7
Thib ayoꞌ nzo cho'pthap mil men jwanꞌ mdob beꞌ
1 Ngolo re jwanꞌ na, mbwiꞌn thap anj ndoli re thap lad ro izyo. Re anj ya ndenkeꞌ re thap mbi jwan' nde re thap lad ro izyo sa naꞌxyobta mbi xis izyo, neka lo nittoꞌ nde neka lo re ya.
2 Noga mbwiꞌn tedib anj mbroꞌ ned cheꞌdke wiza, nde anj ya nden sey chanꞌ Dios naban. Anj ya, ne toz mni lo re thap anj ta mkayaꞌ yalnyebeꞌ ta tatiy izyo nde nittoꞌ.
3 Nde nchab anj:
—Naꞌtatid goꞌ izyo neka nittoꞌ, neka re ya, axta ngolo mtob ná' beꞌ cholo re mos Dios naꞌ.
4 Nde mbin na plopa xaꞌ mdob beꞌ: thib ayoꞌ nzo choꞌpthap mil xaꞌ lo bin reta xinꞌ Israel.
5 Lo bin Judá thib sen mil men mdob beꞌ, tagaꞌ thib sen mil men lo bin Rubén, thib sen mil men lo bin Gad,
6 thib sen mil men lo bin Aser, thib sen mil men lo bin Neftali, thib sen mil men lo bin Manasés,
7 thib sen mil men lo bin Simeón, thib sen mil men lo bin Leví, thib sen mil men lo bin Isacar,
8 thib sen mil men lo bin Zabulón, thib sen mil men lo bin José nde thib sen mil men lo bin Benjamín.
Men toz tir nok lar nakis
9 Ngolo re jwanꞌ na, mbwiꞌn men toz tir naꞌakta lab men xaꞌ, ndoli re xaꞌ tenꞌ ndo yasil ten' ndyob Xa' Nyebe' nde lo Mbak Xilꞌ yen'. Re men ya mbroꞌ re ned yez, lo re ned bin men, lo xaꞌxaꞌ re ned men nde lo re ned men ni xaꞌxaꞌ di's, reta xaꞌ ya nok lar nakis nde nzo yin yaꞌ xaꞌ.
10 Nde reta xaꞌ ne toz mbez:
Dios na' ta ndob lo yasil tenꞌ nyebeꞌ Xaꞌ,
kon Mbakxilꞌ yenꞌ,
Mtola' na'.
11 Nde reta anj jwan' ta ndoli dib bix yasil ya, dib bix re xaꞌ gox nde dib bix re thap xbi nabana, nchaxtaro re anj ya, mbla xaꞌ yek xaꞌ ten' ndo yasil nde mbli naro xaꞌ le Dios,
12 nchab xaꞌ:
¡Taga naka! Thita lo Dios gol men,
nde Xaꞌta kayaꞌ yalnaro, yalnchak, yalwen,
di's wen, yalnyebeꞌ nde yalne dib adiꞌ. ¡Ta naka!
13 Zyasa thi xaꞌ goxa mnabdiꞌs lon:
—¿Cho re xaꞌ ta nok lar nakisa nde plo mbroꞌ xaꞌ?
14 Na mkab lo xaꞌ nchab na:
—Goꞌ mney xaꞌ nyebeꞌ.
Nde xaꞌ ne lon:
—Reta xa' reꞌ mbroꞌ lo yalti toz tir jwanꞌ ngo lo izyo, mtach xa' xab xa' kon ren chan' Mbakxil' yen' nde mkis xab xa'.
15 Jwanꞌ nasa nzi xaꞌ ngo' lo yasil tenꞌ ndob Dios nyebeꞌ Dios nde yalꞌ ndlyabe ndli xaꞌ sinꞌ lo Dios lenꞌ yodonꞌ Dios, nde yub Dios jwanꞌ ndob lo yasila nkenap re xaꞌ.
16 Naꞌlyanꞌtra xaꞌ nde naꞌchektra lazoꞌ xaꞌ, naꞌtolꞌtra be xaꞌ nekla tenꞌ xaꞌ nazoꞌ.
17 Tak Mbakxilꞌ yenꞌ, jwanꞌ ndo ten' ndo yasil tenꞌ nyebeꞌ Xaꞌ kenap re xaꞌ ya, nde Mbakxilꞌ yenꞌ we re xaꞌ tenꞌ ndobyal' nit ndaꞌ yalnaban nde yub Dios kib win' lo xaꞌ.