꞌs Dios, lo jwanꞌ ta thipta ndli lazonꞌ. Dios nde Jesucrist Xaꞌ Nyebeꞌ, Xaꞌ ntolaꞌn, taꞌ Xaꞌ loa, yalwen, yalndlyat lazoꞌ nde yalnabeꞌz.
Re jwanꞌ ndablo li Tit lo xyon Creta.
5 Jwanꞌ reꞌ mbli sa mtan na lu lo xyon Creta, sa toxut la re jwanꞌ naꞌngaloda ngak nde kad yez tenꞌ nzi yodoꞌ koꞌa xaꞌ ngol xgab naꞌ, xaꞌ li sinꞌ lo yodoꞌ, ta xata mnibeꞌn loa.
6 Thi xaꞌ ngol xgab naꞌ xaꞌ ndli sinꞌ lo yodoꞌ, ndablo galꞌ kete xaꞌ, thipta ngol tyobno xaꞌ, nde re xinꞌ xaꞌ ndablo gak men ndli lazonꞌ Jesucrist, nde naxyoꞌbta diꞌs andojaꞌ ngete or nde neka gak or men nkabro.
7 Tak xaꞌ ndowiꞌ sa jwin ndoyak re sinꞌ lo yodoꞌ ndablo nambi gaxte xa', tak xaꞌ nzoyaꞌ re jwanꞌ mdaꞌ Dios lo xaꞌ; nandablod ak naro xaꞌ, nandablod sà xi lazoꞌ xaꞌ, nandablod ak xaꞌ men guy nde men nkwanꞌ yalbyo, nandabloda ak xaꞌ men narax nsenaꞌ tmin na'.
8 Cheꞌla ndablo nabeꞌz ak xa' ta' xa' yo kwed men, gak xaꞌ men ndyen li yalwen, men jwanꞌ nda wiꞌ toz xa kete, men galꞌ, men nayon ngete, nde kwek lazonꞌ,
9 ndablo loꞌ xaꞌ beꞌnta jwanꞌ li xata mteꞌd xaꞌy, sa tagaꞌ toyal kone xaꞌ lazoꞌ re men, xata nchab xkiꞌs Dios diꞌs li nde ko xa' yek re men ne ron'.
10 Tak nzo toz xaꞌ jwanꞌ naꞌnchonta diꞌs, masta re xa' ta ndob be' lad na' ba ndojaꞌ jwanꞌ ndyodiꞌs xaꞌ nde nkwinꞌno xaꞌ re men.
11 Ro re xaꞌ ya ndablo towꞌ men, tak sen' ndlo' xa' jwan' nagal'ta ntokan xaꞌ dib liz re men, sa tamod senaꞌ xaꞌ tmi mod narax.
12 Lega thi xaꞌ Creta, xaꞌ nchak toz nchab: "Re mayez Creta, thiblaꞌ nkwinꞌ xaꞌ, xajaꞌ maꞌ xkapa xaꞌ, xaꞌ wachoy nde xa' saꞌba."
13 Nde li jwanꞌ nchab xaꞌ ya; jwanꞌ nasa, ne brez yek re xaꞌ, sa galꞌ kete xaꞌ lo jwanꞌ ndli lazoꞌ xaꞌ.
14 Nde nandablod tonza xaꞌ lo re kwent gox jwan' nzo xij re xa' judi, nde neka re yalnyebeꞌ chanꞌ re xaꞌ ngoꞌtal jwanꞌ li.
15 Leꞌ re xaꞌ nambi xgab naꞌ reta jwanꞌ nambi ngwiꞌ xaꞌy, nde leꞌ lo re xaꞌ narax nak xgab naꞌ nde naꞌndlid lazonꞌ Dios nek thib jwanꞌ naꞌnambid ngwiꞌ xaꞌy; tak axta yek xaꞌ nde xgab xaꞌ narax naka.
16 Mbez xaꞌ nzolo xaꞌ Dios, per re jwanꞌ ndli xaꞌ ndloꞌ nkwinꞌ xaꞌ, xekta men xaꞌ, nanxobyekta xaꞌ nde ngencho jwanꞌ wen ryobeꞌ li xaꞌ.