3
Ndankeꞌn xis jwanꞌ ntoblon
1 Jwan' nasa, wes na, ptan na, blo nale lazoꞌ goꞌ lo ta ndli lazo' go' Xaꞌ Nyebeꞌ. Le' na, naꞌnchoched lazoꞌn bere keꞌn le'ga re jwanꞌ reꞌ lo goꞌ, tak sin' toz ndliy lo goꞌ.
2 Pkenap lazoꞌ goꞌ lo re xaꞌ ta nak xaja mbak, pkenap lazoꞌ goꞌ lo re xaꞌ ta narax nke sinꞌ, nde pkenap lazoꞌ goꞌ lo re xaꞌ axta rida' ne ron' ntyob be' men bi'.
3 Tak naꞌ re', liga nak na' men ndob be' lad na', re naꞌ ta Xbin Dios ndli sa ndlin' sin' lo Dios, nde ncho nale lazon' lo ta ndlí lazon' Jesucrist, nde naꞌntobta xgab naꞌ lo re jwanꞌ ta ndlin' lo izyo re'.
4 Te'nyega xa na re' nzo jwanꞌ toyal tob ron. Per tez nzo xaꞌ ndli xgab nzo jwan' toyal tob ro xa', na ngeno masa.
5 Ben'ta ngok xon wiz ngol na, mdob xa' be' lad na, lo bin Israél ndal na, jwan' nak lo bin Benjamín, nak na men hebreo tak xud na nde xna'n nak xa' men hebreo, le' lo ley ngok na xa' fariseo.
6 Nde lo mxoꞌbyek toz na ley, mchublan re xaꞌ jwanꞌ ndli lazoꞌn Jesús, nde re jwan' galꞌ mblin, mbli nay xata nyebeꞌ ley.
7 Per reta jwan' taja ntak toz lon nera', mblan retay xaja jwan' nantakta ba, lo ta nke' lazo'n Crist.
8 Nde liy, tak reta jwanꞌna naꞌntaktay ke lo jwanꞌ wen ta nzolon Crist Jesús, Xaꞌ Nyebeꞌ lon. Tak lo nkeꞌ lazoꞌn Crist mblan reta jwanꞌ nak na, nde reta jwanꞌna ngwi' nay xaja yixa, tamod sa lin gan Crist.
9 Nde thita ak na kon Xaꞌ, naꞌnakte lo mxobyek na ley sa ngok na men galꞌ, cheꞌla leꞌn ngok galꞌ lo ndli lazoꞌn Crist, nde leꞌ jwanꞌ galꞌ naka chanꞌ Dios lo ndlipa lazoꞌ men Crist.
10 Jwan' ncholas na nak yolon Crist, ten' na yalne jwan' mbroꞌxban Crist, tyak na re yalti jwanꞌ xa mxak Xaꞌ nde gaj na jwan' xa nguj Xaꞌ,
11 tezka ngujla na koꞌxban Jesús na xij re men nguj.
Chal na' yoxo'b na'
12 Naꞌnaktey jwanꞌ mblila na gan, nekla tera' ak na ti men jwanꞌ xa nchola'spa' Dios; che'la nchal ney sa ryo'xo'b na lo jwan' mbrez Jesucrist na.
13 Wes na, ptan na, leꞌga na naꞌnit na ke ngola na jwanꞌ reꞌ, per nzo thipta jwanꞌ ndlin: Lipa ndotoriꞌdla na yek na reta jwanꞌ mbri'dla, nde nchal na kayan jwanꞌ naraꞌ yeꞌd.
14 Jwanꞌ nasa ngechal na yoxo'b na nde gal na jwanꞌ lin gan ta' Dios, lo mbrez Xaꞌ na ta ndli lazon' Jesucrist.
15 Reta naꞌ ta ngola xgab naꞌ lo chanꞌ Dios, ndablo reta naꞌ keno xgab reꞌ, nde tez nzo jwanꞌ xaꞌla mod ndli goꞌ xgab, noga jwanꞌna Dios loꞌy lo goꞌ.
16 Per jwanꞌ ndablo lin' nak, thipta xis jwan' tyonken' nde lin' jwan' xa mblo' Dios lon'.
17 Wes na, ptan na, bli goꞌ xa ndlin, nde nogaꞌ bwiꞌ goꞌ lo re xaꞌ tagaꞌ ndli, jwanꞌ xa ndloꞌ náꞌ lo goꞌ.
18 Tak ba ngete bro toz xaꞌ, re xa' ta mdej tozla na lo go', nde naya axta nchonꞌ na ndotej ney lo goꞌ, tak re xaꞌ ya ngiꞌ xaꞌ ta nguj Crist lo kruz.
19 Per lux xa', tamod yolo chan' xa'. Tak dios xaꞌ nak be'nta re jwan' nya'b bel' xa' nde jwan' nxyalꞌno xaꞌ nak re jwanꞌ ndablo tyolaꞌs men; benꞌta re jwanꞌ lo izyo ndli xaꞌ xgab.
20 Tak laz naꞌ nak lo beꞌ, tya ngembed naꞌ ryo' Xa' tolan', Jesucrist Xaꞌ Nyebeꞌ.
21 Tse' Xa' bel' naꞌ jwanꞌ ta ndluxa, sa lilal Xa' na' jwan' xa nak Xa' anta ndyob xni ndlyabel nya Xa'. Nde li Xa'y kon le'ga yalne ngeno Xaꞌ, jwan' ta nyebeꞌ Xaꞌ lo reta jwanꞌ.