6
1 Reta xaꞌ jwanꞌ nak mos ndablo jwin xobyek xaꞌ men nak xwanꞌ xaꞌ, sa naꞌnixinta men xis le Dios nde xis jwanꞌ ndlonꞌ.
2 Nde tagaꞌ re mos jwanꞌ ngeno xwanꞌ naꞌ, xaꞌ ndli lazonꞌ Dios, nakotalta mos yalnyebeꞌ chanꞌ xaꞌ ya lo ta nak xaꞌ men ndli lazonꞌ Dios. Cheꞌla jwin toz li mos rsinꞌ mos, tak lo men jwanꞌ ndli xaꞌ sinꞌ, tagaꞌ ndli lazoꞌ xaꞌ Dios, thita nak xaꞌ nde nke lazoꞌ xaꞌ ta xaꞌ. Jwanꞌ reꞌ bloꞌ nde mnibeꞌ.
Jwanꞌ galꞌ ndli lazonꞌ nde yalnale
3 Tez nzo thi xaꞌ ndloꞌ xaꞌga jwanꞌ, nde nandade xajka nda jwanꞌ galꞌ ndloꞌ Jesucrist Xaꞌ Nyebeꞌ lonꞌ, nde neka nday xa nda jwanꞌ galꞌ ndli lazonꞌ,
4 nchak naro xaꞌ nde ngen kwan mne xaꞌ, ndyen xaꞌ kwezno xaꞌ ta xaꞌ nyenꞌ xa ryoxkan choja re diꞌs, yiz naka lo xaꞌ nde tya nchal re jwanꞌ reꞌ: Yalnarax nda lazoꞌ xaꞌ nye xaꞌ ta men xaꞌ, re yalbyo, yalnixin, nandlitra lazoꞌ xaꞌ ta xaꞌ,
5 tibla nzo yalbyo xij xaꞌ, thiptane mdyaꞌb xgab xaꞌ lo jwanꞌ narax, nde nanzolod xaꞌ jwanꞌ li, nkelo xaꞌ benꞌta tmi koꞌ xaꞌ lo xkiꞌs Dios. Naketad la re xaꞌ ya.
6 Liga, bro toz jwanꞌ wen nde senꞌ galꞌ nxoꞌbyek men Dios, lo nale nzo lazoꞌ men lo re jwanꞌ ngeno men.
7 Tak ngen kwan ndenonꞌ lo izyo reꞌ, nde tagaꞌ ngen kwan wenꞌ.
8 Jwanꞌ nasa, tez nzo jwanꞌ wa naꞌ nde lar gok naꞌ, nale yo lazonꞌ lo jwanꞌ na.
9 Mbay leꞌ re xaꞌ jwanꞌ ncholaꞌs ak rik, naxekta xaꞌ lo yaltokilꞌ nde nchab xaꞌ lo koꞌ chanꞌ Maxuꞌ nde lo yalntablaꞌs jwanꞌ ntotiy xaꞌ, ngaba xaꞌ, nde thiptane ndluꞌxa xaꞌ.
10 Tak xanꞌ reta jwanꞌ narax nde, senꞌ ndyen men tyonke men xis tmi. Jwanꞌ na ngote pla xaꞌ mtablaꞌsa, mdyaꞌb xaꞌ lo jwanꞌ ndli lazoꞌ xaꞌ nde yalti toz mkwanꞌ xaꞌ lo xaꞌ.
Jwanꞌ nyaꞌb Pab li Timoteo
11 Leꞌ lu, mbiꞌ ndli sinꞌ lo Dios, bxonꞌ lo reta jwanꞌ reꞌ, nde bli jwanꞌ galꞌ, jwin bxobyek Dios, thiblaꞌ bli lazoꞌa Dios, pkeꞌ lazoꞌa re men, bxek lo reta jwanꞌ nde nadoꞌ gok.
12 Ne bchal bli rsinꞌ Dios xajaꞌ thi sondad, nde naꞌlad la yalnaban adiꞌ, lo jwanꞌ ta mbrez Xaꞌ lu, jwanꞌ nchab la ndli lazoꞌa senꞌ bro toz xaꞌ nzi wiꞌ.
13 Jwanꞌ reꞌya nyebeꞌn loa, ndowiꞌ Dios, Xaꞌ jwanꞌ mtoxkwaꞌ reta jwanꞌ, nde ndowiꞌ Jesucrist, Xaꞌ jwanꞌ galꞌ mdej lo Poncio Pilat cho nak Xaꞌ,
14 bxob yek jwanꞌ cheꞌ nyebeꞌn loa xajaꞌ naka, sa ngencho ni narax xis la, axta kebeꞌ bere Jesús Xaꞌ Nyebeꞌ lonꞌ.
15 Senꞌ sin wiz mto Dios beꞌ li Dios bere Jesús, tak ngencho xajaꞌ Xaꞌ, Xaꞌ Nayon nak jwanꞌ nyebeꞌ dib nax, Rey lo reta rey, nde Xaꞌ Nyebeꞌ lo reta xaꞌ nyebeꞌ.
16 Thib nya Xaꞌ jwanꞌ nandluxta, Xaꞌ nzoban lo xni plo ngencho toyal bike gax. Nek thi mbiꞌ teraꞌ wiꞌ lo xaꞌ Dios nde neka wiꞌ xaꞌ Xaꞌ. Lo Xaꞌ nak dib yalnaro nde yalne tibtane. Ta aka.
17 Lo reta xaꞌ rik lo izyo reꞌ, mnabeꞌ naꞌgaknarod xaꞌ nde naꞌtobta xaꞌ xgab xaꞌ lo re jwanꞌ ngenoꞌ xaꞌ, tak re jwanꞌ reꞌ ndluxa, cheꞌla tob xaꞌ xgab xaꞌ lo Dios naban, Xaꞌ ta ndaꞌ bro toz jwanꞌ wen lonꞌ sa nale li rsinꞌ neꞌy.
18 Li xaꞌ nde ak xaꞌ men jwanꞌ li bro toz yalwen, dib nzo lazoꞌ xaꞌ laꞌsto xaꞌ men, nde naxalꞌ gak xaꞌ kon re jwanꞌ ngeno xaꞌ.
19 Tamod ngetenta xaꞌ jwanꞌ ndak toz jwanꞌ nak xanꞌ lo jwanꞌ ta kayaꞌ xaꞌ yoloba nde gal xaꞌ yalnaban adiꞌ.
Jwanꞌ lult mnabeꞌ Pab lo Timoteo
20 Timoteo, jwin bkenap jwanꞌ ndayaꞌ Dios loa. Natonzad la re diꞌs ndojaꞌ ndye jwanꞌ ngencho sinꞌ ndli, nde re jwanꞌ kwinꞌ ndloꞌ xaꞌ xajaꞌ jwanꞌ li,
21 tak pla xaꞌ jwanꞌ ndyonke xis yalteꞌd reꞌ, mblaꞌ xaꞌ jwanꞌ mbli lazoꞌ xaꞌ. Yalwen chanꞌ Dios tyonoa. Ta aka.