22
Nkwanꞌ xaꞌ xa kuj xaꞌ Jesus
1 Senꞌ ndo sin gaxla ni jwanꞌ ncha xaꞌ pan nanchod lebadur, ni ya ndole Pask.
2 Leꞌ re nglweyꞌ jwanꞌ nyebeꞌ, nde re maestr nchak ley, nkwanꞌ xaꞌ xamod kuj xaꞌ Jesus, tak nzyeb xaꞌ re ma yez.
3 Zyasa mbla Maxuꞌ lazoꞌ Judas xa' ndole Iscariote, jwanꞌ no nak xin'te'd Jesus ta ndenta re thib sen xa' ya.
4 Nde ngwa Judas lo re nglweyꞌ jwanꞌ nyebeꞌ nde lo re xaꞌ nyebeꞌ lo re xaꞌ ngenap yodoꞌ, sa todiꞌsno Judas xaꞌ, sa nyenꞌ xamod taꞌyaꞌ Judas Jesus lo xaꞌ.
5 Nale toz ngo lazoꞌ re xaꞌ, nde nchab xaꞌ taꞌ xaꞌ tmi lo Judas.
6 Le' Judas mxeyal nde mdobte xa' mkwanꞌ xa' xamod taꞌyaꞌ xa' Jesus, senꞌ na'ngenta men.
Jesus mnabeꞌ tyoxkwaꞌ rzyeꞌ
7 Senꞌ mzin wiz ncha xaꞌ pan nanchod lebadur, nde wiz ya ndablo kuj xaꞌ mbakxilꞌ yen', par ni pask.
8 Jesus mbloned Pedr nde Juan, nchab Jesus lo xaꞌ:
—Wa toxkwaꞌ goꞌ jwanꞌ wa rzyenꞌ ni pask.
9 Zyasa mnabdiꞌs xaꞌ lo Jesus, nchab xaꞌ:
—¿Plo ncholaꞌs la toxkwaꞌ naꞌy?
10 Jesus mkab nchab lo xaꞌ:
—Senꞌ lya go' lenꞌ yez Jerusalen yosal goꞌ thi xaꞌ biꞌ jwanꞌ neꞌ thi re nzo nit. Ptonke goꞌ xis xaꞌ axta sin goꞌ yo tenꞌ yote xaꞌ,
11 nde gab goꞌ lo xwanꞌ yo: ꞌꞌLeꞌ Maestr ne: ¿Plo ndob yo tenꞌ wa rzyeꞌn kon re xin'te'd na, rzyeꞌ chanꞌ pask?ꞌꞌ
12 Zyasa loꞌ xaꞌ thi yo ro lo goꞌ, jwanꞌ ndob xtaꞌ gap, nde tya nzila re jwanꞌ nakinꞌ goꞌ, tya ptoxkwaꞌ goꞌ rzyeꞌ.
13 Zyasa ngwa rop xaꞌ nde mzyal xaꞌ retay a xata nchab Jesus lo xaꞌ, nde mtoxkwaꞌ xaꞌ rzyeꞌ par wa xaꞌ ni pask.
14 Senꞌ mzin hor wa rzyeꞌ xaꞌ, mdob Jesus kon re thib sen xin'te'd Jesus ro mes.
15 Zyasa nchab Jesus lo xaꞌ:
—¡Jwanꞌ toz ndonkeꞌn wan rzyeꞌ chanꞌ pask reꞌ kon goꞌ, nal tera riꞌdndaꞌb na yalti!
16 Tak nin lo goꞌ ke naꞌwartraney tedib gob axta kebeꞌ akpey tenꞌ nyebeꞌ Dios.
17 Zyasa mxen Jesus kop nde mdaꞌ Jesus dyux lo Dios, nde nchab Jesus lo xaꞌ;
—Bxen goꞌ kop reꞌ guꞌ goꞌy nde bdiꞌd goꞌy lo ta goꞌ;
18 Tak nin lo goꞌ naꞌgutra na jwan' nda' lus ub, axta kebeꞌ sin wiz nyebeꞌ Dios.
19 Mxen na' Jesus pan nde mdaꞌ Xa' dyux lo Dios nde mbli rol Xa' pan nde mda' Xa'y lo re xin'te'd Xa', nde nchab Xa':
—Jwanꞌ reꞌ nak belꞌ na, jwanꞌ tayan por goꞌ, bli goꞌ jwanꞌ reꞌ sa telaꞌs goꞌ na.
20 Senꞌ mne mda rsyeꞌ xaꞌ, mxen Jesus kop nchab Jesus lo xaꞌ:
—Kop reꞌ nak nakub mda' Dios xki's Dios, jwan' mblí di's kon ren na, ren jwanꞌ xyo por goꞌ.
21 Per naya, yaꞌ xaꞌ jwanꞌ taꞌyaꞌn lo re xaꞌ jwanꞌ ngiꞌno na, yaꞌ xaꞌ ya nzo'b lo mes kon yan'.
22 Naya leꞌ Xinꞌ Mbiꞌ nakinꞌ riꞌd Xa' xata mbyan'la aka, per ¡Nalat nya xaꞌ jwanꞌ taꞌya' Xa'!
23 Zyasa mdobte re xin'te'd Jesus mnabdiꞌs lo re ta xaꞌ, xanya xa' ta li ya.
Xaꞌ mas ntak
24 Zyasa re xin'te'd Jesus, mdobte mdodiꞌs xaꞌ lo ta xaꞌ nchab xaꞌ: "¿Cho xaꞌ mas ntak?"
25 Jesus nchab:
—Re xaꞌ nak rey, nchak naro xaꞌ lo re yalnyebeꞌ ngeno xaꞌ, nde re xaꞌ yolow ncholaꞌs xaꞌ re ma yez xoꞌbyek men xaꞌ, nde re xaꞌ ngeno bro yalnyebeꞌ, ndli xaꞌ sa gab men lo xaꞌ, "xaꞌ ndla'sto men nak go'."
26 Per goꞌ nandabloda li goꞌ mod ya, che'la xa' mas xa' gox xij go', ndablo ak xa' xaja xa' yen' na, nde xaꞌ jwanꞌ nyebeꞌ nakinꞌ ak xaja xaꞌ ndli sinꞌ lo ta men na'.
27 Tak ¿Cho mas ntak, cho xaꞌ jwanꞌ ndyob ro mes way o xaꞌ jwanꞌ ngo mesa? ¿Cho na'naktey xa' jwan' ndyob ro mes way? Per na ndo ncheꞌya xaja xaꞌ ngo mes.
28 Nde goꞌ thibla nzi goꞌ kon na lo re yalti mbriꞌd na.
29 Jwanꞌ nasa, na ta yalnyebeꞌ lo goꞌ, ta xa mdaꞌ Xud na yalnyebeꞌ lon,
30 nde tyob go' ro mes na sa wa go' nde gu goꞌ sen' ndob nyebeꞌn, nde tyob goꞌ tenꞌ ndyob re rey sa koxyo goꞌ re thib sen bin xaꞌ Israel.
Jesus nchab, Pedr gab nancholot Jesus
31 Noga' nchab Jesus:
—Simon, maxuꞌ mnaꞌb lo Dios sa tokan xaꞌ goꞌ, xaja men mbib triga.
32 Per na mnaꞌb lo Dios por lu, sa naꞌlat la xkiꞌs Dios jwanꞌ ndli lazoꞌa. Nde lu, senꞌ mberea lon tedib gob, la'stoa temas re men ndli lazonꞌ na sa tyo ne xaꞌ.
33 Le' Pedr nchab lo Jesus:
—Xaꞌ Nyebeꞌ, toyal na yan lizyiꞌb kon lu nde axta gaj na kon lu.
34 Nde Jesus nchab:
—Pedr, na ni loꞌa, leꞌga naya, benꞌ tera kwez ngidteꞌ, mbyonla gob gab la nanzolod la na.
Ndozin gax ak re yalti jwanꞌ nakinꞌ ak
35 Nde Jesus mnabdiꞌs lo xaꞌ, nchab:
—Senꞌ mtelꞌ na goꞌ, nangwed go' tmi neka bed, neka tedib ned yalyid goꞌ, ¿cho ngok jwad jwanꞌ nakinꞌ goꞌ zya?
Zyasa mkab re xaꞌ:
—Ngen kwan ngok jwad lo náꞌ.
36 Zyasa nchab Jesus lo xaꞌ:
—Per naya, xaꞌ jwanꞌ ngeno bed, che' ndablo we xaꞌy, nde taga' xaꞌ nden tmi we xaꞌy, nde xaꞌ jwanꞌ nangenoda espad, ndablo tho xaꞌ chamar xaꞌ sa tiꞌ xaꞌ thiba.
37 Tak nin lo goꞌ, nakinꞌ ri'd na reta jwanꞌ nchab lo xkiꞌs Dios, tenꞌ nchab: "mblino xaꞌ xaꞌ, xaja thi xaꞌ jwanꞌ mbli jwanꞌ naraxa." Tak ndablo ri'd na reta jwan' nchab lo xkiꞌs Dios.
38 Zyasa nchab xaꞌ lo Jesus:
—Xaꞌ nyebeꞌ, ncheꞌ nzo chop espad.
Jesus mkab:
—Naꞌtodisꞌta naꞌ jwanꞌ reꞌ.
Jesus ndodiꞌsno Dios tenꞌ ndole Getsemani
39 Nde mbroꞌ Jesus nda Jesus yiꞌ Oliv tenꞌ nchaga Jesus, nde re xin'te'd Jesus mdonke xa' xis Jesus.
40 Senꞌ mzin Jesus tya, nchab Jesus lo xaꞌ:
—Mnaꞌb goꞌ lo Dios sa naꞌtokanta maxuꞌ goꞌ.
41 Zyasa mbike Jesus tib lad, xapa tenꞌ nzin thi ke ta ngobi mena, nde tya mdoxub Jesus sa todiꞌsno Jesus Dios.
42 Nde nchab Jesus:
—Xud na, tez ncholaꞌs la, ptola'n lo re yalti toz reꞌ, per nagaktey xa ncholas na, aka xa ncholaꞌs la.
43 Zyasa mbroꞌto thi anj mbro' lo be', mblo ne lazoꞌ Jesus.
44 Nde lo ta nabil toz nzo lazo' Jesus, masra dib fwerz Jesus mnaꞌb Jesus lo Dios. Nde lon jwan' ndryo' lo Jesus xaja zun' rena nchaba izyo.
45 Senꞌ mne mdodiꞌsno Jesus Dios mdoli Jesus, nda Xaꞌ tenꞌ nzi re xin'te'd Xaꞌ, nde ngosi'b Xa' reta xin' te'd Xaꞌ nziyat, tak nabil toz nzo lazoꞌ xaꞌ.
46 Zyasa nchab Jesus lo xaꞌ:
—¿Kwan ndliy nziyat goꞌ? Goche goꞌ nde mnaꞌb goꞌ lo Dios, sa na'ganta xgab goꞌ.
Mxen xaꞌ Jesus
47 Tata benꞌ ndotodiꞌs Jesus, senꞌ mzin bro toz men. Nde xaꞌ jwanꞌ ndole Judas, xa' jwanꞌ nak ta thib sen xin'te'd Jesus, nda siblo lo reta men. Zyasa mbike Judas gax lo Jesus nde mda Judas chut kwat Jesus,
48 per Jesus nchab:
—Judas, ¿cho kon thi chut taꞌyaꞌa Xinꞌ Mbiꞌ?
49 Senꞌ mbwiꞌ re xaꞌ nzino Jesus re jwanꞌ ndoyak, zyasa mnabdiꞌs xaꞌ lo Jesus nchab xaꞌ:
—Xaꞌ Nyebeꞌ, ¿cho ndablo keꞌ naꞌy cho xaꞌ kon espad?
50 Nde thib xaꞌ jwanꞌ nzino Jesus, mpchoꞌ nza ban thi xaꞌ nak mos nglweyꞌ ro.
51 Zyasa nchab Jesus lo xaꞌ:
—Blaꞌ goꞌ xaꞌ, baja mney.
Nde mbwal Jesus nza mos nde mtodanꞌ Jesus nza xa'.
52 Zyasa nchab Jesus lo re nglweyꞌ jwan' nyebe' nde re xaꞌ nyebeꞌ lo re xaꞌ nkenap yodoꞌ nde lo re xaꞌ gox jwanꞌ nde sa we xa' Jesus:
—¿Goꞌ nde kon espad nde kon ya, sa tyen goꞌ na xaja ndyen men thi xaꞌ wanꞌ na?
53 Senꞌ reta wiz mbrenon goꞌ lo len yodoꞌ, nde naꞌndenta goꞌ na. Per naya nak hor chanꞌ goꞌ, tyen goꞌ na, tak naya nde yalne chanꞌ yalꞌkow.
Pedr gab nanzolod xa' Jesus
54 Zyasa mxen xaꞌ Jesus nde mbeꞌ xaꞌ Jesus liz nglweyꞌ ro. Nde Pedr tij, tij, ndanke xisa.
55 Nde mtolꞌ xaꞌ ki xtowꞌ lo le, nde mdob xaꞌ dib ro, nde no Pedr mdob xij xaꞌ.
56 Zyasa thi ngol ndli sin' yo, lo mbwiꞌ ngol ndob Pedr tenꞌ ndoyol ki, xe mbwiꞌ ngol lo Pedr, nde nchab ngol:
—No xaꞌ biꞌ reꞌ mketenke xis Jesus.
57 Per Pedr mka's, nde nchab:
—Ngol, nanzolot na xaꞌ.
58 Tudla ndate mbwiꞌ tediba xaꞌ Pedr nde nchab xaꞌ:
—Noa nak thi men Jesus.
Pedr mkab, nchab:
—Naktey na.
59 Mbriꞌd thib hor pa, tediba xaꞌ nchab:
—Gal' di's no xaꞌ reꞌ ndo kon Jesus, tak xaꞌ yez Galilea xa'.
60 Per Pedr nchab:
—Naꞌnyet na kwan ndej goꞌ.
Nde tata benꞌ ndotodiꞌs Pedr, mbrez ngidteꞌ.
61 Zyasa mbyek Jesus mbwiꞌ Jesus lo Pedr, nde mtelaꞌs Pedr jwanꞌ nchab Jesus lo Pedr: Ben' tera' kwez ngidteꞌ, mbyonla gob gab la nanzolod la na.
62 Zyasa mbroꞌte Pedr tya, nde jwanꞌ toz nabil mbinꞌ Pedr.
Nxino xaꞌ Jesus nde mkeꞌ xaꞌy cho Jesus
63 Nde re xaꞌ jwanꞌ ngenap Jesus, nxino xaꞌ Jesus nde ngin xaꞌ Jesus.
64 Nde mtowꞌ xaꞌ ngudlo Jesus, mke' xa'y lo Jesus nde mnabdiꞌs xaꞌ lo Jesus nchab xaꞌ:
—Tez naye'a, ptej cho mkeꞌy choa!
65 Nde anta che'pa naxin mbrez xaꞌ lo Jesus.
Mbeꞌ xaꞌ Jesus lo re xaꞌ ngeno yalnyebe' ro
66 Senꞌ mduxni tedib wiz, mketa reta xaꞌ gox jwanꞌ nyebeꞌ lo xaꞌ Israel, re nglweyꞌ jwanꞌ nyebeꞌ nde re maestr jwanꞌ nchak ley, mbeꞌ xaꞌ Jesus lo junt chanꞌ re xaꞌ ngeno yalnyebe' ro. Tya mnabdiꞌs xaꞌ lo Jesus:
67 —Ptej lo náꞌ, ¿Cho lu nak Xaꞌ mtelꞌ Dios?
Jesus, nchab:
—Tez nin lo goꞌ, nay, pa li lazoꞌ goꞌy.
68 Nde tez nyaꞌbdiꞌs na lo goꞌ, pa kab goꞌ lon, neka laꞌ goꞌ na.
69 Per naya leꞌ Xinꞌ Mbiꞌ, tyob lad ban Dios jwanꞌ ngeno reta yalnyebeꞌ ro.
70 Zyasa reta xaꞌ mnabdiꞌs lo Jesus, nchab xa':
—¿Cho lu nak Xinꞌ Dios?
Jesus mkab:
—Mne go' sa wi', le'ga goꞌ ndotej ke nay.
71 Zyasa nchab xaꞌ:
—¿Wenraꞌ na' kwanꞌ naꞌ men tej lonꞌ nchap Xaꞌ yalke? Yub naꞌ mbin ke le'ga ro Xaꞌ mbroꞌy.