8
Jesus ntodanꞌ ti xaꞌ ndyak ye'sya's
(Mr. 1:40-45; Lc. 5:12-16)
1 Senꞌ mbere Jesús lo ta ngwa Jesús yek yiꞌ ya, men toz tir ndenke xis Xaꞌ.
2 Zyasa mbike thi mbiꞌ ndyak ye'sya's, nde mdoxub xaꞌ lo Jesús nchab xa:
—Xa' Nyebe', Nya'b na loa todan' na, lu toyal liy tez ncholaꞌs la li ley.
3 Jesús mtogaꞌ yanꞌ mbwal xaꞌ men yisa, nde nchab Jesús lo xaꞌ:
—Ncholas na dyanꞌ la. Gok nadanꞌ.
Nde zyaga, mdyanꞌ xaꞌ lo yis ya.
4 Nde nchab Jesús lo xaꞌ:
—Wiꞌ nea, ngen cho lo gab la jwanꞌ reꞌ, benꞌta wa lo xaꞌ nak nglweyꞌ sa wiꞌ xaꞌ lu, nde wano gon jwanꞌ mnibeꞌ Moisés, sa nye re nglweyꞌ mdyanꞌ la lu lo yis ndyak la.
Jesús mtodanꞌ ti mos xaꞌ nyebeꞌ lo sondad
(Lc. 7:1-10)
5 Senꞌ ngote Jesús lenꞌ yez Capernaum, mbike ti xaꞌ nyebeꞌ lo tib ayoꞌ sondad Roman nde mnaꞌb xaꞌ lo Jesús,
6 nchab xaꞌ:
—Xa' nybe', ti mos na nax lo yis liz na, nguj ti ble xaꞌ nde jwanꞌ toz tir nchow xaꞌ.
7 Nde Jesús mkab lo xaꞌ:
—Ndan liz la, sa todanꞌ na xaꞌ.
8 Leꞌ xaꞌ nyebeꞌ lo sondad nchab lo Jesús:
—Señor, nansalꞌta na yotea lenꞌ liz na, benꞌta mnibeꞌ lo yis, sa dyanꞌ mos na.
9 Tak noga na, nzo xaꞌ nyebeꞌ lon, nde ngenon re sondad jwanꞌ nyebeꞌn lonꞌ. Senꞌ gab na lo thi xaꞌ, wa, xaꞌ ya nda; nde lo tib xaꞌ gab na, deꞌ, xaꞌ ya nde; nde lo mos na nyebeꞌn bli jwanꞌ reꞌ, nde ndli xaꞌy.
10 Senꞌ mbin Jesús jwanꞌ na, nzoyen toz Xaꞌ nde nchab Xaꞌ lo re men ta ndenke xis Xaꞌ:
—Lipa nin lo goꞌ, tera zyal na nek tib xaꞌ Israel, ndli lazonꞌ xaja ndli lazoꞌ mbiꞌ reꞌ.
11 Nde na ni lo goꞌ, men toz ryoꞌ ned ncheꞌdke wiz nde ned nchaꞌd wiz, yo xaꞌ lo yalwa xij Abraham, xij Isaac nde xij Jakob lo yalnyebeꞌ lo beꞌ.
12 Leꞌ re xaꞌ jwanꞌ mkweꞌz ta ndablo yote lo yalnyebeꞌ, re xaꞌ ya kobi Xaꞌ le lo yalꞌkow, nde tya gon xaꞌ nde tyez le xaꞌ.
13 Zyasa nchab Jesús lo xaꞌ nyebeꞌ lo sondad:
—Bya liz la, nde ak jwanꞌ mnaꞌb la xata mbli lazoꞌa.
Nde hor yaga mdyanꞌ mos xaꞌ.
Jesús mtodanꞌ xnaꞌsap Pedr
(Mr. 1:29-34; Lc. 4:38-41)
14 Senꞌ ngote Jesús liz Pedr, nde tya mbwi Jesús, leꞌ xnaꞌsap Pedr nax nzo xlye.
15 Zyasa mbwal Jesús yaꞌ xaꞌ, nde mbroꞌ xlye xaꞌ, ngocheꞌ xaꞌ nde mbli xaꞌ sinꞌ lo Jesús.
16 Lo senꞌ mbla yalꞌ, mbyeꞌdno re men naꞌr toz re xaꞌ nzo mbi narax; zyasa mnibeꞌ Jesús lo reta mbi narax nde mbroꞌtey, taga mtodanꞌ Jesús reta xaꞌ nayiz.
17 Tamod sa ngok jwanꞌ mkeꞌ xaꞌ mbrid xkiꞌs Dios pola ndole Isaías: "Leꞌ xaꞌ mkib re nchow lad naꞌ nde mbeꞌ xaꞌ reta yis ndyak naꞌ."
Re xaꞌ jwanꞌ ncholaꞌs tyonke xis Jesús
18 Lo senꞌ mne Jesús men toz mdyop tenꞌ ndo Jesús, mnibeꞌ Jesús lo re xin'te'd Xaꞌ, sa ya xaꞌ tedib lad ro nittoꞌ.
19 Zyasa mbyed thi maestr lo ley xkiꞌs Dios, nde nchab xaꞌ lo Jesús:
—Maestr, ncholas na tyonkeꞌn xis la one ploja ndaa.
20 Nde Jesús mkab lo xaꞌ:
—Re mbeꞌd ngeno yeꞌr plo ncho maꞌ, nde re mbin ngeno maꞌ lyeꞌd maꞌ, leꞌ Xinꞌ Mbiꞌ nankenod Xaꞌ lizpa Xaꞌ.
21 Leꞌ tedib xaꞌ, xaꞌ jwanꞌ nak xin'te'd Jesús nchab lo Jesús:
—Xaꞌ Nyebeꞌ, taꞌ diꞌs, nerla kaꞌs na xud na.
22 Leꞌ Jesús mkab lo xaꞌ:
—Ptonke xis na, nde blaꞌ re xaꞌ nguja kaꞌs xaꞌ ta nguj xaꞌ.
Jesús mbli ngotaꞌb thi yalnathoz
(Mr. 4:35-41; Lc. 8:22-25)
23 Nde ngwap Jesús lo bark, nde reta xin'te'd Xaꞌ mdonke xis Xaꞌ.
24 Zyasa mbroꞌ thi mbi toz mxyob lo nittoꞌ, nde re bde lo nittoꞌ mdoliy axta nkoꞌta dib bark, laja leꞌ Jesús naxyat.
25 Zyasa ngwa re xin'te'd Jesús ngoloꞌ xkalꞌ xaꞌ Jesús nde nchab xaꞌ:
—¡Señor, tolaꞌ naꞌ! ¡Tak leꞌ naꞌ lux!
26 Leꞌ Jesús mkab lo re xaꞌ:
— ¿Cho kwan liy nzyeb goꞌ? ¡Lud toz ndli lazoꞌ goꞌ Dios!
Ngolo nchab Xaꞌ jwanꞌ na, ngoche Xaꞌ nde mnibeꞌ Xaꞌ lo mbi nde lo nittoꞌ sa kwexey, nde xej mbrexe rey.
27 Nde re mbiꞌ ya nzoyen xaꞌ nde nchab xaꞌ:
—¿Cho mbiꞌ reꞌ, sa axta re mbi nde nittoꞌ nxobyeka Xaꞌ?
Chop xaꞌ nzo mbi narax yez Gadara
(Mr. 5:1-20; Lc. 8:26-39)
28 Senꞌ lo mzin Jesús tedib lad ro nittoꞌ, lo xyon xaꞌ Gadara, tya xij re baꞌ mbroꞌ chop mbiꞌ nzo mbi narax, nde mbike xaꞌ gax lo Jesús. Rop xaꞌ ya nayiꞌ toz xaꞌ, jwan nasa ngencho li gan ridndab ned ya.
29 Nde tolo mbrezyaj xaꞌ nchab xaꞌ:
— ¿Cho kwan ndyak noa náꞌ, Jesús Xinꞌ Dios? ¿Cho se nde totia náꞌ nde tera gal beꞌy?
30 Nde tij tya nzi bro toz nguch jwanꞌ nzi kenap xaꞌ.
31 Nde leꞌ re mbi naraxa, mnaba lo Jesús, nchaba:
— Tez kotea náꞌ, taꞌ diꞌs lya náꞌ lenꞌ re nguch ta nzi ba.
32 Jesús mkab:
—Wa goꞌ.
Leꞌ re mbi narax mbroꞌte lenꞌ rop mbiꞌ ya nde mblay lenꞌ re nguch, zyasa re nguch zyaga mbixndab re maꞌ yek ble, ngob maꞌ lenꞌ nittoꞌ nde nguj re maꞌ.
33 Leꞌ re men ngenap nguch mxonꞌ xaꞌ, ndya xaꞌ yez, lo senꞌ mzin xaꞌ yez mdej xaꞌ reta jwanꞌ ngote re nguch, nde re jwanꞌ ngote rop mbiꞌ ya.
34 Zyasa reta men yez ya, ngwa xaꞌ plo ndo Jesús, lo mbwiꞌ xaꞌ Jesús, mnab xaꞌ lo Jesús, sa ryoꞌte Jesús lo xyon xaꞌ.