3
Juan ngole men, ndaꞌ xkiꞌs Dios
(Mr. 1:1-8; Lc. 3:1-9,15-17; Jn. 1:19-28)
1 Lo ta benꞌ nzo Jesús tya, Juan ta ngole mena, ngwa taꞌ xkiꞌs Dios lad izyo nagan lo xyon Judea,
2 nde nchab xaꞌ:
—Blaꞌ goꞌ re jwanꞌ narax nak goꞌ nde bere goꞌ lo Dios, tak yalnyebeꞌ lo beꞌ nde sin gaxla.
3 Juan reꞌ ta mdej xaꞌ mbrid xkiꞌs Dios pola ndole Isaías senꞌ nchab xaꞌ:
Nchen mbez thi xaꞌ lad izyo biz:
"Ptoxkwaꞌ goꞌ xned Xaꞌ Nyebeꞌ
nali bdix goꞌ xned xaꞌ."
4 Xab Juan naksaꞌ yis lad kamey, nde lenꞌ Juan nachal sinch yid, nde jwanꞌ ncha Juan nak mbesto nde mzin nzo wan nguꞌ Juan.
5 Zyasa xaꞌ nzo yez Jerusalén, nde re xaꞌ nzo temas yez nzi dib lo xyon Judea nde xaꞌ nzo gax dib ro yoꞌ Jordán nda wiꞌ xaꞌ lo Juan.
6 Nde senꞌ nxobdol xaꞌ re xken xaꞌ, ngole Juan xaꞌ lenꞌ yoꞌ Jordán.
7 Lo mne Juan bro toz re xaꞌ fariseo nde re xaꞌ saduceo, nde xaꞌ plo ngegole Juan re men, zyasa nchab Juan lo re xaꞌ ya:
—¡Go' ba nya lo bin mzib ba nak goꞌ! ¿Cho ne lo goꞌ xyonꞌ goꞌ lo yalnayi' chanꞌ Dios ta nde gaxa?
8 Bloꞌ goꞌ ke lipa mblaꞌ goꞌ re mod narax nak goꞌ.
9 Nde nalid goꞌ xgab lenꞌ lazoꞌ goꞌ: "Náꞌ nde lo bin Abraham"; tak na ni lo goꞌ, axta re ke reꞌ toyal liche Dios men nde lo bin Abraham.
10 Leꞌ yibya ndabsaꞌla xis lox re ya, nde reta ya jwanꞌ naꞌtada ngud wen, xchoꞌy nde yoy lo ki sa yola.
11 Na, galꞌ diꞌs ngolen men lenꞌ nit, sa loꞌ ke lipa mblaꞌla xaꞌ mod narax nak xaꞌ. Per Xaꞌ jwanꞌ ndenke xis na Xaꞌ ya ngeno mas yalnyebeꞌ ke na, nde nekla yalyid Xaꞌ nanzalꞌta na wen, Xaꞌ ya kole men kon Mbi Nayon nde kon bel.
12 Nde nzola pal yaꞌ Xaꞌ sa to Xaꞌ trig nde kosaꞌ Xaꞌy tenꞌ nchotsaꞌ mbis, leꞌ yix trig tolꞌ Xaꞌy lo bel jwanꞌ nanchuꞌtirta.
Jesús mdryoꞌle
(Mr. 1:9-11; Lc. 3:21-22)
13 Zyasa, Jesús mbroꞌ Galilea nda Xaꞌ yoꞌ Jordán, plo ndo Juan sa kole Juan Xaꞌ.
14 Per leꞌ Juan nandeyalta, nde nchab Juan lo Jesús:
—Lu ndablo kolea na, ¿Kwan liy sa lu cheꞌ nde lon?
15 Leꞌ Jesús mkab:
—Taꞌ diꞌs cheꞌ mod aka naya, tak nakinꞌ linꞌ re jwanꞌ ncholaꞌs Dios.
Zyara mxeyal Juan.
16 Nde senꞌ ngolo mbroꞌle Jesús, leja mbroꞌte Xaꞌ lenꞌ nit, zyasa cho leꞌ lo beꞌ mxyalꞌ nde mbwiꞌ Jesús Xbin Dios ndala xaja paloma nde mblatoba yek Jesús.
17 Nde mbyen mni thi Xaꞌ lo beꞌ nchab:
—Xaꞌ reꞌ nak Xinꞌ na jwanꞌ nkeꞌ toz lazoꞌn, nde nale toz nzo nale lazoꞌn win' Xa'.