10
Jesús mblí tib sen Apost
(Mr. 3:13-19; Lc. 6:12-16)
1 Zyasa mbrez Jesús re thib sen xin'te'd Xaꞌ, nde mdaꞌ Jesús yalnyebeꞌ lo re xaꞌ, sa koꞌte xaꞌ re mbi narax nde todanꞌ xaꞌ re ned yis nde re ned nchow jwanꞌ ndyak men.
2 Nde chemod ndole re thib sen apost: nerla, Simón, jwanꞌ ndolega Pedr, nde wes xaꞌ ndole Ndres, nde Santyag kon Juan xinꞌ Zebedeo,
3 Blib, Bartolomé, Max, Mateo xaꞌ ndli kobral tmi low, Jakob xinꞌ Alfeo, Lebeo ndolega Tadeo,
4 Simón xaꞌ nzo xij partid kananist, nde kon Judas Iscariote, xaꞌ ta mdayaꞌ Jesús.
Jesús mtelꞌ re thib sen xin'te'd Xaꞌ
(Mr. 6:7-13; Lc. 9:1-6)
5 Re tib sen xaꞌ reꞌ mtelꞌ Jesús nde mnibeꞌ Jesús lo xaꞌ:
—Naꞌyad goꞌ re tenꞌ nzo re xaꞌ nanakta xaꞌ judio, nde naꞌyoted goꞌ re yez xaꞌ Samaria.
6 Cheꞌla, nerla wa goꞌ lo xaꞌ Israel jwanꞌ nak xaja re mbakxilꞌ ngetetab,
7 wa goꞌ nde pta' goꞌ kwent, leꞌ yalnyebeꞌ lo beꞌ ndo sin gaxla.
8 Ptodanꞌ goꞌ re xaꞌ nayiz, ptoban goꞌ re xaꞌ nguj, ptodanꞌ goꞌ re xaꞌ ndyak ye'sya's, bloꞌte goꞌ re mbi narax jwanꞌ nzo lazoꞌ men. Tata mkayaꞌ goꞌ jwanꞌ reꞌ, nde tata abli goꞌy lo re men.
9 Naꞌwed goꞌ tmi senꞌ nda goꞌ, nek tmi or, nek tmi plat, neka tmi cobr,
10 nde naꞌwed goꞌ jwanꞌ wa goꞌ ned, naꞌwed goꞌ chop ned lar, nek chop ned yalyid, neka yaga, tak xaꞌ nge sinꞌ nzalꞌ xaꞌ taꞌ men re jwanꞌ nakinꞌ xaꞌ.
11 Nde senꞌ sin goꞌ thi yez o thi ranch, kwanꞌ goꞌ thib liz men nabeꞌz nak nde liz xaꞌ ya yo goꞌ dibta kwed goꞌ, axta kebeꞌ yo goꞌ ned.
12 Lo senꞌ sin goꞌ liz xaꞌ, mni goꞌ dyux lo re xaꞌ nzo yo.
13 Nde tez xaꞌ nzo yo ya nzalꞌ xaꞌ yalnabeꞌz, yanꞌ na lo xaꞌ nde tez nanzalꞌta xay, nayantey lo xaꞌ.
14 Nde tez cho xaꞌ naꞌtad yo kwed goꞌ nde nagonta xaꞌ xkiꞌs goꞌ, broꞌte goꞌ yez ya o yo ya, nde bzib goꞌ yothiꞌ ni goꞌ, sa loꞌ naꞌngonta xaꞌ xkiꞌs goꞌ.
15 Nipa na lo goꞌ, senꞌ sin wiz nyab Dios kwent lo re men, ludxa pen ya re men yez Sodoma nde yez Gomorra, ke yez ta naꞌngonta xkiꞌs goꞌ ya.
Chuꞌbla men goꞌ
16 Wiꞌ goꞌ nea, na telꞌ goꞌ, xaja mbakxilꞌ xij re lob. Jwanꞌ nasa, nalas pkete goꞌ xaja mbelꞌ la, nde nadoꞌ gok goꞌ xaja palom ma.
17 Nda wiꞌ toz goꞌ tak re men tayaꞌ xaꞌ goꞌ lo re xaꞌ nak sinꞌ, nde kin xaꞌ goꞌ lenꞌ re yo tenꞌ ndyop xaꞌ Israel.
18 Nde we xaꞌ goꞌ lo gobernador nde lo re xaꞌ nak rey kwent chanꞌ na, tamod sa tej goꞌ xkiꞌs na lo re xaꞌ ya nde lo re xaꞌ jwanꞌ nanakta xaꞌ judio.
19 Per senꞌ tayaꞌ xaꞌ goꞌ lo re xaꞌ nak sinꞌ, nalid goꞌ xgab cho kwan gab goꞌ nde xamod gab goꞌy, tak senꞌ sin hor ya, Dios taꞌ re diꞌs jwanꞌ ndablo gab goꞌ.
20 Tak nanakta goꞌ jwanꞌ ni, Xbin Xud goꞌ Dios ni, Xaꞌ lirsinꞌ ro goꞌ.
21 Re men tayaꞌ xaꞌ leꞌga leꞌ wes xaꞌ lo yalguj, nde leꞌga leꞌ re xud re mdyenꞌ tayaꞌ xaꞌ mdyenꞌ, nde re mdyenꞌ tayaꞌ mdyenꞌ xud mdyenꞌ nde xnaꞌ mdyenꞌ sa kuj xaꞌ xaꞌ.
22 Nde re men giꞌno xaꞌ goꞌ kwent chanꞌ na, per xaꞌ tibla ne ndo axta lulka, xaꞌ ya lyaꞌ.
23 Senꞌ chobla xaꞌ goꞌ yez reꞌ, bxonꞌ goꞌ wa goꞌ tedib yez. Nipa na lo goꞌ tera yolo ketexonꞌ goꞌ reta yez nzi Israel senꞌ yeꞌd Xinꞌ Mbiꞌ.
24 Nek thib xin'te'd maestr mas ntak lo maestr, nde nek thib mos mas ntak lo xwanꞌ mos.
25 Xinꞌ teꞌd maestr leꞌja ak xaꞌ xaja maestr, nde leꞌ mos leja ak xaꞌ xaja xwanꞌ xaꞌ. Tez xud mdyenꞌ mblole xaꞌ, Beelzebú, ¿cho leta mdyenꞌ, plopa kole xaꞌ re mdyenꞌ?
Cho ndablo seb lazoꞌ men
(Lc. 12:2-9)
26 Jwanꞌ nasa, nazyebta goꞌ re xaꞌ ya. Tak reta jwanꞌ nagaꞌs nzo, leꞌy trotega lo xni, nde re jwanꞌ nkas men ley troxobka.
27 Jwanꞌ nin lo goꞌ tenꞌ nakow, ptej goy lo xni, nde re jwanꞌ nagaꞌsta ngetej na lo goꞌ, wap goꞌ re yek yo nde ne ptej goꞌy.
28 Naꞌzyebta goꞌ re xaꞌ nguj men, tak benꞌta belꞌ nguj xaꞌ, naꞌakta lux xaꞌ xbin men, mas bzeb lazoꞌ goꞌ Xaꞌ jwanꞌ tak lux belꞌ men nde xbin men lenꞌ yeꞌr abil.
29 ¿Plopa ndak chop mbyin bix? benta ti tmi lud ndak maꞌ Per nek thib mbyin bixa nachajta tez Xud goꞌ Dios nataꞌd diꞌs gaj maꞌ.
30 Taga axta re yis yek goꞌ nagaba lad yek goꞌ.
31 Jwanꞌ nasa naꞌzyebta goꞌ, tak mas ndak goꞌ ke tib byox mbin bixa.
32 Reta men jwanꞌ gab, nzolo xaꞌ na lo re men, noga na gab nzolon xaꞌ lo Xud na ndob lo beꞌ.
33 Per men jwanꞌ gab na nanzolod xaꞌ na lo re men, noga na gab nanzolod na xaꞌ lo xud na ndob lo beꞌ.
Ak rol re men kwent chanꞌ Jesús
(Lc. 12:49-53; 14:26-27)
34 Nalid goꞌ xgab ke leꞌ na ndalno yalnabeꞌz lo izyo, nandalnot na yalnabeꞌz leꞌn ndal sa ak rol men.
35 Leꞌ mbiꞌ yo kon xud mbiꞌ, nde mdyenꞌ got yo kon xnaꞌ mdyenꞌ, nde ngol yo kon xnayiꞌ ngol,
36 Nde leꞌga leꞌ re xaꞌ lenꞌ lis xaꞌ ak xaꞌ ke byo kon xaꞌ.
37 Men jwanꞌ mas nkeꞌ lazonꞌ xud naꞌ o xnanꞌ ke na, nanzalꞌta xaꞌ ak xaꞌ men na, nde men jwanꞌ mas nkeꞌ lazonꞌ xinꞌ biꞌ naꞌ o xinꞌ got naꞌ ke na, nanzalꞌta xaꞌ ak xaꞌ men na.
38 Tez cho xaꞌ ndyonke xis na, nde nancholasta xaꞌ rid xaꞌ yalti, nanzalꞌta xaꞌ ak xaꞌ men na.
39 Xaꞌ jwanꞌ nancholaꞌsta gaj lo izyo reꞌ xaꞌ ya gaj, leꞌ xaꞌ jwanꞌ nanzyebta gaj por kwent chanꞌ na, xaꞌ ya tibtane ban.
Re jwanꞌ li men gan
(Mr. 9:41)
40 Xaꞌ jwanꞌ ndaꞌ liz naꞌ kwed goꞌ, lon ndaꞌ xaꞌ yo kwed na, nde xaꞌ jwanꞌ ndaꞌ liz naꞌ mbed na, xaꞌ ya ndaꞌ liz naꞌ mbed Xaꞌ jwanꞌ mtelꞌ na.
41 Xaꞌ jwanꞌ ndaꞌ yo mbed ti profet, kwent nak xaꞌ profet, xapa jwanꞌ ka profet ya, yapa jwanꞌ kayaꞌ xaꞌ ya, nde xaꞌ jwan ndaꞌ yo kwed ti xaꞌ galꞌ ndo, kwent galꞌ ndo xaꞌ, xapa jwanꞌ ka xaꞌ galꞌ ndo ya, yapa jwanꞌ kayaꞌ xaꞌ ya.
42 Nde xa nya ti men taꞌ ti bas nit nal gu xaꞌ jwanꞌ mas lud ntak, por lo nak xaꞌ xin'te'd na, nipa na lo goꞌ ya ngenoa xaꞌ jwanꞌ li xaꞌ gan.