21
Jesús ngote lenꞌ yez Jerusalén
(Mr. 11:1-11; Lc. 19:28-40; Jn. 12:12-19)
1 Senꞌ ndasin re xaꞌ gax yez Jerusalén, mzin xaꞌ yez Betfagé, xanꞌ yiꞌ Olib, tya Jesús mbloned chop xin'te'd Xaꞌ,
2 nde nchab Jesús lo rop xaꞌ:
—Wa goꞌ yez lud ta nax lad tso ba. Tya zyal goꞌ thi bur gol ngedoꞌ kon bur lud xinꞌ maꞌ, xak goꞌ rop maꞌ nde yedno goꞌ maꞌ.
3 Tez cho xaꞌ kwan nye lo goꞌ, gab goꞌ lo xaꞌ, Señor nakinꞌ maꞌ, nde mas naba seꞌre Xaꞌ maꞌ.
4 Jwanꞌ reꞌ ngote sa ngok jwanꞌ mni profet, senꞌ nchab xaꞌ:
5 Gus goꞌ lo re xaꞌ yez Sion:
“Bwiꞌ, leꞌ Rey la nde loa,
nadoꞌ Xaꞌ, ndob Xaꞌ xis bur,
ti xis bur yenꞌ, xinꞌ maꞌ ncheꞌ yoꞌ”
6 Nde xin'te'd Jesús ngwa nde mbli xaꞌ xata mnabeꞌ Jesús lo xaꞌ.
7 Nde mbeꞌ xaꞌ bur gol kon xinꞌ maꞌ nde mxob xaꞌ xab xaꞌ xis maꞌ, nde mdob Jesús xis maꞌ.
8 Nde re men toz tira, rol xaꞌ mtogaꞌ xaꞌ lar nzoꞌb xis xaꞌ lo ned, nde rol xaꞌ mchoꞌ xod ya nde mdiꞌx xaꞌ lo ned tenꞌ ndorid Jesús.
9 Nde reta men ndasiblo nde reta men ndenke xis, tolo ne mbrez xaꞌ nchab xa:
—¡Naro nak Xaꞌ nde lo bin rey David! ¡Nabeꞌz nda Xaꞌ jwanꞌ nde kon le Dios! ¡Naro toz nak Dios ndob lo beꞌ!
10 Lo senꞌ ngote Jesús lenꞌ yez Jerusalén, reta men yez ya ncheꞌpa nchak xaꞌ nyab diꞌs xaꞌ lo ta xaꞌ:
—¿Cho xaꞌ ba?
11 Re men mkab:
—Xaꞌ reꞌ nak profet ndole Jesús, xaꞌ yez Nazaret xyon Galilea.
Jesús ntombi yodoꞌ
(Mr. 1:15-19; Lc. 19:45-48; Jn. 2:13-22)
12 Xisa Jesús ngote tenꞌ ndob yodoꞌ chanꞌ Dios, nde mbloꞌte Jesús reta xaꞌ nzi tho nde reta xaꞌ nzi tiꞌ tya. Mchixkwe Jesús re mes xaꞌ nsilꞌ tmin re men, nde re yasil chanꞌ re xaꞌ ntho palom;
13 nde nchab Jesús lo xaꞌ:
—Lo xkiꞌs Dios nchab: “Leꞌ liz na ryole, yo todiꞌsno men Dios”, per liz xaꞌ wanꞌ mblilal goꞌy.
14 Tya lenꞌ yodoꞌ mbike gax pla xaꞌ nkow lon' nde pla xaꞌ ngoꞌb ninꞌ lo Jesús, nde Jesús mtodanꞌ re xaꞌ.
15 Lo senꞌ mbwiꞌ re nglweyꞌ jwanꞌ nyebeꞌ lo re nglweyꞌ nde re maestr nchak ley, reta yalnaro jwanꞌ ndli Jesús, nde mbin xaꞌ xa mbez ne re or yenꞌ lenꞌ yodoꞌ: “Naro nak Xaꞌ nde lo bin David”, ngo naxi lazoꞌ re xaꞌ ya
16 nde nchab xaꞌ lo Jesús:
—¿Cho nchon la re jwanꞌ mbez re or ba?
Leꞌ Jesús mkab:
—Aaꞌ nchon nay. ¿Cho teraꞌ lab goꞌ tenꞌ nchab:
"Lu mbli sa ro re or bix nde ro re mbed nchuꞌ nis
gol or re di li naro or lea?”.
17 Nde mblaꞌ Jesús re xaꞌ ya, mbrote Jesús nda Xaꞌ yez Betania, tya mbled Xaꞌ yalꞌ ya.
Jesús mkede ya hig
(Mr. 11:12-14,20-26)
18 Nde tilꞌ, lo mbere Jesús nda xaꞌ yez Jerusalén, mzib ndyanꞌ Xaꞌ.
19 Nde mbwiꞌ Jesús thi ya hig ndob gax ro ned, nde ngwa twiꞌ Xaꞌ lo ya nde naꞌngenta ngud loneꞌy, benꞌta la ndoy. Zyasa nchab Xaꞌ lo ya:
—¡Nekthib ngud naketra loa! Nde zyaga mbis ya hig.
20 Lo senꞌ mbwiꞌ re xin'te'd Jesús jwanꞌ ta ngoka, nzoyen re xaꞌ nde mnabdiꞌs xaꞌ lo Jesús:
—¿Xamod sa atil tir mbis ya hig reꞌ?
21 Leꞌ Jesús mkab:
—Nipana lo goꞌ, tez ndlipa lazoꞌ goꞌ nde nanchakropta xgab goꞌ, nanakta benꞌta jwanꞌ ta mblinon ya hig toyal li goꞌ, cheꞌla toyal gab goꞌ lo yiꞌ reꞌ: “Bike nde gobi lenꞌ nittoꞌ”, nde taka.
22 Nde reta jwanꞌ nyab goꞌ lo Dios senꞌ ndodi'sno go' Dios, tez ndlipa lazoꞌ goꞌy, Xaꞌ taꞌy lo goꞌ.
Yalne chanꞌ Jesús
(Mr. 11:27-33; Lc. 20:1-8)
23 Senꞌ lo ngote Jesús lenꞌ yodoꞌ, laja nge loꞌ Jesús xkiꞌs Dios lo men, zyasa mbike re nglweyꞌ jwanꞌ nyebeꞌ nde re xaꞌ gox jwanꞌ nyebeꞌ, mnabdiꞌs xaꞌ lo Jesús:
—¿Cho mdaꞌ yalne loa ta ndlia re jwanꞌ reꞌ? ¿Cho mdaꞌy loa?
24 Nde Jesús mkab:
—Noga na nyabdiꞌs ti jwanꞌ lo goꞌ, tez tkab goꞌy, seraꞌ sa non tej lo goꞌ cho mdaꞌ yalne ndlin reta jwanꞌ reꞌ.
25 ¿Cho mtelꞌ Juan sa mbloꞌle Juan men? ¿Cho Dios mtelꞌ xaꞌ o men na?
Zyasa re xaꞌ ya mdodiꞌs xaꞌ nenꞌ xomod kab xaꞌ nde nchab xaꞌ lo ta xaꞌ:
—Tez gab naꞌ Dios mtelꞌ Juan, zyasa nye xaꞌ lonꞌ, ¿Kwanka liy sa naꞌndlid lazoꞌ goꞌ Juan?
26 Nde tez gab naꞌ na mena, nzyeb naꞌ men yez, tak reta xaꞌ ndli lazonꞌ Juan ngok tib profet.
27 Zyasa mkab re xaꞌ lo Jesús:
—Naꞌnyed náꞌy.
Nde Jesús nchab lo xaꞌ:
—Noga na naꞌtejta na lo goꞌ kon cho yalne ndlin re jwanꞌ reꞌ.
Diꞌs nagan chanꞌ chop mdyenꞌ
28 Jesús nchab lo xaꞌ
—¿Xa ngwiꞌ goꞌ jwanꞌ reꞌ? Thi mbiꞌ ngeno chop xinꞌ naꞌ or biꞌ, nde nchab xaꞌ lo or ner: “xinꞌ na, wa sinꞌ lo ub na wiz reꞌ”
29 Leꞌ xinꞌ xaꞌ mkab: “¡Naꞌyatna!” Per xiska mzyeꞌ xgab or ngwar sinꞌ.
30 Xisa tagaꞌ nchab xaꞌ lo tedib or nde or ya mkab: “Mbay, xud na, nasa ndan”. Nde naꞌngad or.
31 Lo rop or ¿xa nyar mbli jwanꞌ mnabeꞌ xud or?
Leꞌ re xaꞌ mkab:
—Or nera mbliy.
Zyasa nchab Jesús lo re xaꞌ:
—Nipa na lo goꞌ, re xaꞌ nthop tmi par Rom nde re ngol ntho lad naꞌ ner re xaꞌ ya yote tenꞌ nyebeꞌ Dios ke goꞌ.
32 Tak mbyed Juan, mbyeꞌd loꞌ mod galꞌ jwanꞌ ban goꞌ, nde naꞌndlid lazoꞌ goꞌ xaꞌ; nde re xaꞌ nthop tmi par yez Rom nde re ngol ntho lad naꞌ mbli lazoꞌ xaꞌ Juan. Nde leꞌ re goꞌ teꞌnye mbwiꞌ goꞌ re jwanꞌ mbli Juan, naꞌndlad goꞌ re jwanꞌ narax nak goꞌ, sa ndli lazoꞌ goꞌ xaꞌ.
Re mos narax nak
(Mr. 12:1-12; Lc. 20:9-19)
33 Bin goꞌ tedib kwent: Ngo ti mbiꞌ ngeno izyo, nde mblobin xaꞌ lus ub lo ney, nde mtowꞌ xaꞌ diba, mdenꞌ xaꞌ lenꞌ ney tenꞌ mdoxkwaꞌ xaꞌ tiꞌ xaꞌ ub, nde mtaꞌ xaꞌ thi yo gap ndab li sinꞌ kenap xaꞌ diba. Nde mdaꞌ xaꞌy kwent rol lo pla xaꞌ nchak ndli sinꞌ lo ub, nde ngo xaꞌ ned nda xaꞌ tij.
34 Nde senꞌ mzin beꞌ dyop ub, mtelꞌ xwanꞌ lus ubꞌ, pla mos xaꞌ, sa yakayaꞌ mos jwanꞌ ndaꞌ lus ub jwanꞌ nak chanꞌ xaꞌ.
35 Per re xaꞌ ta ngeno lus ub kwent rola, mxen xaꞌ re mos ya, ti mos mdin xaꞌ, ti mos mbij xaꞌ nde ti mos mbwadke xaꞌ.
36 Bere mtelꞌ xaꞌ nak xwanꞌ lus ub masra mos, nde taga mbli no xaꞌ re mos ya.
37 Lulka mtelꞌ xaꞌ xinꞌ xaꞌ tak mbli xaꞌ xgab: “Txobyek xaꞌ xinꞌ na”.
38 Per re xaꞌ ta ngeno lus ub kwent rola, senꞌ mbwiꞌ xaꞌ xinꞌ xaꞌ nak xwanꞌ lus ub, nchab xaꞌ lo ta xaꞌ: Xa reꞌ yanꞌno izyo nzo lus ub, kuj naꞌ xaꞌ, sa naꞌ yanꞌnoy.
39 Zyasa mxen xaꞌ xinꞌ xaꞌ nak xwanꞌ lus ub, nde mblote xaꞌ xaꞌ lad le nde tya mbij xaꞌ xaꞌ.
40 Mbay lo senꞌ yeꞌd xaꞌ nak xwanꞌ lus ub, ¿Cho kwan lino xaꞌ re xaꞌ ta ngeno lus ub kwent ro la?
41 Leꞌ re xaꞌ ya nchab:
—Naꞌlyata lazoꞌ xaꞌ, kuj xaꞌ re xaꞌ ta nakap naka, nde tayaꞌ xaꞌ lus ub kwent rol lo xaga men jwanꞌ liga tayaꞌ ub senꞌ ngol beꞌy.
42 Nde Jesús nchab lo re xaꞌ:
—¿Cho tera lab goꞌ lo xkiꞌs Dios tenꞌ nchab:
Leꞌ ke jwanꞌ mbloꞌtal xaꞌ ntaꞌ yo,
ke ya ngolal ke ntak toz lo dib yo.
Leꞌ jwanꞌ reꞌ mbli Dios,
nde nzoyen na' ngwiꞌ naꞌy.
43 Jwanꞌ nasa nin lo goꞌ, yiꞌb yalnyebeꞌ chanꞌ Dios lo yaꞌ goꞌ, nde taꞌ Xaꞌy lo re men jwanꞌ liga li jwanꞌ ncholaꞌs Dios.
44 Nde tez cho xaꞌ gab xis ke reꞌ tiptane ga's xaꞌ, nde tez cho gab ke re xis naꞌ thiptane ga'ski' xaꞌ.
45 Nde senꞌ mbin re nglweyꞌ jwanꞌ nyebeꞌ nde re xaꞌ fariseo kwent ya, mbyen xaꞌ ke xis xaꞌ ndo ni Jesús re jwanꞌ na.
46 Zyasa re xaꞌ yaꞌ mkwanꞌ mod nenꞌ xa yoga Jesús, per nzyeb xaꞌ re men yez, tak re men yez ndli lazonꞌ, Jesús nak profet chanꞌ Dios.