23
Jesús ngoxob xa nak re xaꞌ fariseo nde re maestr nchak ley
(Mr. 12:38-40; Lc. 11:37-54; 20:45-47)
1 Xisa, nchab Jesús lo re men nde lo re xin'te'd xaꞌ:
2 —Re maestr lo ley nde re xaꞌ fariseo, nak xaꞌ nzi sa loꞌ xaꞌ ley chanꞌ Moisés
3 Jwanꞌ nasa re jwanꞌ nye xaꞌ lo goꞌ li goꞌ, bxobyek goꞌy nde bli goꞌy, per naꞌlid goꞌ xa ndli xaꞌ, tak xaꞌga jwanꞌ mbez xaꞌ nde xaꞌga jwanꞌ ndli xaꞌ
4 Tak ndlino xaꞌ re men xaja ndli ti men ntob yoꞌ ne toz nga ngen cho li gan we, nxoꞌb xaꞌy yen re men, nde leꞌ xaꞌ nek lud nandaꞌyaꞌd xaꞌ laꞌsto xaꞌ men sa we mena.
5 Nde reta jwanꞌ ndli xaꞌ, ndli xaꞌy sa yoyen men jwanꞌ ndli xaꞌ. Ndyen xaꞌ tobo xaꞌ yen yaꞌ xaꞌ nde keꞌ xaꞌ cholo xaꞌ yid nolꞌ jwanꞌ nge xkiꞌs Dios lonꞌ, nde nakij xaꞌ nchok xaꞌ lar nolꞌ.
6 Nde ndyen xaꞌ tyob xaꞌ tenꞌ ndyob re xaꞌ ntak ten nzo yalwa, nde taga' ndli xaꞌ lenꞌ re yo tenꞌ ndyop xaꞌ Israel.
7 Nde ndyen xaꞌ ni men dyux lo xaꞌ lo xbiꞌ, nde gab men lo xaꞌ: maestr.
8 Per goꞌ, naꞌtaꞌd goꞌ diꞌs koꞌle men goꞌ maestr, tak thita Xaꞌ nak Maestr goꞌ, Xaꞌ ya nak Crist, nde reta goꞌ thita wes goꞌ.
9 Nde naꞌkoled goꞌ xud goꞌ nek tib xaꞌ lo izyo reꞌ, tak thita Xaꞌ nak Xud goꞌ, leꞌ Xaꞌ ndob lo beꞌ.
10 Neꞌka ryoꞌle goꞌ maestr, tak thipta xaꞌ nak maestr goꞌ, Xaꞌ ya nak Crist.
11 Xaꞌ jwanꞌ mas ntak xij goꞌ, xaꞌ ya ndablo li sinꞌ lo re goꞌ.
12 Tak xaꞌ nchak naro, xaꞌ ya ryoꞌyantho nde xaꞌ ndla yek naꞌ, xaꞌ ya ak naro.
13 Per, ¡nalat nya goꞌ, maestr nchak ley nde re goꞌ xaꞌ fariseo, makwinꞌ!, tak ntowꞌ goꞌ lo re men sa naꞌyoted men lo yalnyebeꞌ lo beꞌ. Tak neka goꞌ yote nde neꞌka taꞌ goꞌ diꞌs yote re men nchal yote.
14 ¡Nalat nya goꞌ maestr nchak ley nde goꞌ fariseo, makwinꞌ!, tak nkib goꞌ liz re ngol nguj salꞌ naꞌ, nde sa naꞌloꞌd jwanꞌ ndli goꞌ, nolꞌ toz ndodiꞌs goꞌ senꞌ ndyodiꞌsno goꞌ Dios. Lo ta ndli goꞌ, mas naro yalke nxoꞌb goꞌ xis goꞌ.
15 ¡Nalat nya goꞌ, maestr nchak ley nde re goꞌ fariseo, makwinꞌ!, izyo nde nittoꞌ ndye goꞌ nkwanꞌ goꞌ men li lazonꞌ jwanꞌ ndli lazoꞌ goꞌ, nde lo ndli goꞌ gan ndli lazoꞌ xaꞌy, mblilal goꞌ xaꞌ ya, thi xaꞌ mas nzalꞌ ya yeꞌr abil ke goꞌ.
16 ¡Nalat nya goꞌ, ngoꞌb kow goꞌ ned lo men! Mbez goꞌ: "Ngen kwan liy tez cho xaꞌ ntobro yodoꞌ chanꞌ Dios, lo senꞌ ndaꞌ xaꞌ xkiꞌs xaꞌ li xaꞌ thi jwanꞌ, per tez ntobro xaꞌ jwanꞌ or nzo lenꞌ yodoꞌ, xaꞌ ya ndablo li jwanꞌ mkeꞌ yek xaꞌ."
17 ¡Ngenta xgab yek goꞌ nde men nglwe goꞌ! Tak ¿Cho kwanꞌ mas ntak, cho re jwanꞌ or nzo lenꞌ yodoꞌy o yodoꞌ jwanꞌ ndli yon re jwanꞌ ora?
18 Noga mbez goꞌ: “Ngen kwan liy tez cho thi xaꞌ ndaꞌ xkiꞌs naꞌ li thi jwanꞌ nde ntobro xaꞌ plo ntolꞌ xaꞌ re jwanꞌ yon, per tez ntobro xaꞌ jwanꞌ yon ta nzi lo ya, xaꞌ ya ndabloga li jwanꞌ mkeꞌ yek xaꞌ.”
19 ¡Ngenta xgab yek goꞌ nde men nglwe goꞌ! ¿Cho kwan mas ntak, cho jwanꞌ yona o tenꞌ ntolꞌ xaꞌ re jwanꞌ yon sa nchak nayon na?
20 Tak xaꞌ ta ndaꞌ xkiꞌs naꞌ nde ntobro xaꞌ tenꞌ ntolꞌ xaꞌ re jwanꞌ yon, nanaktey benꞌta jwanꞌ na ntobro xaꞌ, noga re jwanꞌ nziꞌb lo neꞌy nge tobro xaꞌ.
21 Nde xaꞌ jwanꞌ ntobro yodoꞌ, nanaktey benꞌta yodoꞌ nge tobro xaꞌ, noga Dios nge tobro xaꞌ, tak tya nzo Dios.
22 Nde xaꞌ jwanꞌ ntobro beꞌ, nogaꞌ nge tobro xaꞌ tenꞌ ndyob Dios nyebeꞌ Dios nde nogaꞌ yub Dios ta ndyob tya nge tobro xaꞌ.
23 ¡Nalat nya goꞌ, maestr nchak ley nde re goꞌ fariseo, makwinꞌ! Tak ndaꞌ goꞌ dyezmo chanꞌ pthyon, chanꞌ kolantr, chanꞌ re la ncho komid nde ndlaꞌ goꞌ re jwanꞌ mas ntak lo ley, xa nak: Re jwanꞌ galꞌ, yalndlat lazoꞌ nde bli lazoꞌ goꞌ Dios. Re jwanꞌ reꞌ ndablo goꞌ li goꞌ nde nalad goꞌ li goꞌ temasa.
24 ¡Ngoꞌb kow goꞌ ned lo men, tak ndli goꞌ xa ndli xaꞌ ngote mchuꞌs lo nit nchuꞌ, per ngab xaꞌ ti kamey!
25 ¡Nalat nya goꞌ, maestr nchak ley nde re goꞌ fariseo, makwinꞌ! Goꞌ nak xaja bas nde yen, ntach goꞌ xis neꞌy, per yek goꞌ sey nzo re yalwanꞌ nde re yaltablasꞌ.
26 ¡Fariseo xa' nkow lon'! Nerla ptombi goꞌ jwanꞌ nzo lenꞌ bas nde jwanꞌ nzo lenꞌ yen, sa taga mbi xis neꞌy.
27 ¡Nalat nya goꞌ, maestr nchak ley, nde re goꞌ fariseo, makwinꞌ! Nak goꞌ xaja baꞌ nawe nakits nya xis naꞌ nde lenꞌ neꞌy se nzo re sij xaꞌ nguj nde reta jwanꞌ bew.
28 Taga nak goꞌ, benꞌ xis ndloꞌ goꞌ nabeꞌz toz nak goꞌ lo re men, per yek goꞌ sey nzo reta yalkwinꞌ nde reta yalxkap.
29 ¡Nalat nya goꞌ, maestr nchak ley, nde re goꞌ fariseo, makwinꞌ! Tak ntoxkwaꞌ goꞌ banꞌ re profet nde nawe nya re jwanꞌ ndob goꞌ yek banꞌ re xaꞌ galꞌ mdo lo Dios,
30 nde mbez goꞌ: “Tez naꞌ ngo tyemp ngo re xaꞌ gox lonꞌ pola, naꞌngod naꞌ xij re xaꞌ mbij re profet”.
31 Leꞌga leꞌ goꞌ ndej goꞌ jwanꞌ nak goꞌ, ke lo bin re xaꞌ mbij profet nde goꞌ.
32 ¡Noga goꞌ, ptolo goꞌ jwanꞌ mtobte re xaꞌ gox lo goꞌ!
33 ¡Xaja nak mziꞌb ba nak goꞌ! ¡Go' ba nya lo bin mzib ba nak goꞌ! ¿Xa lyaꞌ goꞌ lo yalnathoz chanꞌ yeꞌr abil?
34 Jwanꞌ nasa, telꞌ na lo goꞌ re profet, re xaꞌ nchak nde re maestr nchak ley. Per pla xaꞌ kuj goꞌ nde pla xaꞌ keꞌ goꞌ lo kruz, nde pla xaꞌ kin goꞌ lenꞌ re yo tenꞌ ndyop xaꞌ Israel, nde choꞌbla goꞌ xaꞌ yez kon yez.
35 Sa yek goꞌ ya reta yalke ta mbij xaꞌ re men galꞌ mdo lo Dios xis izyo reꞌ, xata Abel axta Zacarías xinꞌ Berequías jwanꞌ mbij goꞌ xlaj tenꞌ ntolꞌ xaꞌ jwanꞌ yon nde tenꞌ nayon lenꞌ yodoꞌ.
36 Nipa na lo goꞌ, leꞌ reta yalke ta nguj re xaꞌ ya, yeꞌd xis re men nzo na tyemp reꞌ.
Jesús nchonꞌno yez Jerusalén
(Lc. 13:34-35)
37 ¡Men yez Jerusalén, men yez Jerusalén, goꞌ ta nguj re profet nde ngadke go' re xaꞌ ntelꞌ Dios lo goꞌ! ¡Pla gob ncholas na nthop na re xinꞌ la xa nthop ngidtan re chuy xanꞌ xilꞌ maꞌ nde naꞌndoyalta la!
38 Naya, bwiꞌ goꞌ nea, leꞌ liz goꞌ baꞌ,
39 tak nin lo goꞌ, naꞌwiꞌtra goꞌ na naya, axta kebeꞌ sin wiz gab goꞌ: “¡Nayon nak xaꞌ nde lo le Xaꞌ Nyebeꞌ!