2
Jesús mtodanꞌ tib xaꞌ naꞌakta tye
(Mt. 9:1-8; Lc. 5:17-26)
1 Mbrid pla wiz, Jesús mbla len' yez Capernaum tedi gob; nde mbin re men Jesús nzo yo.
2 Zyaga men toz tir mdyop, na'galtra' ten' kwe men nekla ro yo na'galtra; le' Jesús ndotej xkiꞌs Dios lo re men.
3 Zyasa mzin pla xaꞌ lo Jesús ndeno ti men nayiz naꞌakta tye, nde thap xa' ne' men yisa.
4 Nde lo ta bro toz men nziy, na'ndlid xaꞌ gan mbike xaꞌ lo Jesús, mched xaꞌ yek yo nde mbla xaꞌ men yiza kon dib ya lonꞌ xaꞌ ten' ndo Jesús.
5 Senꞌ mbwiꞌ Jesús ndlipa lazoꞌ xaꞌ Jesús, nchab Jesús lo xa' yiza:
—Xinꞌ na, mdyonꞌla reta xken la.
6 Tya ndob pla xa' nak maestr nte'd ley xkiꞌs Dios, mbli xaꞌ xgab lenꞌ lazoꞌ xaꞌ:
7 “¿Kwan sa ta mbez Xaꞌ? Ni xin Xa' xis Dios. ¿Cho men ligan tonꞌ xken ta men, Benꞌta Dios ndli gan?”
8 Nde zyaga mne Jesús xgab jwanꞌ ndono re xa' ya lenꞌ lazoꞌ xaꞌ, nde nchab Jesús lo xaꞌ:
—¿Cho kwan liy ta nya xgab ndli goꞌ lenꞌ lazoꞌ goꞌ?
9 ¿Cho di's mas nambi, gab na lo xa' yiz reꞌ: “Re xken la mdyonꞌla,” o gab na: “Ptoli, bxen lonꞌ la nde pte?”
10 Naya loꞌn lo goꞌ, leꞌ Xinꞌ Mbi' ngeno yalnyebeꞌ dib lo izyo sa tonꞌ Xaꞌ xken re men.
Zyasa nchab Jesús lo xa' ta nayiza:
11 —Na ni loa, ptoli, bxen lonꞌ la nde bya liz la.
12 Zyaga mtoli xaꞌ yiza, mxen xaꞌ lonꞌ xaꞌ mbro'te xa' xij reta men, jwan' nasa nzoyen toz reta men, nde mni xaꞌ diꞌs wen lo Dios, nchab xaꞌ:
—¡Tera winꞌ ti jwanꞌ ta mbwinꞌ naya!
Jesús mbrez Leví Mateo
(Mt. 9:9-13; Lc. 5:27-32)
13 Ngolo jwanꞌ reꞌ Jesús nda ro nittoꞌ tedib gob. Nde reta men nda lo Xaꞌ, nde mtote'd Xa' men.
14 Nde lo ndarid Jesús, mbwiꞌ Xaꞌ Leviꞌ xinꞌ Alfeo, ndob xa' ten' nthop xaꞌ tmi low jwanꞌ nchax lo izyo, nde nchab Jesús lo xaꞌ:
—Btoke xis na.
Zyaga mdoli xaꞌ nde mdoke xaꞌ xis Jesús.
15 Senꞌ nax Jesús ro mes kon re xinꞌ teꞌd Xaꞌ liz Leví, bro re xaꞌ jwanꞌ nthop tmi chanꞌ izyo nde re xaꞌ jwanꞌ nzo'b xken' thita nzi re xaꞌ ro mes kon Jesús nde re xin' te'd Jesus, tak bro toz men jwan' ndyonke xis Jesús.
16 Nde re xaꞌ nak maestr ndlo' ley xkiꞌs Dios nde re xaꞌ nak fariseo, lo mbwiꞌ xaꞌ nax ya Jesús kon re men nthop tmi chan' izyo nde kon re men nzo'b xken', nchab xaꞌ lo re xinꞌ teꞌd Jesús:
—¿Cho kwan nak jwanꞌ reꞌ, kwan sa ncha Xaꞌ kon re men nthop tmi nde kon re men nzo'b xken naꞌ?
17 Senꞌ l o mbin Jesús jwanꞌ reꞌ, Jesús nchab lo xaꞌ:
—Re men nadanꞌ nanakiꞌnta xaꞌ men todanꞌ xaꞌ, che'la re men nayiza. Na'ndalta na sa bez na re men galꞌ, na ndal par re men nzo'b xken naꞌ.
Nyabdiꞌs xaꞌ lo Jesús kwan nak yalse
(Mt. 9:14-17; Lc. 5:33-39)
18 Nde re xaꞌ nak xinꞌ teꞌd Juan nde re xaꞌ fariseo ndli xaꞌ yalse; nde mbyeꞌd pla men lo Jesús, nchab xaꞌ:
—¿Cho kwan liy sa re xinꞌ teꞌd Juan nde re xa' fariseo ndli xaꞌ yalse nde re xinꞌ teꞌd la na'ndlid xaꞌ yalse?
19 Jesús nchab lo xaꞌ:
—¿Cho toyal re men jwan' nzi lo yalselya' li xa' yalse laj leꞌ mbyo selyaꞌ ndo kon xa'? Laj benꞌ ndo mbyo selya'ya kon xa', na'toyalta li xa' yalse.
20 Per tsin wiz senꞌ mbyo mselyaꞌya naꞌngentra', zyasa li xaꞌ yalse.
21 ’Ngen cho men nkibde tib ble lar kub lad lar gox; tak lar kub mbey nde cheda lar gox, zyasa masraꞌ cheda.
22 Nde taga', ngenta cho men ngo nit ub kub lenꞌ ti ye gox jwanꞌ naksaꞌ yid maꞌ; tak nit ub kub ncheda ye gox nde xyoy nde leꞌ ye ya yaja ngosaꞌy; Jwanꞌ nasa leꞌ nit ub kub ndablo yoy lenꞌ ti ye kub.
Xinꞌ teꞌd Jesús nthop trig lenꞌ wiz ndryoxkwen men
(Mt. 12:1-8; Lc. 6:1-5)
23 Ti wiz jwanꞌ ndryoxkwen men, Jesús kon re xinꞌ teꞌd xaꞌ ndarid xa' plo tenꞌ ndo trig, nde re xinꞌ teꞌd Jesús tolo mthop xaꞌ trig.
24 Zyasa pla xaꞌ fariseo nchab xaꞌ lo Jesús:
—Bwiꞌ, ¿Cho kwan liy re xinꞌ teꞌd la ngeli xaꞌ jwanꞌ nandabloda li xa' naya lenꞌ wiz ndryoxkwen men?
25 Per Jesús mkab lo xaꞌ:
—¿Cho tera' lab goꞌ jwanꞌ mbli David senꞌ lo mkeno xaꞌ yalti nde msi'b ndyanꞌ xaꞌ kon re men jwanꞌ nzino xaꞌ tya?
26 David ngote xaꞌ lenꞌ liz Dios nde mda xaꞌ pan nayon nzi tya, pan jwanꞌ benꞌta re xaꞌ nak nglweyꞌ ro toyal way; nde noga mdaꞌ Davida mda re xaꞌ jwanꞌ ngete kon xaꞌ. lin' jwan' Abiatar nak mbol ngwleyꞌ ro.
27 Noga nchab Jesús lo xaꞌ:
—Par yalwen lo men mbyanꞌ wiz ndryoxkwen men nde nambyanꞌta wiz reꞌ par nye men yalti.
28 Jwanꞌ nasa, le' Xinꞌ Mbiꞌ nak Xa' men Nyebeꞌ len' wiz jwan' ndryoxkwen men.