5
Mbakxilꞌ yenꞌ nde kon ye's
1 Nde mbwiꞌn lo Xaꞌ ta ndob lo yasil tenꞌ ndyob xaꞌ nyebeꞌ xaꞌ ya nde yaꞌ ban Xaꞌ nden xaꞌ thi yeꞌs nge letr lonꞌ nde xis naꞌ, nadusa nde nowꞌa kon gaz sey.
2 Nde mbwiꞌn thi anj ne toz, ne mbrez:
—¿Cho nzalꞌ kib re sey ta nowꞌ yeꞌsa nde xalꞌ la?
3 Per nekla lo beꞌ, nekla xis izyo nde nekla lenꞌ izyo naꞌngasalta cho xalꞌ yeꞌs nekla wiꞌy.
4 Nde jwanꞌ toz nchonꞌ na tak naꞌngasalta cho nzalꞌ xalꞌ ye's, nekla lab xaꞌy nde wiꞌ xaꞌy.
5 Zyasa thi xaꞌ goxa ne lon:
—Naꞌgonta la. Wiꞌ nea, leꞌ Xaꞌ nak xaja Mbeꞌs jwanꞌ nde lo bin chanꞌ Judá, Xaꞌ nde lo bin David mbli gan sa xalꞌ Xaꞌ ye's nde kib Xaꞌ re gaz sey nowꞌa.
6 Zyasa mbwiꞌn thi mbakxil' yen', ndoli tenꞌ ndo yasila ta ndob Xa' nyebe' ya, xtowꞌ tenꞌ nzi re thap xbi nabana nde tenꞌ nzi re galbthap xaꞌ goxaꞌ. Mabakxil' yen' na ndloꞌ nawi' lad ma' lo ta mbij xaꞌ maꞌ. Ndob gaz wad yek maꞌ nde gaz ngudlo maꞌ, nde re gaz ngudlo maꞌ nak re gaz xbin Dios jwanꞌ ntelꞌ Dios lo izyo.
7 Mbakxilꞌ yen' ya ngwa lo Xa' ta ndob lo yasil la nde mxenꞌ Mbakxilꞌ ye's jwanꞌ nden Xaꞌ yaꞌ ban Xaꞌ.
8 Nde senꞌ mxen Mbakxilꞌ ye's, re thap xbi nabana nde re galbthap xaꞌ goxa mdoxub xaꞌ lo Mbakxilꞌ yen', nde reta xaꞌ nden arp nde kop jwanꞌ naksaꞌ or se nzo xtarak ndo yol, nde sen ya nak reta di's jwan' ndyodi's re men nayon ngete lo Dios.
9 Nde reta xaꞌ ncholꞌ thi di kub:
Lu nzalꞌ la tyen la ye's nde kib la re sey neꞌy,
Tak lo ta mbij men la, kon ren la mxiꞌa men par Dios,
lo reta ned bin men, lo re ned men ni xa'xa' di's, lo xa'xa reta ned men, nde lo re ned yez
10 Nde mblilal la xa', rey nde nglweyꞌ par Dios naꞌ
sa nyebeꞌ xa' xis izyo.
11 Mbwiꞌn nde mbin na nkebi mbez bro toz tir re anj dib bix yasil ta ndob Xa' nyebe' ya, tenꞌ nzi re thap xbi nabana, tenꞌ nzi re galbthap xaꞌ goxa. Bro toz tir re anj, por miyon xaꞌ,
12 nde ne toz mbez reta xa':
Mbakxilꞌ yenꞌ jwanꞌ mbij xa',
Nzal' kayaꞌ yalnyebeꞌ nde re jwan' ntak,
yalnchak, nde yalne,
reta di's wen, yalnaro nde nabe'z ni men lo Xa'.
13 Nde noga, reta jwanꞌ mdoxkwaꞌ Dios, jwanꞌ nzi lo beꞌ, jwanꞌ nzi xis izyo, jwanꞌ nzo lenꞌ izyo nde jwanꞌ nzo lenꞌ nittoꞌ, mbin na mbeza lo Xa' ta ndob lo yasil ten' nyebe' Xa' nde lo Mbakxilꞌ yen':
Xaꞌ nzal' kaya reta diꞌs wen, yalxobyek, yalnaro nde yalne,
dib adiꞌ.
14 Le' re thap xbi nabana nchab:
¡Ta naka!
Nde re galbthap xaꞌ goxa ngoxtaro xaꞌ nde nda' dyux lo Xaꞌ ta naban dib adiꞌ.