5
Mbiꞌ yez Gadara nzo mbi narax lazonꞌ
(Mt. 8:28-34; Lc. 8:26-39)
1 Mzin xaꞌ tedib lad ro nittoꞌ, tenꞌ nak lo xyon Gadara.
2 Nde sen' mbla Jesús lo bark, zyaga mbro'to ti mbiꞌ lo Jesús, mbi' jwan' mbroꞌ xij re baꞌ nde nzo mbi narax lazo' xa'.
3 Tenꞌ nzi re baꞌ tya nak liz xaꞌ nde nek thib men na'lida gan go men xa', nekla kon kaden .
4 Tak nar toz gob mbo men xaꞌ kon yi'b nde kaden, per nya kaden ncho' xa', nde nchix xa' yi'b; ngen cho men li gan tobo xaꞌ.
5 Nde reta yalꞌ nde ndlyabe ngete xaꞌ mbez xa' re lenꞌ wan nde xij re ba', ntowiyꞌ xaꞌ lad xaꞌ kon ke.
6 Senꞌ mbwiꞌ xaꞌ tijra' nde Jesús, mke xaꞌ karrel nde mdo xub xaꞌ lo Jesús.
7 Nde mbrezyaj xaꞌ, nchab xaꞌ:
—¿Cho kwan ndyaknoa na, Jesús, Xinꞌ Dios naro toz? Nya'b na loa, ndowiꞌ Dios, na'totid la na.
8 Tak Jesús nchab la:
—Mbi narax, broꞌte lazoꞌ mbiꞌ reꞌ.
9 Nde mnabdiꞌs Jesús lo xaꞌ:
—¿Cho lea?
Leꞌ xaꞌ mkab, nchab xa':
—Na ndole Bro toz; Tak bro toz tir náꞌ.
10 Nde mna'b toz xaꞌ lo Jesús sa natelꞌta Jesús xaꞌ, xaꞌga lo xyon men.
11 Gax yek yi' tya nzi bro toz nguch nzi ya.
12 Nde mna'b reta mbi naraxa lo Jesús, nchaba:
—Btelꞌ náꞌ lo re nguch sa lya náꞌ lenꞌ maꞌ.
13 Nde zyaga mdaꞌ Jesús diꞌs. Nde mbro' reta mbi naraxa, mblay lenꞌ reta nguch, lo re nguch nzi ti chop mil maꞌ nde mbro'xon' maꞌ mbixnda'b maꞌ yek ke, nde mbla maꞌ lenꞌ nittoꞌ, ngwap maꞌ nit nde nguj re maꞌ.
14 Leꞌ re xaꞌ jwanꞌ nkenap nguch mxonꞌ xaꞌ nde ngwa tej xaꞌy lo re men nzi yez nde ranch. Nde mbro' reta men ngwa twiꞌ xaꞌ jwanꞌ ngok.
15 Sen' mzin reta men lo Jesús, mbwiꞌ xaꞌ mbiꞌ ta ngo bro toz mbi naraxa, xe ndob xaꞌ, nok xab xaꞌ nde mbi yek xaꞌ; nde mzyeb reta men.
16 Leꞌ re men jwanꞌ mbwiꞌ mtodanꞌ Jesús mbiꞌ ya, mdej xa' lo re men xa ngotey kon mbiꞌ ta ngo mbi naraxa nde kwan ngotey kon re nguch.
17 Nde mdobte mna'b xaꞌ lo Jesús sa ryoꞌte Jesús lo xyon xaꞌ.
18 Laj ndoyap Jesús lo bark, leꞌ mbiꞌ ta ngo mbi naraxa, mna'b toz xaꞌ lo Jesús sa tyonke xaꞌ xis Jesús.
19 Per na'nkapta Jesús diꞌs, che'la nchab Jesús lo xaꞌ:
—Bya liz la, tenꞌ nzi re xaꞌ taa, ptej re yalnaro jwanꞌ mbli Dios loa nde xa mblat lazoꞌ Dios mbwiꞌ Xaꞌ lu.
20 Zyasa ndya xaꞌ, nde dib lo xyon Decápolis mdobte mdej xa' plopa nak yalnaro jwanꞌ mbli Jesús lo xaꞌ; nde nzoyen re men mbin mena.
Jesús mtodanꞌ ti ngol nde kon mzaꞌ xinꞌ Jaíro
(Mt. 9:18-26; Lc. 8:40-56)
21 Senꞌ mbere Jesús lo bark tedib lad ro nitto', men toz tir mdyop lo Jesús tya, yaja tyata mbyan' Xaꞌ.
22 Nde mbye'd ti xaꞌ ndole Jairo, xa' nyebeꞌ lenꞌ yo tenꞌ ndyop men Israel, senꞌ mbwiꞌ xaꞌ Jesús, mdo xub xaꞌ lo ni Jesús,
23 nde mna'b toz xaꞌ, nchab xaꞌ:
—Mzaꞌ xinꞌ na naxyajla or; deꞌ sa xo'b la yaꞌa yek or, sa dyanꞌ or nde nagajta or.
24 Zyasa nda Jesús kon Jaíro; nde bro toz men mdonke xis Xaꞌ, anta ngaꞌz men Xaꞌ.
25 Xija nzo ti ngol ndala tibsen linꞌ thiblaꞌ nge ren xa'.
26 Nde jwanꞌ tozla mbri'd xa' re yalti mkete xaꞌ lo re xa' ntoda'n men, nde mbre re tmin xaꞌ mbri'd xa' nde tatka nayiz xa', cheꞌla ndoro yiz lo xaꞌ.
27 Senꞌ mbin ngol re jwan' ndyodiꞌs men ndli Jesús, mbike ngol gax xis Jesús, nde mbwal ngol xab Jesús.
28 Tak xgab ngol nak: “Masa gal ngol xab Jesús, sa dyanꞌ ngol.”
29 Nde zyaga ngota'b yiz ren lo ngol, mdenꞌ xaꞌ mbyak xaꞌ nde mblyaꞌ xaꞌ lo yiz.
30 Zyaga mdenꞌ Jesús yalne chanꞌ Xaꞌ mbli mdyanꞌ ti men nde mbwiꞌ Xaꞌ lo re men, nchab Xaꞌ:
—¿Cho mbwal lad xab na?
31 Re xinꞌ teꞌd Xaꞌ nchab:
—Bwiꞌ, jwanꞌ toz ngaꞌz men lu nde mbez la: “¿Cho mbwal lad xab na?”
32 Per Jesús, tatka ngwiꞌ Xaꞌ lo re men jwanꞌ nzi dib tenꞌ ndo Xaꞌ, nyenꞌ cho mbwal lad xab Xaꞌ.
33 Zyasa leꞌ ngol ya, mzyeb toz xaꞌ nde nxid xaꞌ, tak mne xaꞌ jwanꞌ ngok lo xa', mbike xaꞌ gax lo Jesús nde mdo xub xaꞌ lo Jesús, nde mdej xaꞌ jwan' xa nakpe'y.
34 Leꞌ Jesús nchab lo ngol:
—Xinꞌ na, lo ta ndlipa lazoꞌa na, jwanꞌna mbli mblyaꞌa; nabeꞌz bya, tak mbyak la lo yiz jwanꞌ mxak la.
35 Laj benꞌ ndotodiꞌs Jesús, mzin pla xaꞌ jwanꞌ mbroꞌ liz Jairo, nchab xaꞌ lo Jairo:
—Ngujla mzaꞌ xinꞌ la; na'todotra' la lo maestr.
36 Leꞌ Jesús, zyaga mbin Xaꞌ jwanꞌ nzi bez men tya, nchab Jesús lo Jaíro:
—Nazyebta lu, benꞌta bli lazoꞌa na.
37 Nde naꞌndad Jesús diꞌs ndonke xaꞌga men xis Xaꞌ, benꞌta Pedr, Jakob nde Juan wes Jakob mdonke.
38 Nde lo mzin xaꞌ liz Jaíro, mbwiꞌ Jesús anta chepa nziyak re men, re xa' jwan' nzi yonꞌ nde re xa' jwan' mbez nabil.
39 Leꞌ Jesús ngote lenꞌ yo nde nchab Xaꞌ:
—¿Cho kwan liy taja nziyak goꞌ nde nziyon' goꞌ? Na'ngujta mzaꞌ, benꞌ naxyat mzaꞌ.
40 Nde re men mxino xaꞌ Jesús. Le' Jesús, mbloꞌte xaꞌ reta men le, ben' xud mzaꞌ nde xnaꞌ mzaꞌ nde kon re yon xinꞌ teꞌd Jesús ngote tenꞌ nax mzaꞌ.
41 Nde mxen Jesús yaꞌ mzaꞌ, nchab Jesús lo mza':
—Talita kumi —diꞌs reꞌ nak: ¡Mzaꞌ lud, na ni loa, gocheꞌ!
42 Nde zyaga ngoche mzaꞌ nde mde mzaꞌ, ben' tibsen lin' nzor. Nde jwan' toz nzoyen re men.
43 Per mna'b toz Jesús lo re xa', sa nekthib lo men na'gapta xa'y, nde nchab Jesús lo xa', taꞌ xaꞌ jwanꞌ wa mzaꞌ.