28
Mbroꞌxban Jesús
(Mr. 16:1-8; Lc. 24:1-12; Jn. 20:1-10)
1 Ngolo mbrid wiz jwanꞌ ndryoxkwen men, senꞌ ndatuxni doming, ngwa Mari Magdalen kon tedib Mari, ngwa twiꞌ xaꞌ banꞌ Jesús.
2 Nde mbwin thi xo toz. Tak thi anj chanꞌ Dios mbroꞌ lo beꞌ, mbla nde mzikeꞌ anj ke ta nowꞌ ro baꞌ nde mdob anj xis ke.
3 Anta ndlya bel nya xaꞌ, xa nya bel tiꞌ ba nde leꞌ xab xaꞌ nakis tir nya, xaja nya yike.
4 Senꞌ mbwiꞌ re sondad anj, mzyeb toz xaꞌ, anta nxiꞌd re xaꞌ nde ngob xaꞌ xaja xaꞌ nguja xaꞌ.
5 Zyasa nchab anj lo rop ngol:
—Naꞌzyebta goꞌ, mnela na leꞌ goꞌ nkwanꞌ Jesús, Xaꞌ ta mkeꞌ men lo kruz.
6 Naꞌngenta Xaꞌ ncheꞌya, leꞌ Xaꞌ mbroxbanla xa nchabka xaꞌ ya, deꞌ goꞌ sa wiꞌ goꞌ tenꞌ mdix men Xaꞌ.
7 Pken goꞌ wa goꞌ nde gus goꞌ lo re xin'te'd Xaꞌ: “Leꞌ Xaꞌ mbroxbanla nde ndatela Xaꞌ Galilea, tya wiꞌ goꞌ Xaꞌ. Jwanꞌ nata nin lo goꞌ.
8 Zyasa leꞌ rop ngol mbroꞌ tenꞌ ndob baꞌ, mzyeb ngol nde nale toz ngo lazoꞌ ngol mkeꞌ ngol karel ndayab ngola lo re xin'te'd Jesús. Nde laja nda rop ngol,
9 cho leꞌ Jesús mbroꞌto mni dyux lo ngol. Zyasa mbike gax rop ngol, mdoxub ngol, mbli naro ngol le Jesús nde mdeꞌs ngol ni Jesús.
10 Nde Jesús nchab lo rop ngol:
—Naꞌzyebta goꞌ. Wa yab goꞌ lo re xin'te'd na, sa ya xaꞌ Galilea, tya wiꞌ xaꞌ na.
Re jwanꞌ nchab re sondad
11 Laja nda rop ngol, pla sondad ngwa yez Jerusalén nde mdaꞌ xaꞌ kwent reta jwanꞌ ta ngotey lo re nglweyꞌ jwanꞌ nyebeꞌ.
12 Nde re nglweyꞌ ya ngwa todiꞌsno re xaꞌ gox jwanꞌ nyebeꞌ lo yez nde thita ngok diꞌs re xaꞌ, nde tmi toz mdaꞌ xaꞌ lo re sondad,
13 nde nchab xaꞌ lo re sondad:
—Gus goꞌ, yalꞌ senꞌ nzi yat náꞌ mbyed re xin'te'd Xaꞌ, nde mbli wanꞌ xaꞌ Xaꞌ.
14 Nde tez leꞌ gobernador nye jwanꞌ reꞌ, náꞌ ko yek xaꞌ sa nangen cho kwan li no xaꞌ goꞌ.
15 Nde re sondad mxen tmi nde mbli xaꞌ xata nchab re xaꞌ ya lo xaꞌ. Nde yalkwinꞌ reꞌ nchaj xij re xaꞌ Judío axta naya.
Jesús mbloned re xin'te'd Xaꞌ
16 Nde re siꞌ btib xin'te'd Jesús nda Galilea, lo yiꞌ jwanꞌ tenꞌ mnabeꞌ Jesús.
17 Nde senꞌ lo mbwiꞌ re xaꞌ Jesús, mdoxub xaꞌ lo Jesús, per ti pla xaꞌ ngok rop xgab naꞌ.
18 Nde Jesús mbike lo re xaꞌ nde nchab Jesús lo xaꞌ:
—Dios mdaꞌa dib yalnibe lon sa nyebeꞌn lo beꞌ nde lo izyo.
19 Jwanꞌ nasa, wa goꞌ, nde ptoteꞌd goꞌ men dib nax izyo, sa ak xaꞌ xinꞌteꞌd na nde kole goꞌ xaꞌ kon le Xud goꞌ Dios, kon le Xinꞌ Xaꞌ, nde kon le Mbi Nayon,
20 nde bloꞌ goꞌ lo men li men reta jwanꞌ mnibeꞌn lo goꞌ. Nde wiꞌ goꞌ nea, na ndono goꞌ reta wiz, axta kebeꞌ lux izyo. Tamod naka.