3
Xa li re men lulka tyemp
1 Tagaꞌ ndablo nyea, senꞌ ndasin lulka wiz yo yalnathoz,
2 yo men benꞌta keꞌ lazoꞌ xaꞌ leꞌga xaꞌ, nab tmi toblo xaꞌ, xyalꞌno xaꞌ lazoꞌ xaꞌ, ak naro xaꞌ, ni xin xaꞌ xis Dios, naꞌxobyekta xaꞌ xud xaꞌ neka xnaꞌ xaꞌ, anatyo xaꞌ taꞌ xaꞌ dyux, naꞌzebta lazoꞌ xaꞌ Dios,
3 neka keꞌ lazoꞌ xaꞌ ta men xaꞌ, naꞌlyata lazoꞌ xaꞌ ta men xaꞌ, wa yix xaꞌ ta xaꞌ, natyentobta lazoꞌ xaꞌ lo re jwanꞌ ncholaꞌs belꞌ xaꞌ, xaꞌ xkap tir xaꞌ, yiꞌno xaꞌ re jwanꞌ wen.
4 Tayaꞌ xaꞌ ta xaꞌ, ngok ne lazoꞌ xaꞌ lo jwanꞌ narax, li xaꞌ xgab ndak toz xaꞌ, masraꞌ kwanꞌ xaꞌ re jwanꞌ ndyen xaꞌ lo izyo nde nakwanꞌta xaꞌ Dios.
5 Tyak men na nxobyek xaꞌ Dios, per nkalaꞌs xaꞌ yalnaro chanꞌ Dios.
Nazalꞌtad la re xaꞌ ya.
6 Tak xij re xaꞌ ya ndryoꞌ re xaꞌ nchote lenꞌ liz re men nde nkwinꞌno xaꞌ re ngol nala xgab naꞌ, ngol jwanꞌ nzoꞌb toz xken naꞌ. Re ngol ya nalid gan tyentob lazonꞌ lo re jwanꞌ narax.
7 Thiblaꞌ ndoteꞌd ngol nde naꞌyentirta xaꞌ jwanꞌ li.
8 Ta xa Janes nde Jambres, mtowꞌ xaꞌ lo jwanꞌ mbli Moisés, taxa re xaꞌ ya, ntowꞌ xaꞌ lo jwanꞌ li chanꞌ Dios. Tibne mblayo xgab xaꞌ lo jwanꞌ narax, mbroꞌtal xaꞌ lo jwanꞌ li chanꞌ Dios.
9 Leꞌ re xaꞌ ya naꞌryoꞌd jwanꞌ ndli xaꞌ, tne reta men naꞌngenta xgab yek xaꞌ, ta xa ngote Janes nde Jambres.
Lulka jwanꞌ mnibeꞌ Pab lo Timoteo
10 Leꞌ lu, jwin ngelia re jwanꞌ ndloꞌn, xa ngeteꞌn, jwanꞌ ntob lon lin, plopa ndli lazoꞌn Dios, plopaꞌ nxek na, xa nkeꞌ lazoꞌn re men, xa ne mdon mbriꞌd na re yalti
11 lo mchubla men na nde mtoti xaꞌ na. Lu mne jwanꞌ mxak na yez Antioquía, Iconio, Listra nde reta yalti jwanꞌ mbrid ndaꞌb na, nde lo retey mtolaꞌ Dios na.
12 Nde nogaꞌ re xaꞌ jwanꞌ ncholaꞌs xob yek Jesús, taga rid ndab xaꞌ yalti, chubla men xaꞌ.
13 Mbay leꞌ re men ndli jwanꞌ narax nde re men kwinꞌ, masra ryo re jwanꞌ narax lo xaꞌ, kwinꞌno xaꞌ re men nde tagaꞌ kwinꞌno men xaꞌ.
14 Leꞌ lu, ne bto lo jwanꞌ mteꞌd la nde ndli lazoꞌa, tak mnea la cho re mbloꞌy loa,
15 nde xata lud la nzoloa xkiꞌs Dios jwanꞌ toyal li ak la thi xaꞌ nchen, nde liy lyaꞌa lo ta ndli lazoꞌa Jesucrist.
16 Dib nak xkiꞌs Dios, lenꞌ lazoꞌ Dios ngola, sinꞌ toz ndliy ntoteꞌda men, ntoxuta men, ntokoxa men, nde ngoneda men lo jwanꞌ galꞌ,
17 sa reta men jwanꞌ ndli sinꞌ lo Dios, gak xaꞌ men jwin nchak, nde keno xaꞌ reta jwanꞌ nakinꞌ xaꞌ sa li xaꞌ reta jwanꞌ wen.