3
1 Jwanꞌ nasa ¿Cho yalwen ndeno nak men judí? ¿O cho sinꞌ li tyob be' lad men biꞌ ba?
2 Naꞌr toz mod ndli sinꞌna. Jwanꞌ ner nak, lo re xa' judí jwan nerla mzin xkiꞌs Dios.
3 ¿Cho kwan yotey, tez nzo xaꞌ naꞌndlid lazonꞌ Dios? ¿Cho jwanꞌ nasa laꞌ Dios jwanꞌ galꞌ nak Dios?
4 ¡Naꞌnakte! Dios thiblaꞌ wen nak Xaꞌ, teꞌnye reta men nakwinꞌ men, xa nchabka lo xkiꞌs Dios:
Por xkiꞌs la nak la Xaꞌ galꞌ
nde lu li gan senꞌ koxyo xaꞌ lu.
5 Mbay tez yalnarax chanꞌ naꞌ ndloꞌy jwan' gal' nak Dios, ¿Cho kwan gab naꞌ? ¿Cho naꞌgalꞌta nak Dios senꞌ ndaꞌ Xaꞌ diꞌs ndriꞌd naꞌ pen? (Xajka thi mena ngenin lo go'.)
6 ¡Naꞌnakte jwanꞌna! tak tezka ngak Dios Xaꞌ naꞌgalꞌta, ¿Xomod nyaꞌb Dios kwent lo reta men lo izyo sa?
7 Mbay tez por yalkwinꞌ chanꞌ na sa ndloꞌ masraꞌ jwanꞌ li nde yalnaro chanꞌ Dios, ¿Cho kwan liy nyaꞌb Dios kwent lon xajka men nzoꞌb xken na' ba sa?
8 Jwan' nasa pla xa' nke'yalkwin' nde mbez xa' na' ndlo' jwan' re': linꞌ jwanꞌ narax sa yeꞌd yalwen xa' ta mbez sa nzalꞌ xaꞌ kix xaꞌ xken xaꞌ.
Ngenta men wen
9 ¿Cho kwan gab naꞌ? ¿Re naꞌ men judi cho mas ntak naꞌ lo tedib ned men? ¡Naꞌnakte! tak ta xa mbezka náꞌ lo goꞌ, re men judi nde re men naꞌnakta judí nzo'b xken xa'.
10 Ta xa nchabka lo xkiꞌs Dios:
Ngenta men gal' nak, nek thib men naꞌngenta.
11 Ngenta cho men nchen,
ngenta cho men nkwanꞌ Dios.
12 Reta men ngetetaꞌb, ngok xaꞌ men ngen cho rsinꞌ.
Ngen cho li jwanꞌ wen, naꞌngenta nek thib xaꞌ.
13 Xa nak ti ro baꞌ ndoxalꞌla nak yen xaꞌ.
Nde los xaꞌ nkwinꞌ xaꞌ.
Leꞌ ro xaꞌ nzo diꞌs tin xa nak ro mbelꞌla.
14 Se ro xaꞌ nzo diꞌs nke'de xa' nde se lazo' xa' nzo xyan.
15 Nken toz lazo' xa' kuj xa' men.
16 Yalti nde yalnabil ndano xa' ploja nda xa'.
17 Nde nambyalod xaꞌ jwanꞌ nak yalnabeꞌz.
18 Nek lud naꞌnzepta lazoꞌ xaꞌ Dios.
19 Naya mnenꞌ, leꞌ reta jwanꞌ ta nge lo ley, ngeniy lo re men jwanꞌ nzo lo ley, sa nekthib xa' na'gabta na'ngenta xken xa', che'la reta xa' taya' kwent lo Dios.
20 Tak nek thib xa' nayanꞌgalꞌta lo Dios lo ndli xaꞌ re jwanꞌ ngeni ley, tak ley benꞌta ndliy ngoxo'ba xken men.
Lo ndlipa lazonꞌ Jesucrist nchanꞌ naꞌ men galꞌ
21 Leꞌ naya teꞌnye naꞌlid men re jwanꞌ nyebeꞌ ley, Dios mbloꞌ lonꞌ xomod ndablo ak men ti men galꞌ lo Dios, jwanꞌ xa nchabka lo ley nde jwanꞌ mdej re profet.
22 Dios ndli nchanꞌ men ti men galꞌ lo ndli lazoꞌ men Jesucrist. Nde ndli Xaꞌy kon reta men, oneja cho mena.
23 Lo ta reta men mbli jwanꞌ narax, jwanꞌna mbli mbro'tal men lo yalnaro chanꞌ Dios.
24 Leꞌ Dios, por yalwen chanꞌ Xaꞌ jwanꞌ naꞌnzalꞌta naꞌ kayanꞌ, tata mblilal Xaꞌ naꞌ men galꞌ lo Xaꞌ, lo ta mtolaꞌ Dios na' por jwan' mbli Jesucrist.
25 Dios mto Jesucrist sa mdaya' lazo' Xa' sa mbyax reta xken na' lo mxyo ren Xaꞌ nde ndli lazo' men Xa', tamod mblo' Dios ke gal' nak Xa' lo mxek Xa' nde na'ndapenta Xa' re men mbli yalke pola.
26 Ta ngoka sa ndloꞌ plopa gal' nak Dios naya nde thibka galꞌ nak Xaꞌ tak ndli Xaꞌ ke re men jwanꞌ ndli lazonꞌ Jesucrist nchanꞌ men, men galꞌ lo Dios.
27 ¿Ma yalbxalꞌ chanꞌ mbiꞌ sa? mbroꞌtala. ¿Cho kwanꞌ liy sa? ¿Cho tak lo mbli xaꞌ jwanꞌ nchab leya? Naꞌnakte, cheꞌla lo ndlipa lazoꞌ xaꞌy.
28 Jwanꞌ nasa naya mnenꞌ, leꞌ Dios ndlilal Xaꞌ naꞌ men galꞌ senꞌ lipa lazoꞌ men Jesus nde naꞌnakte tak ndli men jwanꞌ nyebeꞌ ley.
29 ¿Cho nak Dios benꞌta Dios chanꞌ re men judí? ¿Cho naꞌnoda nak Xaꞌ Dios chanꞌ re men naꞌnakta judí? Noga nak Xaꞌ Dios re men naꞌnakta judí.
30 Tak ben' thipta Dios nzo: Dios ta ndli sa nchanꞌ men, men galꞌ, re men ta ndlipa lazon' Xaꞌ, one cho ndob be' lad xa' o na'ngenta be' lad xa'.
31 Mbay ¿Cho lo ta ndlipa lazonꞌ Jesucrist sa gab naꞌ naꞌntakta ley? Naꞌnakte, cheꞌla tamod ndej naꞌ ke liga ndak ley.