20
Yalnyebeꞌ chanꞌ Jesus
1 Thib wiz senꞌ ngeloꞌ Jesus xkiꞌs Dios nde ngetej Xa' di's wen chan' Dios lo re men lo len yodo', mzin re xaꞌ nyebeꞌ lo re nglweyꞌ, re maestr nchak ley, nde re xaꞌ gox jwanꞌ nyebeꞌ lo yez,
2 nde nchab xaꞌ lo Jesus:
—Btej lo náꞌ, ¿kon cho yalnyebeꞌ ndlya re jwanꞌ reꞌ? ¿Cho mdaꞌ yalnyebeꞌ reꞌ loa?
3 Jesus mkab lo xaꞌ nchab:
—Noga na nyaꞌbdiꞌs lo goꞌ, mne go' lon:
4 ¿Cho mnebe' lo Juan ko'le Juan men? ¿Cho Diosa o mena?
5 Zyasa nchab xaꞌ lo ta xaꞌ:
—Tez gab na' Dios mtelꞌ Juan, nye Jesus lonꞌ, ꞌꞌ¿Kwan ndliy naꞌndlid lazoꞌ goꞌ jwanꞌ mbloꞌ Juan?ꞌꞌ
6 Nde tez gab naꞌ, men mtelꞌ Juan, reta men gadke xaꞌ naꞌ nde kuj xaꞌ naꞌ, tak ndli lazo' xa' le' Juan nak thi profet.
7 Zyasa mkab xaꞌ, nchab xaꞌ:
—Naꞌnyed náꞌ cho mtelꞌ Juan.
8 Zyasa mkab Jesus lo xaꞌ nchab:
—Taga' na naꞌtejta na cho mdaꞌ yalnyebeꞌ lon lin re jwanꞌ reꞌ.
Kwent nagan chanꞌ xaꞌ nale'da nke sinꞌ
9 Zyasa mdaꞌ Jesus tedib kwent nagan lo men, nchab Jesus:
—Ngo thi mbiꞌ jwanꞌ mblo bin lus ub, nde mtan'no xa'y kwent rol lo ya' men sa kenap mena. Nde mbroꞌ xaꞌ nda xaꞌ tij bro tyemp.
10 Senꞌ ngol tyemp dyop jwan' ngok, mtelꞌ xaꞌ biꞌ ya thi mos xaꞌ, sa ya naꞌb mos rol kosech jwanꞌ ndinꞌ kayaꞌ xaꞌ, lo xaꞌ ta ngenapa, per re xaꞌ ngenapa mdin xaꞌ mos nde tatanya mos mblo ned xaꞌ mos, ndya mos.
11 Xisa mtelꞌ xaꞌ tedib mos, per noga mos ya mtoti xaꞌ, mdin xaꞌ mos nde mbloꞌs xaꞌ mos, ngen kwan mdayaꞌ xaꞌ lo mos, tatanya mos mbloned xaꞌ mos.
12 Zyasa le' xwanꞌ lus ub bere mtelꞌ mbyon mos, per re xaꞌ ngenap lus ub, taga' mdin xaꞌ mos, nde mbloꞌte xaꞌ mos lo izyo tenꞌ nzo lus ub.
13 Zyasa, xaꞌ nak xwanꞌ lus ub mbli xaꞌ xgab: ꞌꞌ¿Kwan lin naya? Telꞌ na xinꞌ na jwanꞌ nkeꞌ toz lazoꞌn, ta'da senꞌ wiꞌ xa' or txoꞌbyek xaꞌ or.ꞌꞌ
14 Per senꞌ mbwiꞌ re xaꞌ ngenap lus ub, xinꞌ xaꞌ nak xwanꞌ lus ub, nchab xaꞌ lo ta xaꞌ: ꞌꞌOr reꞌ yan'no reta jwanꞌ nak chanꞌ xud or, kuj naꞌ or, sa jwan' ndin' or, na' yan'noy.ꞌꞌ
15 Nde mbloꞌte xaꞌ or tenꞌ nzobin lus ub nde mbij xaꞌ or.
Zyasa mna'bdi's Jesus:
—¿Cho xgab ndli goꞌ?, ¿kwan lino xaꞌ nak xwanꞌ lus ub re xaꞌ ya?
16 Yeꞌd xaꞌ nde kuj xaꞌ reta xaꞌ ngenap lus ub, nde taꞌ xa' lus ub kenap xaꞌga men.
Senꞌ mbin re xaꞌ nzi tya jwanꞌ reꞌ, nchab xaꞌ:
—¡Ta nathoza lon' tez ta yatey!
17 Per Jesus mbwiꞌ lo xaꞌ, nde nchab:
—¿Xamod nak jwanꞌ nchab lo xkiꞌs Dios?
Leꞌ ke jwanꞌ ta mblo'tal re xaꞌ ntaꞌ yo,
ke ya ngolal ke jwanꞌ mas ntak,
18 Achoja men ryoꞌndaꞌb xis ke ya, tas men, nde tez ke gab xis men, toꞌy men.
Ndablo yax tmi low
19 Zyasa re xaꞌ nyebeꞌ lo re nglweyꞌ nde re xaꞌ nak maestr nchak ley, ncholaꞌs xaꞌ tyen xaꞌ Jesus or yaga, tak mbyen xaꞌ ke reta kwent ta mdaꞌ Jesus xis xaꞌ ndey. Per naꞌngakta nden xaꞌ Jesus tak nzyeb xaꞌ re men nzi tya.
20 Zyasa re xaꞌ ya, mtelꞌ xaꞌ pla men sa ya laꞌs xaꞌ, nde li xaꞌ xaja men wena, sa li xaꞌ ni Jesus diꞌs naꞌleda, sa toyal keꞌ xaꞌ yalke yek Jesus nde toyal tayaꞌ xa' Jesus lo gobernador.
21 Zyasa mnabdiꞌs xaꞌ lo Jesus, nchab xaꞌ:
—Maestr, mne náꞌ ke re jwanꞌ nia nde re jwanꞌ ndloꞌa naka jwanꞌ li nde nambit la men, galꞌ ndloꞌa xkiꞌs Dios lo men.
22 Ptej lo náꞌ ¿Cho ndablo kix naꞌ tmi low lo Cesar o nandablode kix naꞌy?
23 Per Jesus mnela xgab narax ndli xaꞌ, nchab Jesus lo xaꞌ:
—¿Kwan liy sa nchola's goꞌ tokan go' na?
24 Bloꞌ goꞌ thi tmi lon. ¿Cho lo xa' nde cho le xa' ta nge lo tmi ba?
Zyasa mkab xaꞌ, nchab xaꞌ:
—Lo Cesar nde le Cesar nge lo neꞌy.
25 Zyasa nchab Jesus lo xaꞌ:
—Ptaꞌ goꞌ lo Cesar jwanꞌ nak chanꞌ Cesar nde ptaꞌ goꞌ lo Dios jwanꞌ nak chanꞌ Dios.
26 Nde naꞌnzalta xaꞌ thi di's xamod ngala Jesus, cheꞌla nzoyen xaꞌ lo jwanꞌ mkab Jesus nde xe mbre xaꞌ.
Yalnyabdiꞌs chanꞌ ryoꞌxban men
27 Zyasa mbike pla xaꞌ Saduseo, jwanꞌ mbez ke nandryoꞌxbanta men ngujla tib gob; por jwanꞌ nasa ngwa nabdiꞌs xaꞌ lo Jesus nchab xaꞌ:
28 —Maestr, Moises mkeꞌ lo yes: Tez thi xaꞌ biꞌ ndob ngol naꞌ gaj xaꞌ nde ngenta xinꞌ xaꞌ, leꞌga wes thabol ndablo ka ngol sal' thabol, sa gal or bix nde or bix ya, ak xinꞌ wes or jwanꞌ ta nguja.
29 Wiꞌ nea, ngo thi xaꞌ gaz wes xaꞌ, xaꞌ nera mselyaꞌ, per nguj xa', nde ngenta xinꞌ xaꞌ.
30 Leꞌ wes xaꞌ or yenꞌ jwanꞌ nde xis xaꞌ, mselyaꞌno ngol ta nguj sal' na'ya nde taga' ngalta xinꞌ xaꞌ.
31 Nde taga' or mbyon, mselyaꞌnor ngol nguj sal' na ya, per taga' ngenta xinꞌ or, nde taga' mbli temas wes or mselyaꞌnor ngol nguj sal' na' ya, per re gaz wes or nguj nde ngenta xinꞌ nek thib or.
32 Lulka no ngol ya nguj.
33 Mbay senꞌ ryoꞌxban re xaꞌ nguj, ¿Xanya xaꞌ ak salꞌ ngol ya, tez re gaz wes xa' mdobno ngol?
34 Jesus nchab lo xa':
—Re men lo izyo reꞌ, re xaꞌ biꞌ nde re ngol nselyaꞌ xaꞌ,
35 Per re xaꞌ jwanꞌ nzalꞌ ryoꞌxban lo yalguj sa gal xa' tedib izyo, naꞌselyaꞌtra xaꞌ, nde naꞌyotra yalselyaꞌ,
36 tak naꞌgajtraꞌ xaꞌ. Tak xaja re anj chanꞌ Diosa nak xaꞌ nde xinꞌ Dios nak xaꞌ lo mbroꞌxban xaꞌ.
37 Nde axta Moises ndloꞌ, ke re xaꞌ nguj ndryoꞌxban, ma tenꞌ nda'y kwent nchol yabxi'd, tya mni Dios lo Moises nchab: Na nak Dios chanꞌ Abraham, Dios chanꞌ Isaac nde Dios chanꞌ Jakob.
38 Nde Dios nanakta Dios chanꞌ re xaꞌ nguj, Dios nak chanꞌ re xaꞌ naban, tak par Dios reta men naban
39 Zyasa pla maestr nchak ley, nchab lo Jesus:
—Maestr, jwin thoz mkab la.
40 Nde ngentra cho xa' ngoyek na' nabdi's lo Jesús.
¿Cho xin' nak Crist?
(Mt. 22:41-46; Mr. 12:35-37)
41 Zyasa mnabdiꞌs Jesus lo re men:
—¿Kwan liy mbez men Crist nde lo bin David?
42 Nde leꞌga David mkeꞌ lo libr chanꞌ Salmos, tenꞌ nchab:
Dios nchab lo Xaꞌ Nyebeꞌ lon:
ꞌꞌPtob lad ban na,
43 Axta kebeꞌ lin sa re xaꞌ nayiꞌ loa ak xis jwanꞌ tyobnia.ꞌꞌ
44 ¿Xamod ye'd Crist lo bin David, tez le'ga' David mbez lo Xa', Xaꞌ Nyebeꞌ?
Jesus mni xis re maestr nchak ley
45 Nde nzi yon reta men senꞌ nchab Jesus lo re xin'te'd Xaꞌ
46 —Pkenap lazoꞌ goꞌ lo re maestr nchak ley, jwan' nak xa', ndyen xaꞌ gok xaꞌ lar nolꞌ, nde ndyen xaꞌ nawe ni men dyux lo xaꞌ lo xbiꞌ. Nde nkwanꞌ xaꞌ tyob xaꞌ ten' ndyob re men ntak lenꞌ yo tenꞌ ndyop xaꞌ Israel, ndyen xa' tyob xa' tenꞌ ndyob re men ntak ten' ncho yalwa.
47 Nkib xaꞌ liz re ngol nguj sal' na', nde sa naꞌlo'd re jwanꞌ ndli xaꞌ, bro toz ndyodi'sno xaꞌ Dios. Re xaꞌ ya mas naro pen ya xa'.