Apocalipsis
1
Jwanꞌ mbloꞌ Jesucrist lo Apost Juan
1 Jwanꞌ reꞌ ndlo' re jwan' li Jesucrist, Dios mblo'y lo Jesucrist nde Jesucrist lo'y lo re xaꞌ ndli sinꞌ lo Xaꞌ, re jwan' ndoyen la ak. Nde mtelꞌ Jesucrist ánj Jesucrist, sa loꞌ anja lo Juan xa' nak mos Jesucrist.
2 Nde ngetej x' xkiꞌs Dios, reta jwanꞌ mbloꞌ Jesucrist xa' nde reta jwanꞌ mbwiꞌ xa'.
3 Nabeꞌz toz nda re men jwanꞌ ndlab nde re men nchon re jwanꞌ nchab lo yeꞌs ak, nde ndli xaꞌ re jwanꞌ nchab lo ne'y. Tak ndosin gaxla beꞌ aka.
Juan ni dyux lo re gaz yodoꞌ
4 Na Juan, ngekeꞌn yeꞌs reꞌ lo re men jwan' ndli lazon' Jesucrist ta nzo re gaz yez lo xyon Asia. Bkaya' go' yalwen nde yalnabeꞌz chanꞌ Dios, Xaꞌ jwanꞌ nak, Xaꞌ jwan' ngok nde Xaꞌ jwan' yeꞌd, nde chan' re gaz xbi jwanꞌ nzi ngoꞌ tenꞌ ndyob Dios nyebeꞌ Dios,
5 nde chanꞌ Jesucrist, Xaꞌ ndej nde ndli jwanꞌ galꞌ, Xaꞌ mbroꞌxban ner xij re xaꞌ nguj nde ngeno Xaꞌ yalnyebeꞌ xis re rey lo izyo. Crist nkeꞌ lazoꞌ Xaꞌ naꞌ nde mtach Xaꞌ naꞌ lo xken naꞌ kon ren Xaꞌ,
6 nde mblilal Xaꞌ naꞌ rey nde nglweyꞌ chanꞌ xud Xaꞌ Dios. ¡Xaꞌ kayaꞌ yalnaro nde yalnyebeꞌ dib adiꞌ! Ta naka.
7 ¡Wiꞌ goꞌ, Crist nde xij xkow! Reta men wiꞌ nde Xaꞌ, nde axta re men jwan' mzib yi'b Xa' lo nguj Xa', wiꞌ men Xaꞌ, nde reta men nzo dib lo izyo gon xaꞌ por Jesús. Liy, ta aka.
8 "Na nak ner nde na nak lulka lo re jwanꞌ, xa nak letr A nde letr Z", ne Dios jwanꞌ ngeno dib yalnyebeꞌ, Xaꞌ jwanꞌ nak, Xaꞌ jwan' ngok nde Xaꞌ jwan' yeꞌd.
Juan mbwiꞌ Jesús
9 Na Juan, wes goꞌ nde thita ndorid naꞌ yalti, thita nyebeꞌ Dios lonꞌ nde thita ndoxek náꞌ xa mxek Jesus. Mtelꞌ xaꞌ na xaja men nge lizyiba lo izyo nzi xij nittoꞌ ndole Patmos kwent ndej na xkiꞌs Dios nde kwent chanꞌ Jesucrist.
10 Nde wiz chan' Xa' Nyebe', mdenꞌ na yalne chanꞌ Mbi Nayon nde mbin na lad xis na, thi bi ne toz mbyen xaja thi trompet,
11 nde ne Xaꞌ lon:
—Na nak ner nde na nak lulka lo re jwanꞌ, xa nak letr A nde letr Z. Bkeꞌ lo yeꞌs reta jwanꞌ ngwiꞌa nde btelꞌ la lo re men jwan' ndli lazon' Jesucrist ta nzo re gaz yez lo xyon Asia, lo yez Éfeso, yez Esmirna, yez Pérgamo, yez Tiatira, yez Sardis, yez Filadelfia nde yez Laodicea.
12 Nde mbyek na sa wiꞌn nyenꞌ cho ta ni lon ya, nde mbwiꞌn gaz kandil naksaꞌ or,
13 nde xtow' re gaz kandila mbwiꞌn thi xaꞌ nya xaja nya mena, nok Xaꞌ thi lar nchatu axta lo ni Xaꞌ, nde ro lazo' xa' nzo thi sinch or.
14 Yis yek xaꞌ nakistir xaja nya xilꞌ nakisa, xaja nakis nya yike ba, nde leꞌ ngud lo xaꞌ nya xaja bela.
15 Ni xaꞌ anta ndlyabel nya xaja nya yiꞌb brons nzo lo ki, leꞌ bi ndyodiꞌs xaꞌ nchen xaja ndyes nit toz jwanꞌ nzo yoꞌ ba.
16 Yaꞌ ban xaꞌ nden xaꞌ gaz mbel nzi lo beꞌ nde ro xaꞌ ndryoꞌ thi espad jwanꞌ rop lad nale lonꞌ. Leꞌ lo xaꞌ ndob xni xaja xni wiz be ro ba.
17 Lo sen' mbwiꞌn xaꞌ, ngob na xanꞌ ni xaꞌ xaja men nguja. Per mxob xaꞌ yaꞌ ban xaꞌ yek na nde ne xaꞌ:
—Naꞌzyebta la, na nak ner nde na nak lulka lo re jwanꞌ.
18 Na naban na, nde nguj na, per naya thiptane naban na, ta naka. Nde na ngenon yalnyebeꞌ lo yalguj nde lo ye'r abil.
19 Bkeꞌ re jwanꞌ mbwiꞌa lo yeꞌs, re jwanꞌ ndoyak naya nde re jwanꞌ nara' ndo ak.
20 Jwanꞌ nagas chan' re gaz mbel lo beꞌ jwanꞌ mbwiꞌa nden na lo yaꞌ ban na nde re gaz kandil naksaꞌ ora' nak. Re gaz mbel nak re gaz anj chanꞌ re men yodo', leꞌ re gaz kandil jwan' mbwi'a nak re gaz yodo'.