8
Ban men xa ncholaꞌs Mbi Nayon
1 Mbay naya na, re men ta ndono Jesucrist nekthib yalke nazobta xis xa', re men jwanꞌ naꞌngeteda xa ncholaꞌs belꞌ naꞌ, cheꞌla ngete xa' xa ncholaꞌs Mbi Nayon.
2 Tak ley chanꞌ Mbi Nayon ndaꞌy yalnaban lo ndononꞌ Jesuscrist, jwanꞌna mxa'ka na lo ley chanꞌ yalke nde lo yalguj.
3 Tak Dios mbli jwan' na'ngakta ndli ley, tak nala men nalid men gan la' men re jwan' narax, lo mtelꞌ Dios Xinꞌ Xaꞌ mbyeꞌd lo izyo, xajka ti mena nzo'b xken na' nde por xke re jwan' narax, nguj Xa' sa mdi'x Xa' xken reta men.
4 Jwanꞌ reꞌ mbli Dios sa lo na' toyal ak re jwan' gal' nya'b ley, tak naꞌbantraꞌ naꞌ xaja ncholaꞌs belꞌ naꞌ, cheꞌla naban naꞌ xaja ncholaꞌs Mbi Nayon.
5 Tak xa' ta ndli re jwanꞌ narax ncholaꞌs belꞌ xaꞌ, benꞌta re jwanꞌna ndli xaꞌ xgab, leꞌ men ndli re jwanꞌ ncholaꞌs Mbi Nayon, jwanꞌnata ndli men xgab.
6 Tak senꞌ ndli men xgab re jwanꞌ narax ncholaꞌs belꞌ men, ncheꞌy men lo yalguj, leꞌ senꞌ ndli men xgab re chanꞌ Mbi Nayon, naka yalnaban nde yalnabeꞌz.
7 Leꞌ men ta ndli xgab benꞌta re jwanꞌ narax ncholaꞌs belꞌ xaꞌ, xaꞌ ya ngiꞌno xa' Dios, tak naꞌnxoꞌbyekta xaꞌ ley chanꞌ Dios nde nekla li xaꞌ gan li xaꞌy.
8 Jwanꞌ nasa, re men ta naban benꞌta lo re jwanꞌ narax ncholaꞌs belꞌ xaꞌ, naꞌlid xaꞌ gan li xaꞌ jwanꞌ ndryoꞌ lazoꞌ Dios.
9 Leꞌ goꞌ nambantraꞌ lo re jwanꞌ narax xa ncholaꞌs belꞌ goꞌ, leꞌ goꞌ naban xa ncholaꞌs Mbi Nayon, tezka Mbi Nayon chanꞌ Dios nzoy lenꞌ lazoꞌ goꞌ. Nde tez nzo xaꞌ naꞌndonoda Mbi Nayon chanꞌ Crist, xaꞌ ya naꞌnakta men Crist.
10 Tez ndono goꞌ Crist lenꞌ lazoꞌ goꞌ, leꞌ belꞌ goꞌ liga nguja lo yalnarax, nde leꞌ xbin goꞌ nabana tak mblilal Dios goꞌ men galꞌ.
11 Nde tez ndono goꞌ Xbin Xaꞌ ta mbli mbroꞌxban Jesus xij re men nguj, leꞌga Xaꞌ ta mbli mbroꞌxban Jesucrist xij re men nguj, Xaꞌ ya ta' yalnaban lo kwerp goꞌ jwanꞌ ta ndluxa, por Xbi chanꞌ Xa' jwanꞌ ndono goꞌ.
12 Jwanꞌ nasa, wes na, ptan na, ngenon' jwan' ndablo lin', per na'nakte lin' re jwanꞌ narax ta ndryoꞌ lazoꞌ belꞌ naꞌ.
13 Tak tez nzo ban goꞌ lo re jwanꞌ narax xa ndryo' lazo' belꞌ goꞌ, taj goꞌ; per tez kon Xbin Dios li goꞌ lux reta jwanꞌ narax ndryoꞌ lazoꞌ belꞌ goꞌ, zyasa ban goꞌ.
14 Re men jwanꞌ ndaꞌ diꞌs sa Xbin Dios koneda xaꞌ, re men ya nak xinꞌ Dios.
15 Tak naꞌmdaꞌd Dios lo goꞌ ti xbi jwanꞌ taꞌtiy goꞌ sa li goꞌ sinꞌ lo neꞌy nde zyeb goꞌ tedib gob, cheꞌla Dios mdaꞌ lo goꞌ ti Xbi jwanꞌ mbli sa ngok goꞌ xinꞌ Dios. Nde Xbi ya ndli sa mbez naꞌ lo Dios: “¡Xud na, pay!”
16 Leꞌga Xbin Dios, ndeja lo xbin naꞌ, ke nak naꞌ xinꞌ Dios.
17 Tak lo nak naꞌ xinꞌ Dios, noga naꞌ ndablo kayaꞌ jwanꞌ taꞌ Dios nde jwanꞌ reꞌ thita keno neꞌy kon Crist, tak tez naya thita ndridndaꞌb naꞌ yalti kon Crist, yoloba nonꞌ kayaꞌ yalnaro chanꞌ Crist.
18 Nde jwanꞌ mnepa na, leꞌ re yalti ta ndoriꞌd naꞌ naya, lud tira tez katalal mena kon yalnaro jwanꞌ winꞌ taꞌ Dios lonꞌ yoloba.
19 Tak re jwanꞌ ta mdoxkwaꞌ Dios, che'pa ngembed na, ncholaꞌsa ryoꞌto re men jwanꞌ nak xinꞌ Dios.
20 Tak reta jwanꞌ mdoxkwaꞌ Dios nangelide re jwanꞌ ndablo liy, per naꞌnakte tak ta ncholaꞌsa, cheꞌla leꞌga Dios tamod mtanꞌ Xaꞌy, per thiblaꞌ ngembeda lyaꞌy,
21 Tak noga' re' jwanꞌ mtoxkwaꞌ Dios nakinꞌ lyaꞌy lo yaꞌ jwanꞌ nzoyay nde jwanꞌ li luxa, sa noy lya' wiz naro toz jwanꞌ tola' Dios re xinꞌ Dios.
22 Tak mnenꞌ dibta naya leꞌ re jwanꞌ ta mdoxkwaꞌ Dios mbez yisa nde ndoba lo yob xaja ngol ta ndob lo yis tana.
23 Nde naꞌnakte benꞌta jwanꞌna ta ndyak, noga re naꞌ ta ndyak, tenye nerla na' mkaya' Xbin Dios. Noga naꞌ mbez yis naꞌ ngembed naꞌ kayaꞌ Dios naꞌ ak xinꞌ Dios, nde lilal Dios kwerp naꞌ ti kwerp kub.
24 Tak lo mgembed naꞌ, jwanꞌ nasa mblyanꞌ, per tez ngwiꞌla na' jwanꞌ ngembed na', jwanꞌna naꞌnaktray jwanꞌ ngembed na', tak ¿Xa kwed men ti jwanꞌ ngwiꞌa men?
25 Mbay tez naꞌngwid naꞌ jwanꞌ ngembed naꞌ, ndablo xek naꞌ sowꞌ kwed naꞌy.
26 Nde tagaꞌ, leꞌ Xbi chanꞌ Dios ndlaꞌstoy naꞌ senꞌ nala nzo lazonꞌ. Tak naꞌnyed naꞌ xomod todiꞌsnonꞌ Dios jwanꞌ xa ndabloy, per le' Mbi Nayon nyaꞌba lo Dios por naꞌ, mbez nabila kon bi naꞌyenta men.
27 Leꞌ Dios, Xaꞌ jwanꞌ nzolo lazoꞌ reta men, mne Dios jwanꞌ ndej Mbi Nayon, tak Mbi Nayon nyaꞌba jwanꞌ xa ncholaꞌs Dios par reta men jwanꞌ nak yez Nayon chanꞌ Dios.
Thiptane mblinꞌ gan
28 Tan mnenꞌ reta men ta nkeꞌ lazonꞌ Dios, lo reta jwan' ndla'sto Dios men par yalwen, jwan' re' nak xa' jwan' mbrez Dios axa nak xgab Dios.
29 Tak re men jwan' mbyolola Dios azta nera', mke'be'la Dios xa' sa ak xa' xata nak xin' Dios nde leꞌ Xinꞌ Dios ak Xaꞌ ner lo xij bro toz wes xaꞌ.
30 Nde re xaꞌ mke'bela Dios, re xaꞌ ya mbrez Dios, nde re xaꞌ jwanꞌ ta mbrez Dios, xa' ya mblilal Dios xaꞌ men galꞌ nde re xaꞌ ta mblilal Dios men galꞌla, xaꞌ ya mbli naro Dios.
31 ¿Cho kwanraꞌ gab naꞌ lo jwanꞌ reꞌ? Tez Dios ndono naꞌ, ¿Cho li gan lonꞌ sa?
32 Tak tez naꞌmkad Xaꞌ Xinꞌ Xaꞌ, cheꞌla mdaꞌyaꞌ Xaꞌ Xinꞌ Xaꞌ lo yalguj por reta naꞌ, ¿Xomod nataꞌ Xa' nde kon Xin' Xa' reta jwanꞌ lonꞌ sa?
33 ¿Cho xaꞌ keꞌ yalke yek re men ta mblíla Dios? Dios ndli sa nchanꞌ men xaꞌ galꞌ.
34 ¿Cho xaꞌ li sa yathix men xken men? Crist nak Xaꞌ nguj, nde naꞌnakte benꞌ jwanꞌna, noga mbroꞌxban Xaꞌ nde naya ndob Xaꞌ lad ban Dios nde tagaꞌ ngenaꞌb Xaꞌ lo Dios por naꞌ.
35 ¿Cho li gan sikeꞌ tij naꞌ lo ta ke'lazo'Crist na'? ¿Yaltiy o yalnabila, senꞌ nchubla xaꞌ na', wina, senꞌ naꞌngenta xab na'y, yalnathoza, o yalguja?
36 Ta xa nchabka lo xkiꞌs Dios:
Lo ta ndli lazoꞌ náꞌ lu reta wiz nzo náꞌ ro yalguj.
Ndlino men náꞌ xaja ndlino men mbakxilꞌ ta kuj mena.
37 Tenye ndoriꞌd naꞌ lo reta jwanꞌ reꞌ, naꞌ jwanꞌ mas mbli gan mbroꞌxob kon Jesucrist Xaꞌ jwanꞌ nkeꞌ lazoꞌ naꞌ.
38 Jwanꞌ nasa, mnetir na, nekla yalguj, nek yalnaban, nek re anj, nek re yalnyebeꞌ nde yalne chanꞌ re mbi narax, nek re jwanꞌ nzo naya, nek re jwanꞌ nara yeꞌd,
39 nek re jwanꞌ mas gap ndaꞌb, nek re jwanꞌ mas naꞌs nde nek thib reta jwanꞌ ta nzo reꞌ, naꞌlide gan sikeꞌ tija naꞌ lo jwanꞌ nkeꞌ lazoꞌ Dios naꞌ por Jesucrist Xaꞌ Nyebeꞌ lonꞌ.