Yeꞌs jwanꞌ mkeꞌ Apóst Pab lo re xaꞌ yez
Filipenses
1
Pab kon Timoteo nkeꞌ yeꞌs lo yodoꞌ Filipos
1 Na Pab kon Timoteo, xa' ndli sinꞌ lo Jesucrist, ngekeꞌ ná' yeꞌs reꞌ lo re goꞌ men nayon ta ndli lazon' Jesucrist, re goꞌ ta ngenap yez Dios kon re go' ta ndli sinꞌ lo yez Dios ta nzo yez Filipos.
2 Yalwen nde yalnabe'z chan' Xud na' Dios nde chan' Jesucrist Xa' nyebe' tyono reta go'.
Pab nyaꞌb lo Dios por re xaꞌ ndli lazonꞌ Jesús
3 Ndan dyux lo Dios na reta senꞌ ntelas na goꞌ,
4 reta senꞌ ndyodiꞌsnon Dios, thibla' nale nzo lazoꞌn nyaꞌb na lo Dios por reta goꞌ,
5 tak thipta ngok go' kon na lo diꞌs wen chanꞌ Jesucrist, xata wiz ner mbli lazo' go'y nde axta wiz naya.
6 Mnepa na, le' Xaꞌ ta mdobte sin' wen lenꞌ lazoꞌ goꞌ, ndatoxut Xa'y axta kebeꞌ zin wiz ye'd Jesucrist.
7 Nzal'ka ta xgab ndlin ngwiꞌn goꞌ, lo ta nzo go' lazoꞌn, nde ndo go' kon na lo yalwen chanꞌ Dios, lo ngeꞌn lizyiꞌb, lo ndlan nde ndej na xa nakpa diꞌs wen chanꞌ Jesucrist.
8 Tak Dios mne nkeꞌ toz lazoꞌn reta goꞌ ta xata nabe'z nak yalwen chan' Jesucrist.
9 Nde jwanꞌ reꞌ nyaꞌb na lo Dios, sa masraꞌ xyen jwanꞌ ta nkeꞌ lazoꞌ goꞌ ta men goꞌ, nde Dios ta' yalnchak lo goꞌ nde Xa' li yen goꞌ reta jwanꞌ,
10 sa nye goꞌ thibla' jwin kwi goꞌ jwanꞌ wen. Tamod sa nambi ban goꞌ nde na'xyopta xken goꞌ wiz ye'd Crist,
11 thibla' li goꞌ jwanꞌ galꞌ kon yalne chan' Jesucrist sa ak naro le Dios nde wen ni men xis Dios.
Yalnaban chan' na nak Crist
12 Wes na, ptan na, ncholas na nye goꞌ, leꞌ re jwanꞌ ta mbriꞌd na, mbli sin'na sa masra' mbyaj diꞌs wen chanꞌ Jesucrist.
13 Tak reta xaꞌ jwanꞌ nzi kenap yolow nde temasraꞌ men, mne xaꞌ lo ta ndlin sinꞌ lo Crist jwanꞌna ndli sa ngeꞌn lizyiꞌb reꞌ.
14 Nde lo ta ngeꞌn lizyiꞌb, mer re xaꞌ ta ndli lazoꞌn Dios masraꞌ ngone lazoꞌ xaꞌ, naꞌnzyebta xaꞌ ndej xaꞌ xkiꞌs Dios.
15 Gal' di's, nzo pla xaꞌ ben' ndej xa' xkiꞌs Jesucrist tak ngi' xa' ngwi' xa' sin' ndlin nde nchola's xaꞌ li xa' gan lon, per nzo xaꞌ ndej xki's Jesucrist dib nzo lazoꞌ xaꞌ.
16 Nzo xa' ndej xki's Jesucrist sa nkwan' xa' byo, nandlid xaꞌy dib nzo lazoꞌ xaꞌ, benꞌta ndli xa'y tak ncholaꞌs xaꞌ masra' layo xaꞌ na ta ngeꞌn lizyiꞌb re'.
17 Leꞌ tedib ned xaꞌ ndliy tak nkeꞌ lazoꞌ xaꞌ Crist, nde mne xaꞌ ndon ncheꞌ sa na'tat na diꞌs kinyo xa' di's wen chanꞌ Jesucrist.
18 Per ngen kwan liy, oneja xomod ndli xaꞌy, cho dib nzo lazoꞌ xaꞌy o naꞌnaktay, per jwan' ntak nak, masra' ndora's xkiꞌs Jesucrist, jwanꞌna ndli ncho nale lazoꞌn, nde masraꞌ nale yo lazoꞌn.
19 Tak mnen zin ti wiz ryo'te'n lizyi'b reꞌ lo ta ngenaꞌb goꞌ lo Dios por na nde Mbi Nayon chanꞌ Jesucrist ndlaꞌstoy na.
20 Jwanꞌ ncholas na nde jwanꞌ ngembed na nak, nek lud nata'd Dios di's ryo' yanthon, cheꞌla dib xla's, thibla' lo' yalnaro chan' Crist lo jwan' ndori'd na, one cho naban na o nguj na.
21 Tak na, lo naban na, naban na par Crist, nde tez nguj na, mbliga na gan.
22 Mbay tez naban na, yalwen naka lon tak le'n li sinꞌ lo Crist, jwanꞌ nasa naꞌnyet na xanyay kwin.
23 Nagan naka kwin thiba, lo rop jwanꞌ reꞌ: ncholas na gaj na sa ndyan yon kon Crist, tak jwanꞌ re' mas jwin par na.
24 Per lo ta naban na, mas jwina par yalwen lo goꞌ.
25 Nde ndli lazo'n jwanꞌ reꞌ, mnen ke ben' tban na nde ben' ton xij goꞌ, sa laꞌston goꞌ nde masra' yo nale lazoꞌ goꞌ lo ta ndli lazoꞌ goꞌ Jesucrist.
26 Jwan' nasa, lo sen' tyon xij goꞌ tedib gob, masra' yo nale lazo' go' li naro go' Jesucrist.
27 Benꞌta ndablo ban goꞌ jwan' xa ngeni diꞌs wen chanꞌ Jesucrist. Sa tezka yatwiꞌn goꞌ, o naꞌyat na, ncholas na gon na ke thita nalí nak xgab reta goꞌ, nde thita nchal goꞌ lo jwanꞌ ta ndli lazoꞌ goꞌ lo diꞌs wen chanꞌ Jesucrist,
28 nde nek lud naꞌzyepta goꞌ re xaꞌ ta nayi' lo goꞌ. Jwanꞌ re' naka ti beꞌ, le' re xaꞌ ya lux xa', nde le' lo goꞌ naka ti be' jwan' lyaꞌ goꞌ nde jwanꞌ re' naka chanꞌ Dios.
29 Tak Crist mbli sa mdaꞌ Dios yalwen re' lo go', nanakte benꞌta li lazoꞌ goꞌ Crist, che'la nogaꞌ rid goꞌ yalti por Xaꞌ.
30 Goꞌ nde na thita yalti ndriꞌd na'. Mnela go' xa mchal na mbri'd na lo re yalti nera', nde nchon goꞌ xa nchal na ndorid nay naya.