3
Xamod ndablo kwe re xaꞌ ndob salꞌ naꞌ
1 Taga re goꞌ men got, bin goꞌ diꞌs ro salꞌ goꞌ, sa tez nzo ti goꞌ, salꞌ naꞌ nandlid lazonꞌ xkiꞌs Dios, lo wiꞌ xaꞌ xa nak goꞌ, tli lazoꞌ xaꞌy, nanakinꞌta tej goꞌy lo xaꞌ,
2 lo wiꞌ xaꞌ naxut nak goꞌ nde nchon goꞌ diꞌs.
3 Lo tyokwaꞌ goꞌ naꞌaktey jwanꞌ xis, xa ndrid beꞌ nguꞌ yis yek goꞌ, re jwanꞌ or ndlirsinꞌ goꞌ o re lar nap jwanꞌ ndaꞌ xna lo goꞌ,
4 cheꞌla wiꞌ goꞌ xa nak lenꞌ lazoꞌ goꞌ, nabeꞌz gok goꞌ, nadoꞌ gok goꞌ, jwanꞌ na nanchasaꞌda nde jwanꞌ na ntak toz lo Dios.
5 Tak ta mbli re men got nayon ngo pola, mblí lazoꞌ xaꞌ Dios nde mbin xaꞌ diꞌs ro salꞌ xaꞌ.
6 Ta mbli Sar, mbin xaꞌ diꞌs ro salꞌ xaꞌ Abraham nde mni xaꞌ lo Abraham “salꞌ na”. Nde goꞌ nak xinꞌ Sar, tez ndli goꞌ jwanꞌ wen nde ngen cho kwan nzyeb goꞌ.
7 Nde taga goꞌ men biꞌ, naxut btobno goꞌ salꞌ goꞌ. Pkenap goꞌ xaꞌ, xaja thi jwanꞌ nadan toza, tak noga xaꞌ kayaꞌ yalnaban jwanꞌ taꞌ Dios lo goꞌ tak wen nak Dios. Ta bli goꞌ sa naꞌngen kwan towꞌ lo xkiꞌs goꞌ senꞌ todiꞌsno goꞌ Dios.
Jwanꞌ ndablo li men nzolo Dios
8 Jwanꞌ ncholas na nin lo goꞌ, thita gok reta goꞌ, tita xgab ptono goꞌ, pkeꞌ lazoꞌ goꞌ ta goꞌ xajka men liza, blat lazoꞌ goꞌ nde naxut psalꞌ ta goꞌ.
9 Naꞌsired goꞌ jwanꞌ narax lo men ndli jwanꞌ narax lo goꞌ, naꞌkeꞌded goꞌ men jwanꞌ nkeꞌde xis goꞌ, cheꞌla wen mni goꞌ xis xaꞌ, tak mnela goꞌ mkweꞌz goꞌ sa kayaꞌ goꞌ yalwen.
10 Tak nchab lo xkiꞌs Dios:
Tez cho ncholaꞌs ban nde nabeꞌz yo,
kenap xaꞌ los xaꞌ lo re diꞌs narax,
nde naꞌnid xaꞌ re diꞌs kwinꞌ.
11 Laꞌ xaꞌ jwanꞌ narax, nde li xaꞌ jwanꞌ wen,
kwanꞌ xaꞌ yalnabeꞌz nde nabeꞌz ak xaꞌ.
12 Tak Dios nkenap re men galꞌ nkete,
nde nchon Xaꞌ xkiꞌs re men ya,
Leꞌ re xaꞌ ndli jwanꞌ narax, naleꞌda ngwiꞌ Dios xaꞌ.
13 Nde, ¿cho li gan toti goꞌ, tez thibla jwanꞌ wen ndli goꞌ?
14 Mbay tez jwanꞌ galꞌ ndli goꞌ nde ne ndrid goꞌ yalti, nabeꞌz toz nda goꞌ. Jwanꞌ nasa nandabloda zyeb goꞌ nde nalid goꞌ xgab,
15 cheꞌla dib nzo lazoꞌ goꞌ bxobyek goꞌ Crist, Xaꞌ Nyebeꞌ. Nde thibla bresaꞌ goꞌ, sa naxut nde nadoꞌ kab goꞌ, choja lo men jwanꞌ nyabdiꞌs lo goꞌ, lo jwanꞌ ngembed goꞌ.
16 Nde nambi gok xgab goꞌ, sa re men jwanꞌ nixin xis goꞌ, lo wiꞌ xaꞌ naxut nak goꞌ lo ta ndli lazoꞌ goꞌ Crist, ryoꞌ yantho xaꞌ.
17 Tak jwin toz nak, rid men yalti, lo ndli men jwanꞌ wen, tez ta ncholaꞌs Dios, kega lo li men jwanꞌ narax.
18 Tak taga Crist mbrid Xaꞌ yalti nde ti gobta nguj Xaꞌ por reta xken naꞌ, tenye ngen cho yalke nchap Xaꞌ per nguj Xaꞌ por reta men nzo'b xkenaꞌ, sa we Xaꞌ naꞌ lo Dios. Nguj Xaꞌ xajka men lo izyo re, per naban xbin Xaꞌ.
19 Nde ngwa xbin Xaꞌ tenꞌ nzo nowꞌyo re xbin men nguj, ngwa nì Xaꞌ.
20 Re xaꞌ reꞌ naꞌngonta diꞌs pola, senꞌ mxek Dios nkembed Dios lo ndotoxkwaꞌ ark senꞌ ngo Noé pola, jwanꞌ plata men mblyaꞌ, benꞌta xon xaꞌ mblyaꞌ lo nit.
21 Leꞌ nit ya nak xaja nit ndryoꞌlenꞌ naya, ntolaꞌy naꞌ lo ta mbroꞌxban Jesucrist. Lo ta ndryoꞌle naꞌ naktey jwanꞌ nkib yo lad naꞌ, leꞌy ndli sa keꞌyek naꞌ kenonꞌ xgab nambi lo Dios.
22 Nde lo ngwap Jesucrist lo beꞌ, ndob Xaꞌ lad ban Dios, tya nyebeꞌ Xaꞌ lo reta anj, lo reta yalnyebeꞌ nde lo reta yalne.