16
Xaꞌ fariseo nde xaꞌ saduseo nyab ti yalnaro
(Mr. 8:11-13; Lc. 12:54-56)
1 Re xaꞌ fariseo nde re xaꞌ saduceo ngwa lo Jesús, sa mnab xaꞌ li Jesús ti yalnaro, nenꞌ cho liga lo beꞌ nde Jesús.
2 Per Jesús mkab lo re xaꞌ ya:
—Senꞌ ndala yalꞌ, mbez goꞌ: "Nabeꞌz ak wiz yeꞌ, tak nane nya lo beꞌ".
3 Leꞌ tilꞌ mbez goꞌ: "Narax ak wiz naya, tak nane nya beꞌ nde nzo xkowa." ¡Makwinꞌ! nchak takbeꞌ goꞌ lo beꞌ, per naꞌyenta goꞌ re yalnaro jwanꞌ ndoyak na tyemp reꞌ.
4 Xaꞌ xkap re goꞌ nde ndli goꞌ jwanꞌ nchalaꞌs goꞌ tyemp reꞌ, nyab goꞌ yalnaro, per naꞌwiꞌd goꞌ tedib yalnaro, benꞌta jwanꞌ ngok lo profet Jonás wiꞌ goꞌ.
Nde mblaꞌ Jesús re xaꞌ ya nde nda Jesús.
Levadur chanꞌ xaꞌ fariseo
(Mr. 8:14-21)
5 Senꞌ mzin xin'te'd Jesús tedib lad ro nit, mbyaj yek xaꞌ ngweꞌ xaꞌ pan.
6 Zyasa nchab Jesus lo xaꞌ:
—Nda wiꞌ toz goꞌ kon levadur chanꞌ re xaꞌ fariseo nde xaꞌ saduseo.
7 Zyasa re xin'te'd Jesús nchab xaꞌ lo ta xaꞌ:
—Kwent nandenod naꞌ pan jwanꞌna ta mbez Jesús.
8 Jesús mnela jwanꞌ ndo diꞌs xaꞌ nde nchab Jesús lo xaꞌ:
—¿Kwan liy mbez goꞌ nangenod goꞌ pan? ¡Lud toz ndli lazoꞌ goꞌ Dios!
9 ¿Cho tata tera yen goꞌ, neꞌka nteꞌlaꞌs goꞌ re gayꞌ pan ta mblirol na mda re gayꞌ mil men nde pla chokwid jwanꞌ mbroꞌxob mtop goꞌ?
10 ¿Nde cho na ntelaꞌsta goꞌ re gas pan ta mblirol na mda re thap mil men, nde pla chokwida mthop goꞌ?
11 ¿Kwan liy sa naꞌyenta goꞌ, leꞌ na nandotejta pan, senꞌ nin lo goꞌ ndawiꞌ goꞌ kon levadur chanꞌ xaꞌ fariseo nde xaꞌ saduseo?
12 Zyara sa mbyen xaꞌ, leꞌ Jesús nandotejta levadur jwanꞌ ncho pan, leꞌ Xaꞌ ndej re jwanꞌ ndloꞌ re xaꞌ fariseo nde re xaꞌ saduseo.
Pedr nchab Jesús nak Crist
(Mr. 8:27-30; Lc. 9:18-21)
13 Senꞌ mzin Jesús lo xyon Cesarea Filipo, mnab diꞌs Xaꞌ lo re xin'te'd Xaꞌ:
—¿Cho mbez men nak Xinꞌ Mbiꞌ jwanꞌ nak na reꞌ?
14 Leꞌ re xaꞌ mkab:
—Cho xaꞌ mbez na, Juan Ngole mena, cho xaꞌ mbez Elias sa, nde pla xaꞌ mbez Jeremias sa, o nzo cho ti profeta.
15 Nde Jesús nchab lo xaꞌ:
—Mbay goꞌ, ¿cho nak na ndyak goꞌ?
16 Leꞌ Simón Pedr mkab:
—Lu nak Crist, Xinꞌ Dios naban.
17 Zyasa nchab Jesús:
—Nabeꞌz toz ndaa, Simón, xinꞌ Jonás, tak nek tib men nambloꞌd jwanꞌ reꞌ loa, jwanꞌ reꞌ mbloꞌ Xud na ndob lo beꞌ loa.
18 Nde nogaꞌ na ni loa, lu nak Pedr, nde xis ke reꞌ toxkwan yodoꞌn na, nde neka yalne chanꞌ yalguj naꞌlid gan lo ney.
19 Nde loa tan re yab chanꞌ yalnyebeꞌ lo beꞌ; reta jwanꞌ toboa lo izyo reꞌ, tyobo'y lo beꞌ, nde reta jwanꞌ koxak la lo izyo reꞌ, taga' yoxaka lo beꞌ.
20 Zyasa Jesús mnibeꞌ lo re xin'te'd Xaꞌ sa ngen cho lo tej xaꞌ leꞌ Jesús nak Crist.
Jesús ndej leꞌ Xaꞌ gaj
(Mr. 8:31—9:1; Lc. 9:22-27)
21 Xata zya ndobte Jesús ndej Xaꞌ lo re xin'te'd Xaꞌ, ndablo ya Xaꞌ Jerusalén nde re xaꞌ gox jwanꞌ nyebeꞌ lo re xaꞌ Israel, re nglweyꞌ jwanꞌ nyebeꞌ, nde maestr nchak ley, toti xaꞌ Xaꞌ nde kuj xaꞌ Xaꞌ, nde yoxob byon wiz ryoꞌxban Xaꞌ.
22 Zyasa xaꞌta mbeꞌ Pedr Xaꞌ nde tolo mbrez Pedr lo Xaꞌ nchab Pedr:
—¡Señor blat lazoꞌa la, nandabloda tyak la jwanꞌ reꞌ!
23 Per Jesús mbyek nde nchab Jesús lo Pedr.
—¡Bike tib blad, Maxuꞌ!, naꞌtowꞌta la lon. Tak nantobta la xgab la lo chan' Dios, leꞌa ndob xgab la jwan' lo izyo re'.
24 Zyasa nchab Jesús lo re xin'te'd Xaꞌ:
—Tez cho goꞌ, nchola's tyonke xis na, bkalo go' lo re jwan' ndyen goꞌ li goꞌ, bta'ya' lazo' go' rid go' pen reta wiz xaja men ne' kruza nde ptonke goꞌ xis na. .
25 Tak men jwanꞌ ncholas tolaꞌ yalnaban chanꞌ naꞌ, xaꞌ ya taꞌb yalnaban chanꞌ xaꞌ, per men jwanꞌ gaj por kwent chanꞌ na men ya li gan yalnaban adiꞌ.
26 Tak ¿cho sinꞌ li lo men tez li men gan reta jwanꞌ lo izyo reꞌ nde taꞌb men xbin men? ¿O plopa kix men sa lyaꞌ xbin men?
27 Tak leꞌ Xinꞌ Mbiꞌ yed Xaꞌ kon reta yalnaro chanꞌ Xud Xaꞌ nde kon re anj chanꞌ Xaꞌ, zyasa kix Xaꞌ lo kad tib men por jwanꞌ mbli men.
28 Lipa nin lo goꞌ, nzo pla goꞌ jwanꞌ nzi treꞌ naya, naꞌgajta goꞌ axta kebeꞌ wiꞌ goꞌ nde Xinꞌ Mbiꞌ yeꞌd nyebeꞌ Xaꞌ.